بە بۆنەی ساڵیادی کۆمەڵکوژی ٢٤ی کانونی یەکەمی مەرەش و کۆمەڵکوژی ٢٨ی کانونی یەکەمی رۆبۆسکی، لە ناوەندی کۆمەڵەی دیموکراتیکی کورد لە لەندەن پانێلێک بە ناونیشانی 'لە مەرەشەوە تا رۆبۆسکی، لە زیندانەکانەوە تا رۆژئاوا' سازکرا.
لە لەندەنی پایتەختی بەریتانیا بەبۆنەی ساڵیادی کۆمەڵکوژی ٢٤ی کانونی یەکەمی مەرەش، کۆمەڵکوژی ٢٨ی کانونی یەکەمی رۆبۆسکی، کۆمەڵکوژی ١٩ی کانونی یەکەمی زیندانەکان، لە ناوەندی کۆمەڵەی دیموکراتیکی کورد یادکردنەوە و پانێلێک سازکرا.
لە یادەکەدا کە ژمارەیەکی زۆر تیایدا بەشداربوون، بەڵگەفیلمێک لەسەر کۆمەڵکوژییەکان لە کوردستان نمایش کرا و دواتر دەست بە پانێلەکە کرا.
سەرۆکی دامەزرێنەری فیدراسیۆنی عەلەویەکانی بەریتانیا ئیسرافیل ئەربیل، نوێنەری فیدراسیۆنی کۆمەڵەکانی مەرەش لە ئەوروپا سەلمان ئۆکمەن و لە رێگەی سکایپیشەوە وتەبێژی پەیوەندییەکانی دەرەوە پەیەدە ساڵح موسلیم بەشداری پانێلەکە بوون.
لە پانێلەکەدا سەلمان ئۆکمەن داوای کرد کە پێویستە کۆمەڵکوژی مەرەش لە سەر ئاستی نێونەتەوەیی بە فەرمی بناسرێت و بۆ بەرەنگاربوونوەی کۆمەڵکوژییەکان لە کوردستان باسی لە گرنگی یەکڕیزی و بەرخودان کرد.
لای خۆیەوە ساڵح موسلیم هێرشە قڕکارییەکانی سەر باکور و رۆژهەڵاتی سوریای هەڵسەنگاند و ئاماژەی بە بەردەوامی هێرشەکانی دەوڵەتی تورک کرد و ئەوەی خستەڕوو کە دۆخی کۆبانێ هەستیارە و وتی، "کۆبانێ هێمایەکی نێونەتەوەییە، بۆ پاراستنی مەدەنییەکان لە هەرێمەکە دەبێت پشتیوانی نێونەتەوەیی زیاتر بکرێت." ساڵح موسلیم ئەوەشی خستەڕوو کە لە ٢٠١٨دا زیاتر لە ١٢٠ هەزار کەس ناچاربوون لە عەفرین کۆچبەر بن و رایگەیاند، کە هەڕەشە لەسەر کوردانی عەلەوی هەیە.
موسلیم باسی لەوەشکرد کە ئەو گروپانەی ناوی سوپای نەتەوەیی سوریایان لە خۆیان ناوە پاشماوەی داعشن و بە تاڵان و کۆمەڵکوژی بەناوبانگن. ساڵح موسلیم ئەوەشی خستەڕوو، کە "گەلی کۆبانێ ئامادەیە خۆی بپارێزێت" و داوای زیاتر کردنی پشتیوانییەکانی کرد.
هەر لە پانێلەکەدا ئیسرافیل ئەربیل باسی لەوەکرد کە کۆمەڵکوژیەکانی مەرەش و رۆبۆسکی درێژکراوەی سیستمی دڕندانەی قۆناغێکی مێژوون و وتی، "بۆ ئەوەی جارێکی دیکە کۆمەڵکوژییەکانی وەک مەرەش و رۆبۆسکی روونەدەن، زیاتر لە هەموو کات پێویستیمان بە یەکڕیزیی و تێکۆشانە".
لە پانێلەکەدا ئاماژە بەوەشدرا کە کە ئیسلامی سیاسی بۆ رەوایەتیدان بە کۆمەڵکوژییەکان وەک ئامرازێک بەکاردەهێندرێت.
چالاکییەکان بە پەیام لەسەر یەکێتی و پشتیوانی کۆتایی هات.
