محەمەد نەسڕەدەین چەمڎاری ڕامیار(سیاسی)، جە چەمپنەکۊتەیۍ تایبەتەنە چنی ئاژانسوو هەواڵوو فوراتی (ANF)ی، سەبارەت بە هرووژمە ئەرەگیریەکا دەوڵەتو ئەرەگیرو تورکیای و هەوڵەکێش پەی زیاتەر ئەرەگیرکەردەی خاکو پانیشتوو کورڎەسانی بەهامکاری پەدەکەی و ناڕەحەتیەکا خەڵکی جە ئەرەگیرکەردەی خاکەکەیشا و چن پەرسێوە پەیوەسدار پا مژاریۆ دوا.

 هرووژمە ئەرەگیریەکۍ دەوڵەتو تورکی جە دەسدای خاکو هەرێموو کورڎەسانیا

 سەبارەت بە ئەرەگیرکەردەی و جە دەسدای خاکو پانیشتوو کورڎەسانی جە لایەنو دەوڵەتو ئەرەگیرو تورکیوە، محەمەد نەسرەدین چەمڎاری ڕامیار، ئاشکراش کەرد: "یۆ جە مەترسییەکا پیلانگێڵنی و هرووژم و ئی جارەو دەوڵەتو ئەرەگیرو تورکی پەی سەرو پانیشتوو کورڎەسانی ئانەنە ئەگەر ئی پرۆسە سەروازییەی تورکیا ئەنجامش مڎۆ سەرکەوتەبۆ ئانە زیاتەر جە ٧٠٪و خاکو پارێزگاو دهۆکی بەتەمامی گنۆ چېرو کۆنترۆڵوو سوپاو دەوڵەتو ئەرەگیرو تورکیوە، ئینەیچ پەی ۋێش مەترسیێوە جدییا دیسان جە دەسدای بەشێوەن جە خاکو هەرێموو کورڎەسانی".

 پەنەوازا لایەنە سیاسییەکۍ پانیشتی هەڵوێسی جدییشا بۆ جە ۋەرا ۋەرو ئەرگیرکاری تورکینە

  سەبارەت بەبێ دەنگی حزب و لایەنە سیاسییەکا پانیشتوو کورڎەسانی جە ۋەرا ۋەرو ئەرەگیریەکا دەوڵەتو تورکینە، ئا چەمڎار ڕامیارە واتش: "موینمۍ حکومەتو هەرێموو کورڎەسانی و پەدەکە فرە بێدەنگېنۍ بەتایبەتی ئی ئەرەگیریەو ئیساتۍ جە سنوورو دەسەڵاتوو حکومەتو هەرێموو کورڎەسانی و پەدەکەینە ئەنجام مڎریۆ، دەوڵەتو ئەرەگیرو تورکی تەنیا جە ماوەو شش مانگوو ئێساڵینە زیاتەر جە ٨٠٠ هرووژما ئاسمانی و زەمینیێش کەردێنۍ سەرو خاکو پانیشتوو کورڎەسانی کە ئینەیچ بە ڕاسی پەنەوازش بە هەڵوێسی جدییا جە لایەنو حزبە سیاسییەکا کورڎەسانی و حکومەتو هەرێموو کورڎەسانیۆ".

 "پەدەکە کۊسپا ۋەردەموو حکومەتو عێراقینە کە دەوڵەتو ئەرەگیرو تورکی بەر بکەرۆ"

 محەمەد نەسڕەدین، سەرنجش وست سەرو هەڵوێسوو پەرلەمانتارا عێراقی دژوو ئەرەگیرکاریەکا دەوڵەتو تورکی و ئاشكراش کەرد: " نەنگی و عەیبێوە گۊرەن دەنگو ئەندام پەرلەمانا دلۍ پەرلەمانو عێراقینە جە بەغڎانە بەرزبۆوە دژوو ئی ئەرەگیریە و لایەنی سیاسی جە هەرێموو کورڎەسانینە تاوانبارۍ بکریا پانەی کە "حکومەتو هەرێموو کورڎەسانی و پەدەکە ڕاگیرێنۍ" چانەی کە عێراق بە هەرمانەو ۋێش پەی بەرکەردەی هێزوو ئەرەگیرو تورکیای و پارېزنای سنورەکا هۊربێزۆ".

