مانگی سووری کوردستان رایگەیاند، بە بڕی ٣٠٠ هەزار یورۆ هاوکاری، کە لە ٥ ئامبولانس، بەتانی، راخەر، باتریى وەزی خۆر و گەرمکەرەوە، بەستەى خواردن، شیری منداڵ پێکهاتوون بۆ دەیان هەزارا هاووڵاتیى عەفرین لەهەرێمى شەهبا رەوانە کردووە.

لە رایگەیاندراوەکەى مانگی سووری کوردستاندا هاتووە "دەوڵەتى تورکی داگیرکەر و چەتەکانى لە ٢٠ی کانوونی دووەمی ٢٠١٨ / ٣٠ی بەفرانبار بە ئامانجی داگیرکردنی عەفرین و کۆچبەرکردنى هاووڵاتییانى عەفرین دەستیان بە هێرشی داگیرکەری کرد. دەوڵەت تورک و چەتەکانى پێبەندی ئەخلاق و پێوەری شەڕ نەبوون. لە عەفرین ژنان، منداڵان، بە تەمەنەکان کرانە ئامانج. بە بۆردومانکردنى شوێنە مەدەنییەکان ژیان و ئارامی و ماڵی هاووڵاتییانیان کاولکرد. خانوو، بینا، مزگەوت، نەخۆشخانە، بەنداو، کامپەکانى پەنابەران لەلایەن دەوڵەتى تورکەوە کرانە ئامانجی بۆردومانەکان".

راشیگەیاندووە "هەروەها دەستیان کرد بە دزینى هەموو ماڵ و موڵک و کەلوپەلی هاووڵاتییانى عەفرین و عەفرینیان تاڵانکرد. لە ٢ مانگدا زیاتر لە ٥٠٠ هاووڵاتییان کوشت، کە چەندین ژن و منداڵیشیان لە ناودا بوو و زیاتر لە ١٠٠٠ کەسی تریشیان بریندار کرد".

مانگی سووری کوردستان ئاماژەى بەوەکردووە، بەهۆی هێرشەکانى دەوڵەتى تورک و چەتەکانییەوە سەدان هەزار هاووڵاتیى عەفرین ناچار بوون کۆچ بکەن و ئێستا لە هەرێمى شەهبا لە دۆخێکى قورس دا ژیان بەسەر دەبەن.

مانگی سووری کوردستان ئەوەشى خستووەتەڕوو "دەوڵەتى تورک سەدان هەزار هاووڵاتیى عەفرینى کۆچبەر کرد و لە شوێنیاندا چەتەکانى نیشتەجێکرد، دیمۆگرافیاى گۆڕی و زەیتون و هەموو خێر و بێری شارەکەى تاڵانکرد".

لە راگەیاندراوەکەدا باسی ئەوەشکراوە، مانگی سووری کوردستان لە سەرەتاى هێرشەکانى دەوڵەتى تورک و چەتەکانییەوە تاوەکو ئێستا و بەپێى توانای خۆی هاوکاریى مرۆیى بۆ هاووڵاتییانی عەفرین رەوانە دەکات، کە بڕی ئەو هاوکارییانە گەیشتووەتە نزیکەى ملیۆنێک و ٥٠٠ هەزار یورۆ.

مانگی سووری کوردستان داوا لە کوردستانیان و دۆستەکانیان لە ئەوروپا و ناوچەکانى تری جیهان دەکات، کە دەست بە هەڵمەتى کۆکردنەوەى هاوکاریى مرۆیى بۆ هاووڵاتییانى عەفرین بکەن.

ر.م