کوردستانیانی دانیشتووی شاری کۆپنهاگن، لە ٩یەمین ساڵڕۆژی فەرمانی ٣ی ئابی ٢٠١٤، لە "هالمتۆرڤ" لە ناوەندی شارەکە، خێمەیەکی وشیارکردنەوەیان دانا.

لە چالاکییەکەدا بە پێشەنگایەتی ئەنجومەنی ژنانی کورد و کۆمیتەی پشتیوانی کوردستان، لە ٩یەمین ساڵڕۆژیدا، جینۆسایدی پێکهاتەی ئێزدی شەرمەزار کرا و لەسەر هێرشە جینۆسایدییەکان بروشەر بڵاوکرایەوە.

لە چالاکییەکەدا ڕاگەیەندراوێک خوێندرایەوە، کە تێیدا هاتووە، "دەبێت ٣ی ئاب بۆ هەموومان ببێتە ڕۆژی ماتەمینی".

 لە ڕاگەیەندراوەکەدا هەروەها یادی "هەزاران ژن و کچ کە بە دیل گیران و وەک کۆیلە فرۆشران"، کرایەوە و جەختیشلەوەکرایەوە، "ئەو جینۆسایدە لە دژی هەموو مرۆڤایەتی ئەنجام دراوە".

لە چالاکییەکەدا ناڕەزایەتی بەرامبەر بە هێرشە بەردەوامەکانی دەوڵەتی تورک و بێدەنگی دەوڵەتانی ڕۆژئاوایی نیشاندرا و داوا کرا کە دادگای نێونەتەوەیی بۆ لێپرسینەوە لەو هێزانە دابمەزرێن، کە بەشدارییان لە کۆمەڵکوژیی ٣ی ئابی ٢٠١٤دا کردووە.

هاوکات چالاکوانان داوایان کرد، ڕووداوەکانی کۆمەڵکوژی ساڵی ٢٠١٤ بە جینۆساید بناسرێن و ڕایانگەیاند، "ئێمە دادپەروەری و یەکسانی و ئازادیمان بۆ هەموو گەلانی ستەملێکراو و بندەست بەتایبەتی کۆمەڵگەی ئێزدی دەوێت".

خێمەی وشیارکردنەوەکە ڕۆژی پێنجشەممە لە کاتژمێر ١٦:٠٠ تا ٢٠:٠٠ کراوە بوو.

ژ.ن