 جە ڕیفڕاندۆمەنە بەشێوە جە خاکو کورڎەسانی جە دەسدریا و ئیساتێچ بەشەکەی تەرش ئەرەگیر مکریۆ

 سەبارەت بە فراوان کەردەی بیەو هێزو ئەرەگیرو تورکی جە پانیشتوو کورڎەسانی، محەمەد نەسڕەدین ئاشکراش کەرد: " ئانەی ئیساتۍ ڕووەمڎۆ مەترسیێوە گەورەی جدییا ۋەروو ئانەی بەشێوە گرنگ جە خاکو هەرێموو کورڎەسانی جە دەس مڎریۆ چنی جە قومارو ڕیفراندۆمینە ٥١٪و خاکو پانیشتوو کورڎەسانی جە دەسدریا ئیساتێچ بەشێوە گرنگ جە خاکو پارێزگاو دهۆکی جە دەس مڎەیمۍ، چنی ئانەی ژمارێوە فرە بنکە و بارەگای تازۍ وەش مکەرۆ دەوڵەتو ئەرەگیرو تورکی تەنیا جە دماو ساڵەو ٢٠١٧ یۆ تا ئیساتۍ سەروو ٦٤ بنکە و بارەگێ سەروازیۍ دەوڵەتو ئەرەگیرو تورکی جە مەنتیقە گرنگەکاو پانیشتوو کورڎەسانینە بنیاڎ نیێنۍ، تورکیا پی پرۆسەیچە گەرەکشا ژمارەو ئا بنکەو بارەگا سەروازییا زیاڎ بکەرۆ، ئینەیچ ئەرەگیرکەردەی بەشێوە گرنگو خاکو هەرێموو کوڕڎەسانیا کە ئارۆ جە پارێزگاو دهۆکینە ڕووە مڎۆ، ئی تەرسۍ ئیسە هەنە فراوان بیەی دەسەڵاتو سەروازی تورکیای و زیاتەر ئەرەگیرکەردەی خاکو هەرێموو کورڎەسانیا".

 ئانەی سوپاو تورکی مکەرۆش سووکایەتی کەردەیا بە هاموڵاتیا مەنتیقە ئەرەگیرکریایەکا

 نامبریا باسش جە ئاژەو هاموڵاتیا مەنتیقە ئەرەگیرکریایەکا کەرد و ئەرەیاۋناش: "ئانەی کە یاگۍ پرسیارەو گرڎوو چەمڎارا سیاسی و خەڵکو هەرێموو کورڎەسانیا بێدەنگ بیەی حوکمڕانا و ۋەرپەرسا ڕامیاری ئا مەنتیقەینە جە ئاستوو ئەرەگیریێوەنە کە بەشێوە فرەو شارەکەیش ئەرەگیرکەردەن، ئیساتۍ دەوڵەتو ئەرەگیرو تورکی نوقتۍ وشکنایش نیێنەرەو داواو ئشناسنامەی جە هاموڵاتییا دهۆکی مکەرۆ ئینەیچ جۆرێوەن جە سووکایەتی کەردەی بەهاموڵاتیا، بێدەنگ بیەی ئاستوو ئی ئەرەگیریەینە یاگۍ هەڵوێسەسەرکەردەیا کە پەدەکە ۋێش بە حوکمڕان و دەسەڵاتوو ئا مەنتیقەیە بزانۊ و بێدەنگ بۆ جە ئاستوو ئەرەگیرکەردەی ئا مەنتیقەینە".

 جە ئاکاموو غەڵەتی سیاسی و خیانەتینە خاکو پانیشتی جە دەس مڎەیمۍ

 ئا سیاسەتمەدارەو پانیشتوو کورڎەسانی، واتش: "پەنەوازا لایەنی سیاسی و هاموڵاتیا هەڵوێسشا بۆ سەرو ئی ئەرەگیریە، ڕۆ دماو ڕۆی جە ئاکاموو غەڵەتی سیاسی و خیانەتی سیاسینە وردە وردەی خاکو هەرێموو کورڎەسانی جە دەس مڎەیمۍ پۊکەی ئینە گولانەکەردەیۆ هەرێموو کورڎەسانیا نمەبۆ ئیتر جە ئاستوو جە دەسدای خاکو هەرێموو کورڎەسانینە بێدەنگۍ بیمۍ".

