هامسەرۊکیی گردینوو هەدەپی تولای هاتیمۊگولاری، وەرڎەموو گەملیکینە ئەرەیاوناێوەش دا و واتش:"بەیدۍ با پێوە گۊشەگیری ئیمرالی ورگێرمۍ، با پێوە ئازاڎیی جەستەیی بەڕێز ئۊجالانی مسۊگەر کەرمۍ."
'ڕاپیمای ئازاڎی'ی کە پەی مسۊگەرکەرڎەی ئازاڎیی جەستەیی ڕابەروو گەلوو کوردی عەبدوڵڵا ئۊجالان و چارەسەری سیاسیی پەرسەو کورد دەسش پەنە کەرد، سەرەڕاو وەربەسەکا بەرڎەوامییش هەن.
بە سەدان سەیارۍ لاو پۊلیسیوە جە خاڵە جیاوازەکانە ئەرەمردیێنۍ و هامسەرۊکەی گردینەو هەدەپی تولای هاتیمۊگولارییە و جەماوەرێوە فرە دلێشانە پەرلەمانتارێنۍ ڕاو ئۊرهانگازیشا بە دووریی ٢٠ کیلۊمەترا جە گەملیکیوە ئەرەیاونایشا دا.
'ئەگەر گۊشەگیری ورنەگیریۊ، گەل دۊڕیۊ'
تولا هاتیمۊگولارییە واتش:"ئێمە ئارۊ ئینایمۍ چێگە تا داواکارییەکەما پەی لوای پەی ئیمرالی ئەوەخوای کەرمێوە، چند ڕوێن جەماوەر، شۊڕشگێڵنۍ، دیموکرات و وەڵاتپارێزنۍ چوارلاو تورکیایوە و کوردستانۊ پەشتیوانیی جە چالاکییەکاو گەلوو کوردی کەرا، پەی ورگێرتەی گۊشەگیری ئیمرالینە و مسۊگەرکەرڎەی ئازاڎیی جەستەیی بەڕێز ئۊجالانی داوا وەنەو ڕای گردینی و دنیۍ کەرمۍ.
هیزی ئامەد، چوکورۊڤا، سەرحەد و چوارلاو تورکیای و کوردستاننە چالاکیما کەرد. هیزیوە پۊلیس و ئاسایش کەوتێنۍ ئامادەباشییوە، گردیاگێوە حەوڵۍ مدا ڕاما وەنە گێرا. هیزی فرەو هامڕایاما گیریۍ و هجوومی جەستەییشا کریا سەر. ئارۊیچ هامڕێما ئەگەوە و ئزمیرۊ ئامۍ و مردنیۍ و دەسبەسەرۍ کریۍ و ئەستەنبوڵێچنە هەمان چێو، ئیساتۍ چوارلاو تورکیایۊ خەڵک گەرەکشانە بەیا پەی وۍ، ئێمە ڕووبەڕووۍ فشاری و قۊرتە قورساو هێزە ئەمنییەکا بیێنمێوە. ئا سیستمە کە گۊشەگیرییش ئیمرالیینە ئەرەمەرزنان، بە هەمان چەمکوو گۊشەگیری، ڕاگێری وەنەوهێزە دیموکراسییەکاو بەروو وەڵاتیچ کەرۊ. مشۊم ئانە بزانییۊ، کە ئیرادەو گەلی ئینا چێگە. ئەوەڵ گەلوو کوردی و گەلاو تورکیای و وەرکەوتوو دلیڕاسەی ئینۍ چێگە. ئیرادەو گەلی ماچۊ: با پەرسەو کوردی بە ڕێبازی دیموکراتیک و ئاشتییانە چارەسەرە کریۊ.'
تا کێشەو کوردی چارەسەر نەکریۊ، هیچ دەرفەتێوە جە دۊخێوە دیموکراسیینە پەی گەلوو تورکیای مەمەنۊ. تا جەنگوو وەرکەوتوو دلیراسەی دماییش پەنە بۍ، تا پەرسەو کوردی دەمودەس چارەسەرە بۊ، تا گەلوو کوردی وەرنیشتەنە داراو کیانوو وێش بۊ و داواکام بەروزمۍ، تا پەرسەو کوردی بە ئاشتییانە و دیموکراتیک تورکیانە چارەسەرە نەکریۊ، ئێمە پێسە گەلاو تورکیای بیمۍ قوربانیی سیاسەتوو جەنگی و جیاکاری.
چێگەوە واوەی ماچمێ:" بەیدۍ با کۊشیای سەروو چارەسەری ئاشتیانەی پەی ئی پەرسۍ کەرمۍ، با گۊشەگیری ئیمرالیینە ورگێرمۍ. با پێوە هەرمانە کەرمۍ پەی ئازاڎیی جەستەیی بەڕێز ئۊجالانی. چێوە درێژە بە ڕاپیمایەکا مدەیمۍ. پێویسا هێزە دیموکراتیکەکاو تورکیای و میاننەتەوەییەکۍ بەیا جە چارەسەرکەرڎەی ئی پەرسێنە بەشداری کەرا. بە گەلوو تورکیای و کوردستانی ئەرەیاونمێش:"ڕاپیمایەکەیما بەرڎەوام بۊ."
