چی حەفتاو ئاخرینە دەوڵەتوو تورکی ئەرەگیرکەری بە بەردەوامی لەشکرکێشیی تازە مکەرۆ سەروو پانیشتوو کوردستانی. چوارچوەو ئا لەشکرکێشییانە شەوەو شەممەی و یەکشەممەی هێزی سەروازیی زیاتەرش ڕوانەو ئامێدیی کەرد.
بە قسێ هەواڵەکاو ڕۆژ نیوزی، کە زانیارییەکێش جە سەرچەمە هەرێمییەکاوە ورێگێرتێنێ، هیزی شەوێ هێزێوی فرەی سەروازیی دەوڵەتوو تورکی ئەرەگیرکەری یاوێنێ دەگاو گوهەرزێی ئامێدیی سەر بە دهۆکی.
هەمان سەرچەمە ئاشکراش کەردەن کە سەرسەعبوو ئارۆیچ دەوڵەتوو تورکی ئەرەگیرکەری هێزی سەروازییش بە کەلوپەلێوی فرەی سەروازییوە دەگاو گوهەرزێنە نیێنێرە.
هاموەڵاتێوی دەگێکێ بە نامێ شاکریوە بە ڕۆژنیوزیش واتەن: "ئێمە ئینایمێ دۆخێوى خراپەنە و لایەنەکێ بێدەنگێنێ ئاستوو ئی دەسدرێژییاو دەوڵەتوو تورکینە بەتایبەتی حکومەت، پەی ئا مەبەسیچە فرە بەتندی ڕەخنەش وەنە مگێرمێ."
شاکر ئاماژەش پانەیە کەردەن، سەبارەت پا لەشکرکێشییە کە ماوەو ١٥ ڕوان سکاڵاو وێما بەردێنە لاو ئاسایشوو شارەکڵەکەی، بەڵام تا ئیساتێ جوابما نییەن و بێدەنگێنێ، ئەگەر پاسە بلۆ خەڵکوو دەگێکێ مەنتێقەکەی چۆڵ مکەرا.
جە وەختێوەنە ماوەو چندین ڕوان سوپاو تورکی ئەرەگیرکەری بە هەماهەنگیی چەنی پەدەکەی دەگایەکاو شارەکڵەو ئامێدیی سەر بە پارێزگاو دهۆکینە و چند یاگێوی سنووروو هەولێرینە وەڵێ کریێنۆ، بەردەوامیچ سوپای ئەرەگیرکەرەو تورکیچ بۆردومانوو چند یاگێوی پانیشتوو کوردستانی مکەرا و وەراوەرنە حکومەتوو بەغدای و هەولێری بێدەنگێنێ پەی ئا بۆردومان و لەشكرکێشییاو دەوڵەتی ئەرەگیرکەروو تورکی.
هەرپاسە چن ڕوێ چێ وەڵتەر، قسەکەروو یەنەکەی سەعدی ئەحمەد پیرە ئەرەیاوناش، کە دەوڵەتوو تورکی ٣٠٠ چەتێ داعشیش ئاردێنێ سنوورەکاو دهۆکی و مەرزنێنێشەرە.