 ئانۍ هامکارۍ ئەرەگیرانۍ چنی جە دەسدای خاکی دمایی بە حزب و دەسەڵاتیشا مۍ

 محەمەد نەسڕەدەین، پەیامێوەش ئاڕاسەو لایەنە سیاسییەکا کورڎەسانی کەرد و واتش: "گرڎوو لایەنە سیاسییەکا چ ئانۍ ئارۆ بێدەنگېنۍ ۋەرا ۋەر بە ئەرەگیری دەوڵەتو تورکی  و چ ئانۍ هامکارێشانۍ گرڎ مشۆم عال بزانا مەنەیۆ ئا لایەنە سیاسیا و قورسایی ئا لایەنە سیاسیا بە خاکو هەرێموو کورڎەسانی و خەڵکەکەیشۆ بەسیان کاتێ تۆ خاکەکەت جە دەسدا و خەڵکەکەت تەسلیموو ئیرادەو ئەرەگیری کەرد مشۊم عال بزانی چارەنوویسوو ئا لایەنە سیاسییەیچە "پەدەکە" دماییئاردەین بە حزب و دەسەڵاتەکەیش، نمەبۆ چېرو هیچ فشارۍ و بەهانێوەنە ڕاوەشکەرۍ بیمۍ پەی ئەرەگیرا و ڕا بڎەیمۍ ئەرەگیر خاکما ئەرەگیر بکەرۆ و سووکایەتی بە هاموڵاتیاما بکەرۆ".

 گرڎوو لایەنە سیاسییەکا پانیشتی زەرەرمەندۍ مبا چی ئەرەگیریەو تورکی

 ئا سیاسەتمەدارەو پانیشتوو کورڎەسانی، ئەرەیاۋنایچش: "هەر لایەنێوە سیاسی پەیلوایش چامنە بۆ کە مەسڵەحەتی سیاسیش هەن چانەینە کە خاکش ئەرەگیر بکریۆ غەڵەت مکەرۆ نەنگی و عەیبەن بجیۆشەنە جە ئەرەگیرکەردەو خاکەکەیشەنە بێ ۋنەپەرسایۆ جە هاموڵاتییا بکەرۆ، جە هەر ئەرەگیری و هرووژمېوە سەروازی پەی سەرو هەرێموو کورڎەسانی گرڎوو لایەنە سیاسییەکا زەرەرمەندێنۍ و هەر لایەنێوە سیاسی پەیلوایش چامنەن کە ئیسفاڎە مکەرۆ ئانە زەرەرمەندی یووەم مبۆ ۋەروئانەی دەسەڵاتی سیاسی و دەسەڵات و وەشەسیایی خەڵکیچ جە دەس مڎۆ".

 ئۆباڵو نەمەنەی قەوارەو هەرێموو کورڎەسانی ئینا ئەستۆو پەدەکەینە

 جە دمادمایی قسەکاشەنە، محەمەد نەسڕەدەین، ئەرەیاۋناش: "هەرێموو کورڎەسانی بە ئاژێوە فرە ناسک و هەستیارەرە موییەرۆنە ئێمە خاکێوە فرەما جە دەس دان و ئابووریما جە دەسدان، ئەرکوو گرڎوو لایەنە سیاسییەکا پانیشتوو کورڎەسانین کە ئا خاکەی مەنەن مشۆم دەسش پۆوە بگێرا و مشۊم هاموڵاتیاما ئاشتۍ بکەرمێوە، بەردەوام بیەی سەرو قوربانیدای بە خاکی و قوربانیدای بە هاموڵاتییا کورڎەسانی ڕەنگە ڕووبەڕوو چارەنویسێوە مەترسیڎاریما بکەرۆوە کە ئاڎیچ نەمەنەی قەوارەو هەرێموو کورڎەسانیا و ئۆباڵەکەیچش ئینا ئەستۆو ئا لایەنانە (پەدەکە) کە ئارۆ ڕا وەشکەرێنۍ پەی ئەرەگیری دەوڵەتو تورکیای".