ده‌سەو ڕاوه‌به‌ریی هه‌ده‌په‌ی، جە ٣٠یه‌مین ساڵیاڎوو كۊكوشیی مادیماكینە، به ڕێزۊ یاڎوو قوربانییاو كۊكوشییه‌كه‌یش كەرڎۊ و ئەرەیاوناش، "پەی ده‌سه‌به‌ربییەی ئاشتی و ئارامی دلۍ گلێرگەینە، وەراوەربییەیۊ چەنی واقیعوو گلێرگەی شه‌رتەنە".
ده‌سەو ڕاوه‌به‌ریی ناوه‌ندوو پارتی دیموكراتوو گه‌لا (هه‌ده‌په)، به بۊنه‌و ٣٠یه‌مین ساڵیاڎوو كۊكوشیی مادیماكیوە، كه ڕۊو ٢ ته‌مووزوو ساڵەو ١٩٩٣ جە هۊتێل مادیماكوو سێواسینە کریا، ئەرەیاوناێوەش وەڵا كەرڎۊ.
دلێشنە ئامان، بۊنەو ئانەیۊ حوكمه‌ت و ده‌وڵه‌ت ده‌سوەرڎایشا هجوومەکەنە نه‌كەرد، فاڕیا پەی كاره‌ساتێوە گه‌ورەی. هه‌ده‌په ئاماژه‌ش پەی ئانەیچە کەرڎەن، سه‌ره‌ڕاو ئانەیە ٣٠ ساڵۍ ملوو كۊکوشییەکەیرە لوان. وەلۍ تا ئیساتێچ ڕۊشن نەکریانۊ ئا کەسە سەرەکیێچە قەراروو کۊکوشییەکەیشا دان دادگایی نەکریێنۍ.
جە به‌شێوە تەروو ئەرەیاوناکەینە ئامان، هه‌ده‌په ئاماژه‌ش پەی ئانەیچە کەرڎەن، دۊسیه‌و مادیماكی پەی ماوه‌و ٣٠ ساڵا شارە و شار گێڵیان، ئانەیچ پەی بنەیانەو قوربانییا بییەن بە ئازارە و بارگرانی. دۊسیه‌كه چنڎین ساڵێن مەنەنۊ. فرەو پارێزنه‌راو دۊسیه‌و كۊکوشیی مادیماكی سه‌روو پارتی ده‌سه‌ڵاتداری بیێنۍ به په‌رله‌مانتارۍ و خه‌ڵاتی كریێنۍ. پەوکای كۊكوشیی مادیماكی پەشتگۊش وزیا و ڕای گردینیچ ئانەیە مزانۊ. ئه‌نجامده‌رەکێش پەی ماوێوە فرەی نەگیریۍ و تۊمه‌تباری ڕەما، جه‌عفه‌ر ئه‌رچاكماك ماوێوە فرەی یاگێنە نزیكوو پارێزگاو سێواسینە وێش شارتۊ و چایچ مەرد. مەرڎەی و نەگێرتەیش گومانیش پەی بۊ پارێزنای ئه‌نجامده‌را به‌قوەتتەر كەرڎە. ماوه‌و ٣٠ ساڵان بکە‌رەکۍ نه‌گیریێنۍ و ئانەیچ جە ویژدانوو ڕای گردیی عه‌له‌وییه‌كانە زامێوە قووڵا.
هه‌ده‌په واتیچشۊ، كۊكوشیی سێواسی تاوانێوە دژه ئینسانین و ماچۊ، مەکریۊ بە بەهانۍ ویەرڎەی وەختیوە دۊسیه‌كۍ وزیۊرە. ئانۍ کە هامبه‌شۍ و هامكارۍ تاوانه‌كەینۍ، ئانێچ کە پارێزنێشا و ئانێچ کە بێدەنگۍ بیۍ وەرپەرسێنۍ کۊکوشییەکەنە. ئەگەر کۊکوشییەکە گردڕوێوە ڕۊشن کریێوە، گێرا ڕا گیریۍ جە کۊکوشییەکاو گازی و عومرانیەی. ده‌سه‌ڵات و ده‌وڵه‌ت پێسە چەنی ڕووبه‌ڕووۍ كۊكوشییه‌كاو مادیماكی و گازی نه‌بیێوە، ئارۊیچ دلۍ ئایینه‌كانە جیاكاری کەرا و ئا کەسۍ ئشناسنامه و ئاییینی جیاوازشا هەن، هارێشا کەرا وەنەو یۊترینی. هامشێوه‌و كۊكوشییه‌كاو كۊچگری، دێرسیم، مه‌ڕه‌ش و چۊرومی، ده‌سه‌ڵات وەرش بە كۊكوشیی مادیماكی نەگێرت. وەروو ئانەیە ئاشتی و ئارامی دلۍ گلێرگەینە ده‌سته‌به‌ر بۊ، پەنەوازییش به پێوه‌رەبییەی هه‌ن. پەی ئانەی جارێوە تەر كۊكوشیی چانە دووباره نەبۊوە، بکەرەکێش گیریا، کۊشیایما سەرەمڕا و بەڕێزۊ یاڎوو تەماموو قوربانییاو مادیماكی کەرمێوه.
س.ز
