بەپاو سەرچەمە هەرێمییەکا چەتەکاو "پۆلیسی سەروازی" دەوڵەتی ئەرەگیرکەروو تورکی، هیزی هاموەڵاتێوەشا بە نامێ عەبدولرەحمان مستەفا (٤٩ ساڵ)ەی، خەڵکوو موباتای گەڕەکەو ئەشرەفیەو عەفرینینە ئڕفانان.

هەمان سەرچەمە واتش، کە مستەفا حەفتێوە چێوەڵتەر تورکیانە بەرکریان و وەختێ یاوان عەفرین یەکسەر ئڕفانیان و هەڵای چارەنویسش نادیارا.

تاوانەکاو دەوڵەتی ئەرەگیرکەروو تورکی و چەتەکاش هەرێمە ئەرەگیرکریایەکانە بەردەواما. چەتەکاو "مونتەسەربیلا"ی هیزی موباتانە سەدان دارێ میوەیشا بڕیێنیوە.

بەپاو سەرچەمەکاو هەرێمەکەی، چەتەکاو "مونتەسەربیلا"ی بە سەرکێشیی چەتێوە بە نامێ عەبدوڵا ئەبو جاسمی، سەدان دارێ زەیتوونێ ئەرەنیشتاو شاروو موباتاو کانتۆنوو عەفرینی و شەهبایشا بڕیێنیوە.

هەمان سەرچەمە واتش، سەرچەتە ئەبو جاسم خەڵکوو حەمایەی، چەنی مامۆزاکەیش دارەکێشا بڕیێنیوە و بەردێنێشا پەی یاگێ وێشا دەگاو عەرەبۆینە و عەرەب حەمشەلاکەی موباتا تا چا بورەشاشا.