هۆرام: قازی مەحەمەد و کۆمارو کوردستانی هێما یۆگێرتەیەنۍ

هۆرام: قازی مەحەمەد و کۆمارو کوردستانی هێما یۆگێرتەیەنۍ

بەبۆنەو ٧٥ مین ساڵرۆ شەهیدکەردەی پێشەوا قازی مەحەمەد سەرۆککۆماو کوردستانی و هاوەڵەکانشەنە بەیاننامێوشدان و جە میانشەنە ئامان:

جە ڕوێ پسەو ئارۆیەنە یو جە ڕابەرە نامدارەکاو نەتەوەکەیما پێشەوا قازی مەحەمەد سەرۆککۆمارو کوردستانی و هاوەڵەکێش جە ٣١-٣-١٩٤٧ی جە لاو دەسەڵاتداراو ئێرانیەوە جەدار دریێ. سەڕەڕاو ئانەیە کە ئی ڕوە پەی نەتەوەو کوردی ، ڕوێ ناوەش و ویرنەکریان، چانەی ناوەشتەر ئانەن کە جە دماو ٧٥ ساڵا کورد بە تایبەت لایەنە سیاسیەکێ نەتاوانشا مووچیاریەکا پێشەوای بارا یاگۍ . پێشەوا قازی وەڵۍ جەداردایش دوێ مووچیاریە بە قیمەتێش پەی نەتەوە کوردی جیا ئاستێ . یۆ ئانە کە تا یۆگێرتەیما نەبۆ ، هەرگیز سەر مەگنمی . دوەم ئانە ، هیچ وەخت داگیرکارێ یاگۍ باوەڕی نیەنێ .
بە پێچەوانەو مووچیاریەکاو قازی مەحەمەدی ، لایەنە سیاسیەکی کوردی جە خرابتەرین ئاژەو سیاسی وێشانە ژیوا . گەر نەیارەکێ کوردستانی تاواشا وەڵاتو کوردا چوار پارچە کەرا، چانەی خراپتەر لایەنە سیاسیەکێ بە تایبەت دەسەڵاتدارێ پانیشتو کوردستانی نەک هە ئانە کۆمەڵگاشا پارچە پارچە کەردەن، هاموەخت پەی هەر چوار پارچەو کوردستانی بە گردیی و پەی جوانا کورردی کە پەی کۆمەڵگای داینەمۆ و هازیەنی، بیێنۍ بە یاگۍ بێباوەڕی و بێهیوایی. جە وەختێنە ٧٥ مین ساڵرۆ شەهیدبیەو قازی مەحەمەدی یاد کەرمێوە کە لایەنێ کوردی پسەو پەدەکەی بە ڕابەری مەسعود بارزانی پەی دلێنەبەردەو دەسکەوتەکاو کوردی شانە بە شانەو دەۆڵەتو تورکیەی هێزی نیزامی وێشا کیانا سەرو بارەگاکاو گەریلای و هێزی دیپلۆماسی وێشا جە بەغداد-ەنە پەی رێککەوتەی چەنی لانە؟نەارەکاو کوردی وستەنگەڕ.

پسە پلاتفۆرمو هۆرام-ی، سەرەڕاو یادکەردەیۆ ٧٥مین ساڵرۆو شەهیدبیەو پێشەوا قازی مەحەمەدی و هاوەڵەکاش، پەی سەروستەو ئاواتەکاو کۆمارو کوردستانی کەوێشا جە یۆگێرتەیی نەتەوەیی و وشککەردەی دەسو داگیرکارا جە کوردستانەنە مەوینانێوە، پەیمان تازە کەرمێوە کە بە ڕیکوستەو گەلەکەیما سەروو ئەساسو باوڕ بە وێبیەی درێژە بە کۆشیای وێما بدەیمێ. هەر پاسە ئا کەس و لایەنا کە پەی قازانجو تاکە کەسی و خانەوادەیی پاڵشا دان نەیارا کوردستانیوە، بە نەیارێ ڕاو و ئامانجەکاو پێشەوای نەمری مزانمێ و بە گرد شێوەوە کەردە نا ئینسانی و نانەتەوەیەکاشا شەرمەزار مکەرمێ.

ڕاوەبەریی پلاتفۆرمو هۆرام-ی