هامسەرۊکوو دەبەپەی، کەسکین بەیاندیر دەسنیشانش کەرد، کە بە مەبەسوو قەوەتکەرڎەی بەشداریکەرڎەی جە 'ڕاپیمای ئازادی'ینە بەرەو گەملیک، ١٢٢ یاگێنە کوۍ بیێنێوە و واتەنش، کە ئی ڕاپیمایە بە ڕاپیماێوە گرنگ مزانا.

هامسەرۊکوو پارتوو هەرێمە دیمۊکراتیکەکا (دەبەپە) کەسکین بەیاندیر پەی ئاژانسوو ئانەفەی قسێش کەرڎۍ و واتش: کۊبییەیوەکەیمانە کە تورکیا و کوردستاننە لوا ڕاوە، فکرە سەرەکیییەکۍ وزیۍ ڕووە، فکری سەرەکیما ئانە بۍ، کە پەی چارەسەری دیمۊکراتیکی و کێشەو کوردی، ڕابەروو گەلوو کوردی عەبدوڵڵا ئۊجالان یەکلاییکەرەوەن و پەی لابەرڎەی گۊشەگیرییەکا مشۊم تێکۊشیاێوە قەوەت کریۊ.  

بەیاندیر دەسنیشانش کەرد، کە ئادۍ جە ١٢٢ یاگانە کوۍ بیێنێوە، پەی قەوەتکەرڎەی بەشداریکەرڎەی جە 'ڕاپیمای ئازادی'ینە بەرەو گەملیک و واتش: "ئی ڕاپیمایە پەی ماڕای گۊشەگیرییەکاو سەروو بەڕێز ئۊجالانی و دەسەبەرکەرڎەی ئازادیی جەستەیی ئۊجالانی، فرە گرنگا. ئینە تەنیا کێشەو گەلوو کوردی نییا. ئی بابەتە کاریگەری سەروو گرد لاێوە وەش کەرۊ. سیستموو ئیمرالی ڕاسیی یاسۍ، دیموکراسی و مافوو ئینسانی تورکیانە ڕۊشن کەرۊوە. سەرچەمەو جەنگوو دلۍ دامودەزگاکاو دەوڵەتی، سەرچەمەو شێویای  دادگای دەستووری و دادگای باڵاو ئیمرالین. هەرکەسێوە تورکیانە داواو یاسۍ، دیموکراسی و مافوو ئینسانی کەرۊ، مشۊم پێسە هەنگامەو  ئەوەڵی پەی ورشانایوە سیستموو ئیمرالی و دەسەبەرکەرڎەی ئازادیی جەسەیی بەڕێز ئۊجالانی کۊشیۊ.

هێزوو چارەسەری و ستراتیژیین

بەیاندیر ئاماژەش بە ئاستی خۊفناک و تارێخیی پەرسەو کوردی کەرڎە و واتش: "ڕاسیی دەوڵەتی و دەسەڵاتداران کە کوردستاننە و تورکیانە جەنگسا دژوو گلێرگێوە ئەرەیاونان، کە داواو یەکسانی و ئازادیی کەرا، ڕژێم گەرەکشا بە فشار، تندوتیژی و جینۊساید واوەی وێش بنیاد بنیۊوە. جەنگ و چارەسەرنەکەرڎەی کێشەکا پەی وێش کەرۊ بە  بنەما. ئینەیچە هۊکاروو پاگێرتەیرەیشانە سەروو گۊشەگیری، قەیرانی ئابووری، سیاسی، کۊمەڵایەتی. عەبدوڵڵا ئۊجالان هێزوو چارەسەری ستراتیژیین. ڕابەرێوە ستراتیژیین پەی گەلا.

ئێمە هەوڵۍ مدەیمۍ ئا گەمارۊ "تەوقدایە" وەڵا کەرمێوە

هامسەرۊکوو دەبەپەی کەسکین بەیاندیر واتش، کە گەلوو کوردی جەنی گردوو گەلە ستەموەنەکریایا بە کۊشیای هەوڵۍ ماڕای گۊشەگیرییەکا و گەمارووەکا مدا و واتش: "ئا ڕاپیمایە  کە بەرەو گەملیک کەرمێش تەنیا ڕاپیمای گەلوو کوردی نییا. ڕاپیمای ئازادیی گردوو ئا گەلانە ستەمشا وەنە کریان، کە قوربانیۍ کرڎەوەکاو ئی دەسەڵاتەینۍ. ئێمە ئی ڕاپیمایە پێسە سەرەتاێوە موینمۍ و داوا جە گرد کەسێوە کەرمۍ کە بەشدارۍ با.