سەرلەبەیانی ئەمڕۆ پێنجشەممە ۱٥ی ئادار، لە شاری پاریسی پایەتەختی فەڕەنسا، دادگای هەمیشەیی خەڵك (Permanent Peoples Tribunal)، یەکەم دانیشتنی خۆی لەسەر توركیا و كورد بەڕێوە برد.

لە دانیشتنەکەدا، کە بڕیارە ئەمڕۆ و سبەیش بەردەوام بێت، وێرای دەستەی حاکمان، دۆزگەران و پاێزەرانی دادگا، دەیان کەسایەتی لە یاساناس، لێکۆڵەر، مافناس، نوێنەرانی پارت و لایەنی سیاسی و مەدەنی کورد و جیهانی بەشدارن تێیدا.

دادگای هەمیشەیی خەڵك (Permanent Peoples Tribunal)، دەزگایەكی یاسایی و مافی مرۆڤی نێونەتەوەیی ناحكومییە و بەگوێرەی یاساکانی نێودوڵەتی بڕیار لە سەر کەیس و سکاڵاکان لە دادگایکی بێلایەندا دەدات.

دادگاکە، ساڵی ١٩٧٩ کرستیانی سەدەی ڕابردوو دامەزراوە و تا ئێستا دانیشتنی بۆ 44 كەیس و سکاڵا كردووە. دانیشتنی ئەمجارەشی تایبەتە بە دوو مژاری سەرەکی بۆ دادگاییکردنی تورکیا کە بریتین لە : 
یەکەم ـ تاوانەکانی جەنگ کە لەلایەن دەوڵەتی توركیاوە دژی كورد بە تایبەت لە ناوچەكانی جەزیرە، سوری ئەمەد و شیرناخ لە نێوان ساڵی (2015تا 2017)دا، ئەنجام دراون.

دووەم ـ تەرۆرکردن و كوشتنی نوێنەران  چالاکانی كوردە لە دەرەوە و ناوەوەی توركیا.

شایانی باسە، دانیشتنی ئەمڕۆی دادگاکە لە پاریس،  لەسەر پێشنیازی چەندیا دامەزراوەی بەناوبانگی مافی مرۆڤی جیهان و  ئینستیتۆی كورد لە برۆكسل، بەپشتیوانی کۆنگرەی نەتەوەیی کوردستان کەنەکە و چەندین یاساناسی کورد و بیانی بەڕێوە دەبرێت.
بەگوێرەی قسەی،بەرپرسانی دادگاکە، ئەنجامی دانیشتنەكە لە پاش دوو مانگی دیکە لە پەرلەمانی ئەوروپی ڕادەگەیەنرێت.

هـ.هـ