نوویسەرێوە میسڕی ئاماژە بە تاوانەو هێزە ئیمپریالیستەکا و دەوڵەت نەتەوە فاشیستەکا گەلاو ۋەرکەوتوو دلېڕاسەی کەرۆ، حەرپاسە ۋیر و ڕامانوو ڕابەر عەبدوڵا ئۆجالانی و فەلسەفە و نەخشەڕاو ڕابەروو گەلا بە نەخشەڕا و ڕاچارەو پشېۋیەکا ۋەرکەوتوو دلېڕاسەی مزانۆ.
نوویسەری میسڕیی، ئیسلام زەیف ئاماژەش پانەی کەرڎ کە فەلسەفەو ڕابەر عەبدوڵا ئۆجالانی نوێنەرایەتی سەرپاکی گەلا کەرۊ و واتش: ئی فەلسەفە جە تەجرووبەو سەرنیشت و ۋەرکەوتوو سووریاینە سەلەمناش کە متاوۆ بۊ بە چارەسەریی پشېوییەکا مەنتیقەکەی.''
نوویسەری میسڕیی، ئیسلام زەیف جە سەرەتاو قسەکاشەنە سڵامش جە مدرامانوو گەلاو سەرنیشت و ۋەرکەوتوو سووریای و مدرامانوو ژەنا کەرڎ ۋەران ۋەر بە هجومە بەردەوامەکا دەوڵەتوو تورکی ئەرەگیرینە.
ئیسلام زەیف ئاماژەش پانەی کەرڎ کە دەوڵەتوو تورکی ئەرەگیری بەمەڵامەتوو بێدەنگیی ڕێکوزیاکا و گلېرگەی میان نەتەوەییوە بەردەوامیی بە هجومەکا ۋېش پۍ سەروو هەرێمەکەی مڎۊ، ئاڎ واتش: ئی بێدەنگییە نیشانۍ ڕازیبیەین بە پاشێلکەرڎەی ئازاڎیی گەلا.''
زەیف داواش جە گەلا ئازاڎیوازی کەرڎ تا پەشتگیریی جە گەلا هەرێمەکەی و گەلوو غەززەی کەرا.
بە پەیلواو نوویسەرێوە پېسە زەیفی، پیلانگێڵنیی میان نەتەوەیی جە ڕوودایەکا ۋەرکەوتوو دلېڕاسەی جیا مەکریۊوە، بەڵکم ئاژەو مەنتیقەکەی دماو دەسپنەکەرڎەو پیلانگێڵییەکەی شرۊڤە کەرۆ، حەرپاسە واتش؛ ئامانج جە پیلانگێڵنیی میان نەتەوەیی و ئەڕفانای ڕابەر عەبدوڵا ئۆجالانی ئەسڕیەیۊ تەڤگەروو ئازاڎیی کوردسانی بۍ.
حەرپاسە ئا نوویسەرە ئاماژەش پانەی کەرڎ کە پڕۆژەو نەتەوەی دیموکراتیکی ڕێبازۍ هەرە گونجیاو ڕزگاریی گەلاو ۋەرکەوتوو دلېڕاسەیا. واتش: ''جیاوازیی تەڤگەروو ئازاڎیی کوردسانی جە ئاخېزەکا تەروو کوردسانی ئانەنە کە تەڤگەروو ئازاڎیی کوردسانی پڕۆژېوە نەتەوەپەرەسانە پێشکەش مەکەرۊ. ئی پڕۆژە سەروو بنەڕەتوو هەمەچەشنیی و نەتەوەی دیموکراتیکی ڕەنگڕێژ بیەن، ئینەیچ خزمەتوو تەماموو گەلا کەرۆ، پڕۆژەو تەڤگەری ئازاڎی کوردسانی پۍ ڕزگارکەرڎەی گەلاو ۋەرکەوتوو دلېڕاسەی بە گرڎی ڕاچارۍ تەمام گونجیان. بەڵام هێزە ئیمپریالیستەکۍ ئی پڕۆژەشا بە هەڕەشۍ پۍ سەروو هەژموونوو ۋېشا زانا، پۊکەی ڕابەر ئاپۊشا بڕفانا تا پڕۆژەکەی دلېنەبەرا.''
زەیف ئاماژەش بە گرنگیدای ڕابەر ئاپۆی بە گەنجا و ژەنا کەرڎ و واتش: ''فەلسەفەو ڕابەرایەتی جە کۊشیای ۋەران ۋەروو داعشی و لەتووپەتکەرڎەی داعشی و ڕووبەڕووبیەیش چنی چەتەکا و سیستمی فاشیزمینە ئەنجامش گېرت.''
ئیسلام زەیفی نوویسەر داواو ئازاڎیی جەستەیی ڕابەر عەبدوڵا ئۆجالانیش کەرڎ و پېسە دمایش بە قسەکاش ئارڎ: ئێمە ۋەرکەوتوو دلېڕاسەینە مژیومۍ کە پەڕا جە گەلا و ئاڵەنگاریی، حەرپاسە هێزە فاشیستیەکۍ پیلانەو ۋېشا چنەشەنە گېڵنا. سەروو ئی بنەمایۍ ئێمە داواو ئازاڎیی ڕابەر عەبدوڵا ئۆجالانی کەرمۍ، سیاسەتوو دەوڵەتوو تورکی ئەرەگیری دژوو ڕابەر عەبدوڵا ئۆجالانی و سەپنای گۆشەگیری ڕەڎ کەرمېوە.''
