ماوەى ٣ ڕۆژە و لە دواى بانگەوازى ڕێکخراوە کوردستانییەکان بۆ پشتیوانیکردن لە عەفرین و ئیدانەکردنی هێرشەکانى تورکیا و چەتەکان و مەترسیی کۆمەڵکوژکردنى سەدان هەزار هاووڵاتیى عەفرین، کوردان و دۆستەکانیان لە شارە جیاجیاکانی ئەورووپا ڕژاونەتە سەر شەقامەکان و بێدەنگی وڵاتانی ڕۆژئاوایان بەرامبەر بە هێرشەکانی سوپای تورکیای داگیرکەری تورکیایان شەرمەزار کرد.

خۆپیشاندان و چالاکى و ناڕەزایەتى کوردان و دۆستەکانى لە ئەورووپا بەردەوامیى هەیە و لەشەوی ڕابردووە تا ئێستا و لە بەردەوامیى ئەو زنجیرە چالاکییانەدا لە وڵاتانی فەرەنسا، ئەڵمانیا، سوید، ئیتالیا، نرویج، سویسرا، دانیمارک بەلجیکا و هولەندا خۆپیشاندان و ناڕەزایەتى بەڕێوەچوون.

فەرەنسا

کوردستانیان و دۆستەکانیان لە شاری پاریس-ی پایتەختی فەرانسا بە ئامانجی شەرمەزارکردنی هێرشەکانی سوپای داگیرکەری تورکیا بۆسەر کانتۆنی عەفرین و لە هەمانکاتدا بێ دەنگی و بێ هەڵوێستی وڵاتانی ڕۆژئاوایی، لە بەردەم کۆنسوڵخانەی وڵاتی ئەمریکا، لە شاری پاریس کۆبونەوێکیان رێکخست.

 

هاوکات لە شاری مارسەی فەرەنسا، کوردستانیان بۆ هەمان مەبەست چالاکییان ئەنجامدا. هەروەها لە شارەکانی مۆنپۆلییە و ستراسبۆرگ-یش کوردستانیان چالاکیی جەماوەرییان ئەنجامدا.

ئەڵمانیا

لە شاری بەرلین، زیاتر لە ٢ هەرزار کوردستانی بە ڕێپێوانێکی مەزن ڕژانە سەر شەقامەکان وهێرشەکانی سوپای داگیرکەری تورکیا و بێدەنگی وڵاتانی ڕۆژئاواییان شەرمەزارکرد.

 

هاوکات لە شاری فرانکفۆرت-ی ئەڵمانیا بۆ هەمان مەبەست چالاکی ئەنجامدرا و زیاتر لە ٥ هەزار کوردستانى و دۆستەکانیان بۆ پشتیوانى لە عەفرین ڕژانە سەر شەقامەکان.

 

هەروەها لە شارەکانى لیزیگ و هامبورگ چالاکی و خۆپیشاندانى جەماوەرى بۆ پشتیوانى لە بەرخۆدانى سەردەم بەڕێوەچوون.

نەمسا / ئۆتریش

لە شاری ڤییەنا-ی پایتەختی وڵاتی نەمسا/ئۆتریش، کوردستانیان تا درەنگانی شەو لە سەر شەقامەکانی ڤییەنا بۆ شەرمەزار کردنی هێرشەکانی سوپای تورکیا چالاکییان ئەنجامدا.

خۆپیشاندان لە ٧ وڵاتى تر

لە وڵاتانی سوید، ئیتالیا، نرویج، سویسرا، دانیمارک، بەلجیکا و هولەندا بۆ پشتیوانی لە بەرخۆدانی سەردەم-ی عەفرین و شەرمەزارکردنی هێرشەکانی سوپای تورکیای داگیرکەر چالاکی ئەنجام درا.

بەردەوامیى پشتیوانى لە بەرخۆدانى عەفرین

چالاکی و ناڕەزایەتى کوردستانیان بەردەوامیى هەیە و هاوکات لە وڵاتانى قوبرس، یونان، ئەرمینیا و کەنەدا و بەشەکانى ترى کوردستان چەندین چالاکى وخۆپیشاندان بۆ ئیدانەکردنى هێرشى تورکیاى داگیرکەر و چەتەکانى بەرەى نوسرە و داعش بۆ سەر عەفرین بەڕێوەچوون.

ر.م