جە ٤و نیسانی ساڵیادو جەئەدابییەی ڕابەر ئاپۆ-ی نزیکێ مەبێمێوە و بە ئا بۆنەوە ١٠ لایەنێ سیاسیێ پانیشت و وەرکەوتو کوردستانی بە ئەرەیاونایێوی هامبەش وازیارێ ئازادی جەستەیی ئا ڕابەرەیەنێ.

ئارۆ جە شارو سلێمانی سەر بە پانیشتو کوردستانی، ١٠ لایەنێ سیاسیێ ئا بەشەو وڵاتی و وەرکەوتو کوردستانی جە بارەگاو حزبو زەحمەتکێشانو کوردستانی کۆبیێوە. ئامانج جە کۆبییەکەی، ئازادی ڕابەر ئۆجالان-ی و گرنگی ئا ڕابەریە بێ جە پرۆسەو ئاشتی و چارەسەری مەسەلێ کوردی و سەقامگیری و ئارامی هەرێمەکەی بێ و شۆنیشەرە سەرجەم لانەکێ کۆنگرەی ڕۆچنامەوانیشان بەست و سەبارەت بە ئاژەکەی بە ئەرەیاونایێوی هامبەش دا و جە میانشەنە داواشان کەرد بێشەرت و مەرج ڕابەر ئاپۆ ئازاد بکریۆنە.
جە سەرەتاو کۆنگرە ڕۆچنامەوانیەکەیەنە شۆڕش خدر، ئەندام جە کۆمیتەو ئازادیی ئۆجالان-ی قسێش کەردێ و واتش: بەدەسوەڵیوستەی کۆمیتەو ئازادیی ئۆجالان-ی یاداشتێومان دابە لایەن سیاسسییەکان کە جە میانشەنە وازیارێ پشتیوانی پەی ئازادی رابەر ئاپۆ-ی بێنمێ. جە یاداشتەکەنە ڕۆشنمان کەردەوە کە مەسەلێ ئازادی ئۆجالان-ی مەسلێوە کەسییە یان پارتیێوی نییەنە، بەڵکو مەسەلێوە نەتەوەییەنە. وەشبەختانە و بە سپاسەوە بەشی گەورە جە لایەنە سیاسییەکان پێشوازی گەرمشان جە یاداشتەکەیمان کەرد و بە پنەوازشان زانا تا پێوەرە یەک دەنگ و هامهەڵوێستێ بێمێ.
دماتەر ئەحمەد خدر، ئەندام جە حزبو زەحمەتکێشانو کوردستانی ئەرەیاونای هامبەشو لایەنەکانش واناوە کە جە میانشەنە ئامان:
٢٣ ساڵێ ویەردێنە بەڕێز ئۆجالان جە دژوارتەرین بارودۆخەنە زیندانی کریان و ژیاش بەردەن سەر. بە چندین شێوازێ ئەشکەنجە دریان و گۆشەگیری تند سەرشەرە سەپیان. ڕاپۆرتەکێ "کۆمیتەو وەرگێرتەی جە ئەشکەنجەی سەر بە کۆنسەو ئەوروپا"ی "سی پی تی" ئا ڕاستییەیە دووپات مکەرانێوە و ئاشکراش مکرانێ کە بارودۆخێوی نائاسایی جە زیندانو ئیمراڵی-یەنە. هەرپاسە کۆنسەو ئەوروپای جە ئا بارەوە داواو ڕۆشن کەردەیش جە تورکیای کەردەن.

هەر جە ئەرەیاونا هامبەشەکەنە ئا ١٠ لایەنە سیاسیێ سورێنێ سەرو ئانەی کە کۆشای ڕابەر ئۆجالانی و جمیەرو ئازادیوازو پەکەکە-ی جە بنچینەنە کۆشایێن پەی وەرگیری و وێپارێزنای ڕەوای و چارەسەری مەسەلێ کوردی. بەڕێز ئۆجالان جە 30 ساڵێ ویەردێنە جە ئا چوارچوەنە چندین جارێ پرۆژە چارەسەرێش وستێنێ ڕووە و خەموەرانە هەوڵش پەی ئاشتی و دمایی ئاوردەی بە جەنگی و تندوتیژیدان. بەڵام دەوڵەتو تورکی جیاتی وەڵامدایێوی ئەرێنی، تینیش بە گۆشەگیری جە ئیمرالی دان و سەرجەم مافە ئینسانیێ و قانونیەکێش پاشێلێ کرینێنی. هامزەمان جەنگی سەرتاسەری و سەراپاگیری سەختش سەپنان سەرو کوردی و جمیەرە ئازادییەکەیشەرە و سیاسەتو نکۆڵی، قڕکەردەی، کۆچبەری و پارچەکەردەی کورد و کوردستانیش گێرتەنوەر.

هەر پۆکەی ئێمە چوون ١٠ لایەنێ سیاسیێ پانیشت و وەرکەوتوو کوردستانی، بێشەرت و مەرج وازیارێ ئازادی جەستەیی ڕابەر ئاپۆ-یەنمێ و ئادی بە هۆکار و خوڵقنەرو ئاشتی و چارەسەری و ئارامی سەقامگیری جە کوردستان و هەرێمەکەنە مزانمێ و پنەوازەن کە سەرجەم لایەنێ و چینێ گلێرگەی و ئازادیخوازێ پەی یاوای بە ئانەی بە ئەرک و وەرپەرسیاری وێسان هۆبێزانێ.

