دەسەو ڕاوەبەری ناوەندی دەم پارتی یاڎوو سەرمەشقەکا جمیەری شۆڕشگێڵنی تورکیای دەنیز گەزمیش، حسێن ئینان و یوسف ئاسلانیش بەرز راگێرت کە ٥٢ ساڵۍ چێوەڵتەر گەشمەرڎۍ کریۍ و ئەرەیاۋناش، کە خاوەنداری جە میراسوو ئاڎیشا مکەرمۍ.
دەسەو ناوەندی دەم پارتی ئەرەیاۋناش، "دەنیز گەزمیش، حسێن ئینان و یوسف ئاسلان وەختۍ بەرەو قەنارە بریێنۍ واتشا 'بژیۋۆ واڵەو-برایەتی گەلا کورد و تورک'ی و پەی گرڎوو مرۆڤایەتی و گەلاو تورکیای ژیۋای واڵە و برایانە و شکۆمەنڎیشا پېسە میراسی جیائاست. ئا یەرە شۆڕشگێڵنۍ ٥٢ ساڵۍ چێوەڵتەر بە تاوانێوە سیاسیە تیرۆرۍ کریۍ. دەنیز، ماهیر، مەزڵوم، خەیری و کەمالەکۍ سەروو ئی خاکیۆ بیۍ بە ڕەمزوو فیداییانەو گەلی. هەڵبەت ئانۍ جە دەسما دێنۍ فرە گەورێنۍ، بەڵام وەرم و ئاواتەکێما فرە گەورەتەرۍ بێنۍ.
بێگومان هیچ قوربانیدایۍ بە زایە مەلۆ. دەنیزەکۍ، ماهیرەکۍ، ئیبۆکۍ، مەزڵومەکۍ، کەمالەکۍ و خەیریەکۍ وەرموو 'ژیۋای ئازاڎیی، یەکسانی و پېوەرە ژیۋای ئاشتیانە'یشا بۍ. ئارۆ ئانە بیەن بە ئامانجوو ملوێنان کەسا. سەرمەشقە شۆڕشگێڵنەکېما کە جە کۊشیاینە جە دەسما دێنۍ، ئارۆ جە دڵ و کۊشیای ملوێنان ئینسانانە مژیوا. دەسەڵاتدارا ئینسانە سەرمەشقەکێشا بەردۍ ۋەروودەم و پەتەو قەنارەی و پی جۆرە حۊڵشا دا کە داواکاری گلېرگەی پەی ئاخێزی سەرکوت بکەرا. بەڵام دماو ٥٠ ساڵا داواو گلېرگەی پەی شۆڕشگێڵنی و فاڕیای گەورەتەر بۆ. شۊڵەچراوە و ئازاڎیی کە جە ٦٨ تەنە گیسیانە، هەڵای ڕاو گرڎ کەسێوە کۊششکاری ڕۊشن مکەرۆوە. سەروو ئی خاکەینە کە لانکەو شارستانیەت، زانست و مرۆڤایەتی بیەن، ئا شۆڕشگێڵنۍ و کۊششکارۍ هێزی سەرەشا نەنامنارە و ئارۊیچ بە شێوۍ سەربەرزانە بەرەو ئایندە درێژە بە ڕاپیمایشا مڎا.
بەتایبەتی دەنیز، حسێن و یوسف ئێمە بە رێز و پنەزانایۆ یاڎوو ئا کەسا بەرزڕاگێرمۍ کە پەی ئاخێزی و دیموکراسی ژیۋایشا جە دەسدا و قوربانی گەورەشا دان. ئێمە خاوەنداری جە میراسوو ئاڎیشا مکەرمۍ و پەی وەشکەردەو ژیۋایۍ ئازاڎیی و یەکسانی درێژە بە کۊشیایما مڎەیمۍ. گەلاو تورکیای لایەق بە ژیۋایۍ ئازاڎیی و یەکسانینۍ".
