سلێمان ئەحمەڎ هەواڵسازوو بەشو عەرەبی ئاژانسوو (رۆژنیوزی) ڕۊو ١و تشرینوو یووەم و ٢٠٢٣ پەی سەردای و دیڎاری چنی بنەیانەکەیش لووابۍ پەی گەڕەکەو شێخ مەقسودی جە حەڵەب. سلێمان ڕۊو ٢٥و تشرینی یووەمی وەختۍ گەرەکش بۍ جە دەروازەو پێشخابوریوە گێڵۊوە پەی پانیشتوو کوردسانی، جە تەرەفوو هێزەکاو پەدەکەیۆ بڕفانیا و دماو زیاتەر جە ٧ مانگا پاڕێزنەرەکێش تاواشا چەمشا پنەش گنۆ.ئا رۆنامەنوویسە ماوەو ٢٤٦ ڕووان ئینا زیڼانوو پەدەکەینە و ئازاڎ مەکریۆ.

یاگۍ ئاماژەینە دماو حەفتێوە جە سەرنگومکەردەی سلێمان ئەحمەڎیی، ئاسایشوو پەدەکەی جە دهۆک بە ئەرەیاۋنێوە دڎانش پانەیرە نیا کە ئا رۆنامەوانەشە بڕفانان و جە هەمان وەختەنە بە بانگەشەو ئانەی 'سلێمان ئەحمەڎ بەمەڵامەتوو کاری رۆنامەوانیوە نەگیریان' هەڕەشۍ سەپناو سزای قورسێش چا رۆنامەوانەیە کەردە. ئینەیچ جە وەختێنە سلێمان ئەحمەڎ ماوەو ٥ ساڵا بۍ جە بەشوو عەرەبی ئاژانسوو رۆژنیوزینە هەرمانە کەرۍ.

دماجار و دماو ۋییەرنای زیاتەر جە حۆت مانگا، چێروو فشارو رۆنامەوانا، سەندیکا و رێکوزیاکا سەروو ئاستوو دلێینەی و بەری، ڕۊو ٢٢ۍ ئایاری ڕا بە پاڕێزنەراش دریا جە زیندانوو ئاسایشوو دهۆکینە پەی ئەوەڵجاری چەمشا پا رۆنامەنوویسەیە گنۆ.

چا بارۆ بەشدار حەسەن، یۆ جە تیموو پارێزنەرا سلێمان ئەحمەڎیی، ئەرەیاۋنابێش: دماو وینایش ڕا دریا کە بیمۍ بە پارێزنەرێش و حەرپاسە پەی ماوەو دووۍ دەیەقا بە تەلەفۆن قسېش چنی بنەیانەکەیش کەردۍ.

حەرپاسە واتیچش: سلێمان ئەحمەڎ، جە ئیساتێنە بەپاو مادەو (١)ی جە یاساو ژمارە ٢١و ساڵەو ٢٠٠٣ۍ پەرلەمانوو هەرێموو کورڎەسانی تۆمەتبار کریان کە تایبەتا بە تێکدای ئاسایشی نیشتمانیی، جە ئاینڎەنە کۊسشەکاما چڕۍ مکەرمێوە، پەی ئانەی ئازاڎ بکریۆ، ئێمە گەشوینێنمۍ کە مزانی ئازاڎکەردەیش مڎەیمۍ، چونکی بە قسۍ ۋێش هیچ تۆمەتێوەش سەرەرە ساغ نەبیەنۆ و جە ۋنەپەرسایۆکایچەنە، بەرکۊتەن کە بە شێوێوە ڕەسمی لوان پەی ۋەرنیشتوو کورڎەسانی و گێڵانۆ و مافوو مەنەیۊیش هەن.

جە دیڎارەکەنە، سلێمان ئەحمەڎ، جە ڕاو پارێزنەراشۆ تەنیا داواکاریش ئانەبۍ، کە فشارەکا بەردەوامی پنە بڎا تا ئازاڎ بکریۆ.

جە ماوەی ۋییەردەنە، دادگاو تاوانەکا دهۆکی ڕۊو ٣٠ حوزەیرانیش پېسە ڕۊو ئەرەنیشتەو تایبەتی بە دادگاییکەردەی سلێمان ئەحمەڎیی دەسنیشان کەرد.

بڕفانای و گێرتەی ڕۆنامەنوویس سلێمان ئەحمەڎیی ئینا چوارچێوەو کۊششەکا پەدەکەینە پەی سەرکوتکەردەی ئازاڎیی رۆنامەگەری و ئازاڎیی ڕابەربڕیەی کە ماوەو نزیکەو چوار ساڵا چڕش کەردەنۆ و بەدەیان رەخنەگیرۍ، چالاکۍ و ڕۆنامەنوویسێش ڕەوانەو زیڼانی کەردێنۍ.

ئا کردەوۍ پەدەکەی سەرو ئاستوو دلېینەی و بەری کاروەدای و ناڕەزایەتی تنش شۊنەو ۋێشەرە ئاورڎەن.