ڕاپیمای ئازاڎیی کە بە سەرمەشقی کۆنگرەو گلېرگەو دیموکراتی (کەجەدە)ی، جمیەروو ژەناو ئازاڎی (تەژەئا)ی، پارتوو هەڕێمه دیموکراتییەکا (دەبەپە)ی، فیدراسیۆنوو جەمە یاساییەکا و پەشتیوانی جە بنەیانەو زینڎانیا و سزادریایا، جەمەو هامکاری، پەشتیوانی، یۊگېرتەی و کولتووری چنی بنەیانەو کەسوکاروو گومبیەکا جە شارستانیەتی قەڎیمەنە (MEBYA-DER) و پارتوو یەکسانی و دیموکراسی گەلا هەدەپی جە قەزاو گەملیکی بورسای دەسش پنەکەرڎ و ئارۊیچ بەردەوامیش هەن.

ڕاپیماکەی بە داواو ئازاڎیی جەستەیی ڕابەروو گەلوو کوردی عەبدوڵا ئۆجالانی و چارەسەری پرسوو کوردی ملۊڕاوە. باڵوو ڕاپیمای ئەنقەرەی کۊتەن ڕا. جەماوەرێوە فرە جە ناوەنڎوو ڕێکوستەی هەدەپینە جە ئەنقەرە کوۍ بیېوە. پۆلیس ئا پاسېشە مردنېنۍ کە هاموڵاتیۍ سوارشا بیېنۍ.

پا مەڵامەتۊ هاموڵاتیەکۍ بە ترۊمبېلەکاشا کۊتۍ ڕا. وەڵۍ لوایشانە پەرلەمانتاروو هەدەپوو جۆلەمێرگی ئۆنور دوشونمەزە وتارێوەش پێشکەش کەرڎە و واتش:"وەربەسەکۍ فرېنۍ بەڵام حەرچېوۍ ڕووەبڎۊ ملمۍ گەملیک."

دوشونمەزە واتش:"ئێمە پۍ ئاگاڎار کەرڎەیۊ ڕەئیەو گرڎینی ئینایمۍ چۍ. پېسە گرتا مزاندۍ ئێمە پۍ هۊرگېرتەی گۆشەگیری سەروو ئۆجالانی ملمۍ بەرەو گەملیک. هەرچېوۍ ڕووەبڎۊ ملمۍ گەملیک، گرڎ حۊڵۍ مڎەیمۍ پۍ کەرڎەیۊ بەرەو ئازاڎیی. پۆلیسی ئەمنی کە بە بەهانۍ جیاوازۍ و نایاسایېوە حۊڵوو مردنای ئێمە مڎا؛ گرنگ نییا چن وەربەسېما پۍ منیارە، ئێمە هەم وەربەسەکا و هەمیچ گۆشەگیری هۊرگېرمۍ. ئێمە ئازاڎیی جەستەیی ڕابەرایەتیما بەدەس مارمۍ. پۍ ئانەی دەنگما بەرزتەر بۊ، مشۊم کۊشیایما گەورەتەر کەرمۍ."

دماو ئەرەیاۋناکەی، جەماوەر بەدروشمەو "بژیۋۊ مدرامانوو ئیمراڵی" دماتەر هاموڵاتیەکۍ بە ترۊمبېلە تایبەتەکاشا بەرەو گەملیک کۊتۍ ڕا.