هامسەرۊکی گردینوو پارتوو یەکسانی و دیموکراسیی گەلا (هەدەپ)ی، تونجەر باقرخان و شاندێوە یاوەرش یاوۍ ئێلح، لاو هاموەڵاتاوە خێرامای کریۍ، پانکارتۍ پێسە "گۊشەگیری ورگێرە، فاشیزمی ورشانۊ" و "بە گەنجی دەسما پەنە کەرد، بە گەنجی سەرۍ گنمێ" بەرزۍ کریێوە.

باقرخان ئەوەخوایش کەرڎۊ، بە قۊناغێوە سەخترە ویەرمۍ، ئا زیهنیەتە کە ماچۊ با فەڵستیننە خەڵکی بێتاوان نەکوشیۊ، وەرنیشتنە کورد کوشیۊ و بۊردومان کریۊ. ئانۍ داواو ئاشتیی پەی فەڵەستینی کەرا، جەنگ وەراوەروو  کورڎاو وەرنیشتی کەرا.  

باقرخان ئاماژەش پانەیە کەرد، گەرەکمانە هاگاداری جە چاند و زوانوو وێما کەرمۍ، هاگاداری جە ئیرادەو وێما کەرمۍ. ئیتر وەختوو دماییئارڎەین بە قەیومەکا، واتش: " ئی سیستم و قەیومۍ دژایەتیی ناوەندوو چاندوو جەلادەت بەدرخانی و پەیکەروو ئەحمەد خانیی کەرا. گەرەکشانە بە دەسوو قەیومەکا ئێمە کەرا بە تورکۍ، وەلۍ ئێمە تورکۍ نیەنمۍ و کورڎێنمۍ. گردوو بەهایەکاو خەڵکوو ئێلحی و ئامەدی تاڵانۍ کریێنۍ. بستێوە زەمینشا پەی  شارەوانی ناستێنێوە، گردشا ورەتۍ و وارڎۍ."

باقرخان واتش، پەرسەو کوردی سەدەی یەکەموو کۊمارینە، چارەسەرە نەکریا، گەرەکشانە سەدەو دووەمی بۊ بە سەدەو دیموکراتیکبییەی و چارەسەروو پەرسەو کوردی، واتش: "ئەگەر گەرەکتانە پەرسەو کوردی چارەسەرە کەرڎۍ، ئانە ئاسانا، گەلوو کوردی بەڕێز ئۊجالانی پێسە موخاتەبی موینۊ و ئیساتۍ ئینا زیندانوو ئیمراڵیینە. ڕا و نامونیشانوو چارەسەروو پەرسەو کوردی دیارەنە. ئێمە جە پرۊسەو چارەسەرینە دیما بەڕێز ئۊجالان هەرچی جەدەس ئاما کەردش. جیای ئانەیە گفتوگۊش چەنی کەرڎۍ و چارەسەروو پەرسەکۍ کەرڎۍ، گۊشەگیریی تندتەر کەرڎێوە. یاگۍ ئانەینە فرسەتش دیدۍ، ئی گۊشەگیرییە چێشا؟ گەرەکشانە گردوو گەنجاو کوردی و گەلوو کوردی گۊشەگیر کەرا و گەنجا ئالوودۍ ماددەی هۊشبەری کەرا. ئی سیستمە گەرەکشا جوگرافیاو کوردستانی بەگردی تاڵان کەرۊ. بەڕێز عەبدوڵڵا ئۊجالان، کە ئموهەندیسوو چارەسەرین و گردوو زیندانییەکا ئازادۍ کەرمێ".

ئاخرۊ، باقرخان داواش جە خەڵکوو ئێلحی کەرڎە، بە ڕۊحی سەفەربەریوە خەباتوو ورچنیەیە وێمانەکا کەرا و وێشا ڕێک وزا، قۊناغوو دماتەری بە مدرامان و کۊشیای و ڕێکوستەی وزا ڕا.