نامێ ئا ١٠ پارت و لایەنە سیاسیێ پانیشت و وەرکەوتو کوردستانی کە ئیمزا ئەرەیاونا هامبەشەکەیشان کەردەن:

١- حزبو زەحمەتکێشانو کوردستان - لقو سلێمانیێ

٢- حزبو شیوعی کوردستانی

٣- جمیەرو فاڕیای "بزووتنەوەی گۆڕان"

٤- حزبو سۆسیال دیموکراتو کوردستانی

٥- کۆمەڵە، ڕێکوزیا کوردستانو حزبو کۆمۆنیستو ئێرانی

٦- جمیەرو ئازادی گلێرگەو کوردستانی "تەڤگەری ئازادیی کۆمەڵگەی کوردستان"

٧- پارتو ژیاو ئازادی کوردستانی (PJAK)

٨- پارتو ئازادیی و دیموکراسیی ئێزدی  (PADÊ)

٩- پارتو سەوزی کوردستانی

١٠-پارتو پارێزگارانو کوردستانی

جە لاێی تەرەوە ٣١ پارتێ و لایەنێ و ڕێکوزیێ وەرنیشت "ڕۆژڤا" کوردستانی و سەرنیشت و وەرکەوتو سوریای بەهەمان مەبەست کۆبێوە و هەمان داواکاریشان پەی ئازادیی جەستەیی ڕابەر ئۆجالانی بە ئەرەیانایێوی هامبەش پەی راو گردیی ئاشکرا کەرد. هاموەخت بە تندی گەلەکۆمەی میاندەوڵەتی و هێزە بەشداربییەکیشان شەرمەزارێ کەردێ کە بیێ بە هۆکارو دەستگیرکەردەی و زیندانیکەردەی ڕابەر ئاپۆی. 
جە ئەرەیاوناکەیەنە ئاماژە بە ڕاپۆرتەکێ سی پی تی و کۆنسەو ئەوروپای سەبارەت بە گۆشەگیری ئیمرالی دریا و داوا جە کۆنسە و یەکێتیی ئەوروپای و لایەنە پەیوەندیدارەکان کریا، زیاتەر زانیاریێ سەبارەت بە ڕابەر ئاپۆی ولاوێ بکەرانێوە و دژ بە پاشێلکارییەکانو تورکیا جە ئیمرالی بمدرانێوە.
دەسنیشانیچشان کەرد: کۆشای ڕابەر ئاپۆ-ی پەی ئازادی، چارەسەری، ئاشتی و پێوەرە ژیایەن و کۆشاییێ ڕەوان و تا ڕابەر ئاپۆ وەرچەم نەگێریۆنە ئاشتی و چارەسەری جە کوردستان و هەرێمەکەنە ئاستەمەن. هەر پەوکەی گرنگەن جە زووتەرین وەختەنە ئازاد بکریۆنە.

نامێ ئا ٣١ پارتێ و لایەنێ و ڕێکوزیێ وەرنیشت "ڕۆژڤا" کوردستانی و سەرنیشت و وەرکەوتو سوریای کە ئیمزا ئازادیی جەستەیی ڕابەر ئاپۆ-یشان کەردەن:

پارتو چەپی جە سوریا
تەوژمەو سەربەوێ کوردستانی
پارتو ئاشتی و دیموکراتیی کوردستانی
جمیەر چاکسازی سوریا
پارتو فاڕیای دیموکراتی کوردستانی
پارتو سەوزو کوردستانی
پارتو کارو کوردستانی
پارتو یۆگێرتەی دیموکراتی کوردی جە سوریا
جمیەرو نوژەنی کوردستانی
پارتو دیموکراتو کوردستانی- "ئەلپارتی"
پارتو وفاقو دیموکراتی کوردی جە سوریا
پارتو گلێرگەی نیشتمانیی کوردستانی
پارتو برایەتیی کوردستانی
یەکێتیی لیبراڵو کوردستانی
پارتو یەکێتیی نێشتمانیی ئازادی
پارتو نوگەری و دیموکراتی سوریای
حزبو شیوعی کوردستانی- "ڕۆژاڤا"
ئەلپارتی دیموکراتی کوردستانی- سوریا
پارتو دیموکراتو کوردستانی- "ڕۆژاڤا"
پارتو یەکێتیی دیموکراتی
پارتو دیموکراتی کوردی- سوریا
دەستەو نیشتمانیی عەرەبی
پارتو پارێزگارانی
پارتو چەپی دیموکراتی کوردی
کۆنگرەو ستاری
پارتو سوریاو ئایندەی
پارتو یەکێتیی سریانی 
پارتو دیموکراتو وەڵکەوتەی کوردی
پارتو ڕۆچو دیموکراتی کوردی جە سوریا 
پارتو کۆشای دیموکراتی
پارتو کۆماری کوردستانی