٣٣ گێڵیارێ کە ٢٠ و تەمووزو ٢٠١٥  پیرسوسوو ڕحاینە هجوومێوی بۆمبیی داعشینە کوشیێ، جە چند شارێوەنە سەروو قەبرەکاشاوە یادێ کریێوە.

وان

یونس ئەمرە شەن کە کۆکوشییەکەنە مەرد سەروو قەبرەکێشۆ قەبرسانوو کارشیاکاینە ڕاو ئاوریشموو وانینە یاد کریاوە.

هامسەرۆکوو کۆمەڵەو یۆبییەی و چاند و پەشتیوانی و هامکاریی ئا بنەیاو قوربانییاو بێشکێ شارستانییەتی، یوسف دوندار، واتش: "٣٣ هامڕێ ئێمە دژوو جەنگوو کۆبانێ کەوتێ ڕا و مەردێ، بەڵام دوژمن چی هامڕایاو ئێمە تەرسا. ئێمە وەع مدەیمێ سەروو ڕاکێشاوە بەردەوامێ بیمێ".

دماتەر بە سەرمەشقایەتیی پلاتفۆرموو ڕەنج و دیموکراسیی وانی جادەو هونەرینە، ئەرەیاوناێوە ونیاوە، دلێشنە ئەوەخوای کریاوە کۆشیای درێژەش مبۆنە تا ڕۆشنکەردەیوەی کۆکوشییەکەی و بەسزایاونای تاوانبارا.

ئاخروو چالاکییەکەینە درووشموو "گەشمەردێ نمەمرا"ی بەرز کریاوە.

موش

دەنیز ئەرۆڵ و مەدالی باروتچو و سەرحەد دەڤرەم سەروو قەبرەکاشاوە قەبرسانوو تاشۆو موشینە یادێ کریێوە. سەرۆک فراکسیۆنوو دەم پارتی سەزای تەمەلی چالاکییەکەنە واتش: "تا پەیوەندییەکاو پەشتەو کۆکوشییەکەی ئاشکرێ نەکریا، گردوو هامبەشەکاو تاوانەکەی دادگایێی نەکریا و دەوڵەت باجووکەمتەرخەمییەکا نەدۆ، ئێمە شوۆنکەوتێ ئادیشا بیمێ".

دمایی ولی سەروو قەبرەکاوە نریێرە.

جولەمێرگ

سولەیمان ئاکسو سەروو قەبرەکێشۆ قەبرسانوو گەڕەکەو عومرانوو گەڤەروو جولەمێرگینە یاد کریاوە، پارت و ڕێکوزیا و پەرلەمانتارێ و چالاکێ بەشدارێ بێنێ.

یاگەداروو هامسەرۆکی گردینوو دەم پارتی وەزیر چۆشکون پارلاک واتش، ئی ٣٣ کەسە "گەشمەردێ وەرنیشتینێ"، ئاکەپە گەرەکش بێ گەلوو کوردی و گەلاو وەرکەوتوو دلێراسەی بسڕۆوە، بەڵام سەرنەکەوت.

بە نامێ بنەیاکەیشاوە، قودرەت ئاکسو قسێش کەردێ و سوپاسوو ئامادەبییاش کەرد،م ئەداو ئاکسوی واتش تا بکوشێ نەگیریا، کۆشیای بەردەوام مبۆنە.

مێردین

مێردیننەنە موراد یورتگول و عەمروڵا ئاخمور سەروو قەبرەکاشاوە یادێ کریێوە.

پەرلەمانتاروو دەم پارتی کاموران تانهان واتش: "ئادێ گەرەکشابێ یانەقۆڵێ پەی زارۆڵاو کۆبانێ ببەرا، هێزە تاریکەکێ گەرەکشبێ وەرمەکاشا زیندەبەچاڵێ بکەرا، بەڵام ئارۆ بەملوێن گەنجی هامڕێشا پەی وەرمەکاشا مکۆشیانە".

مامۆ و ئەداو موراتی یورتگول قسێشا کەردێ، ئەوەخوایشا کەردۆە موراد گەشمەردەو بنەیانێوی نییەن، بەڵکوم گەشمەردەو گرد لایێوەن.

ئەنقەرە

کۆمەڵەو مافشناسا پەی ئازادیی (ئیهەدە)ی ئەنقەرەنە بە بۆنەو ساڵیادوو کۆکوشیێوە ئەرەیاوناێوەش واناوە.

ئەوەخوای کریاوە، هەڵای دەسوو هێزەکاو پەشتەو هجوومەکەی ئاشکرێ نەکریێنێ.

شەرناخ

بە سەرمەشقایەتی دەم پارتی جزیری، هۆگر ئۆزکان سەروو قەبرەکێشۆ یاد کریاوە.

چالاکییەکەنە ئەوەخوای کریاوە، هەرگیز قوربانییاو کۆکوشییەکەی جەیاد نمەکریانێ و درێژە بە ڕێکێشا مدانە.

ئیستەنبوڵ

دویگو تونا و عیسمەت شەکەر و جەمیل یەڵدز قەبرسانوو گەزیی مەنتێقەو سوڵتانغازیینە یادێ کریێوە.

ئەنداموو لوجنەو ناوەندوو ئەسەپەی، عەدنان ئۆزجان واتش ئادێ پەی یۆبییەی گەلا و هومێد و پەشتیوانیی ڕووەشا کەردە کۆبانێ، دژوو ئا کەسا کە گەرەکشابێ گەلا بدانە گژێ یۆترینیرە.

هامسەرۆکی گردینو ئەسەپەی، ئۆزلەم گوموشتاش واتش، هجوومەکە بە هامکاریی میتی و داعشی کریان.

پۆلەن ئونلو و خەدیجە ئەزگی سەعدەت قەبرستانوو ئیهلامورکویووو عومرانیەینە سەروو قەبرەکاشاوە یادێ کریێوە.

وەتەن بوداک قەبرسانوو کارتالی غازی عوسمان پاشاینە یاد کریاوە. بنەیانەکەش و خەڵكێوە فرە بەشدارێ بێنێ. درووشمێ بەرزێ کریێوە و چند قسێوی پێشکەشێ کریێ.