پانیشتوو کورڎەسانی بە ئاژێوە ناهەموارەرە موییەرۆ جە لێوە سڕکەردەی پەڕلەمانی و جە لێوەتەرۆ نەبیەی حکومەتێوە یۆگێرتەی خزمەتگوزاری کە دڵوو هامولاتیا ڕازی بکەرۆ، چەولاتەرۆ ئاردەی سوپاو ئەرەگیری و ئەرەگیرکەردەی بەشێوە فرەو خاکو پانیشتی و نەبیەی کۆدەنگی نیشتیمانی و ئۆپۆزسیۆنێوە کارای ئینۍ گرڎ پنەما ماچا چن سیناریوۍ چەمەڕاو ئاژەی سیاسی و ئەمنی هەرێموو کورڎەسانی مکەرا

سیناریۆی یووەم:

بیەو ملەملانێی سیاسی و گەندەڵیێوە فرەی پاسشەکەرد کە جەمۍ دۆسیەی تایبەتۍ بە ۋەرپەرسا پارتی و بنەیانەو بارزانی جە دادگای فیدڕالی ئەمریکاینە بکریاوە و زیاتەر جە پەنجا کەسا نامێشا جە دۆسییەکانە بۆ و تۆمەتبارۍ بکریا بە گەندەڵی، تیرۆر، چەرمەکەردەیۆ زەڕی، سەرکوتکەردەی ئازاڎیی و مافو مرۆڤی، سیاوبگیری و هامکاری داعشی بە تایبەت جە کەیسو ئێزیدییەکانە و چن مەلەفێوە مەترسیڎارتەرۍ

بە پاو ئا کاتەی پەی دادگاییکەردەکەی نریانەرە مانگەو ٩و ئێساڵی دادگاییکەردەکەی ملۆڕاوە کە کەسە پلەیەک و پلەدووەکۍ دلۍ بنەیانەو بارزانی و پەدەکەیش ئینۍ چنە جگە جە نێچیرڤان بارزانی، جە ئیساتێنە کە گرڎوو زەڕەکەیشا دەسش سەرەرەگیریان جە ئەگەرو ساخبیەیۆ تۆمەتەکانە سەرشارە ڕاسەوخۆ سەردارو حکومەتی ماوە سەرشیەی حەرپاسە سەردارو پارتی سڕۍ مکریا و جە کایەی سیاسی و هۊرگېرتەیۆ دەسەڵاتی دوورۍ وزیاوە، جە ۋەرا ۋەریچەنە جە ئەگەرو بیەی بۆشایی پەڕلەمانی و حکومەتینە دەسەڵاتی ڕەها مڎریۆ بە سەردارو هەرێمی و جارێوەتەر دەسەڵاتە دلێینەییەکۍ کارا مکریاوە حەرچڼە ئەنجومەنو پارێزگاکایچ سەرۍ شیێنۍ بەڵام حەلۍ کاتی مکریا.

سیناریۆی دووەم:

پەدەکە و باڵو مەسرور بارزانی جەنگوو مەنەیۆ مکەرا جە دەسەڵاتەنە و گەرەکشا نیا هۊرچنیەی بکریۆ، چونکی بە ئەنجامدای هۊرچنیەی پەدەکە پەل و پۆ مکریۆ، یاڎیچما نەشۆ کۆنفرانسوو لق و ناوچەکاش شایەتۍ ئا حەقەتینەینۍ و جارێوەتەر پەدەکە نمەتاوۆ ئا ژمارە فرەو ئەنداماشە ئاشتۍ بکەرۆوە و بەشێوە فرە چانیشایچ جە پەدەکەی توریێنۍ ۋێشا هۊرگېرتەن پەی کاتو بانگەشەو هۊرچنیەی و پەدەکەیچ ئانەی عالمزانۆ کە ئی هۊرچنیەیە بە دڵوو ئاڎیی نمەبۆ ئەگەر دووۍ پۆستۍ سیادیۍ جە دەس نەڎۆ دڵنیان چانەی کە یۊیشا جە دەس مڎۆ پۊکەی گەرەکشا قەناعەت بە یۊبیەی نیشتیمانی بکەرۆ کە سەردارو پەڕلەمانی هۊربگێرۆ پەی ئانەی مەسرور بارزانی جە مەنسەبەکەو وێشەنە مەنۆوە و جە ۋەرا ۋەریچەنە یۆبیەی نیشتیمانی گەرەکشا دووۍ پۆستۍ سەرەکیۍ جە پەدەکەی هۊربگېرۆوە بە دەنگو هاموڵاتیا و ئا هامپەیمانیەی دماو هۊرچنیەی وەشش مکەرۆ، ئاژەو خراپو دلێینەو پەدەکەی و هەوڵدای پەی ۋێنزیکەردەیۆ جە هێڵۊو نیشتیمانی جە لایەنو یۆبیەی نیشتیمانیوە هەلوو سەرکۊتەیش پەی زیاڎکەردەن و هەر ئینەیچ پەدەکەش تەرسنان جە هۊرچنیەی.

سیناریۆیی یەرەم:

پیلانەو تورکیای پەی ئەرەگیرکەردەی و ئاوردەی ئا گرڎ هێزە فرەیە پەی سنورو چېر دەسەڵاتو پەدەکەی کە بەشێوە فرەشا چەتۍ داعشی و چەتەکۍ سوریاینۍ و وەشکەردەی ئا لۆبییانە کە خودو مەسعود بارزانی دلۍ کابینەکەو سودانی و کۆمکاری عەرەبینە پەی تورکیایش وەشکەردێنۍ، شانسێوەتەرش دان بە دۆسەکەو بنەیانەو ئەردۆغانی کە بنەیانەو بارزانییا بەنامۍ بیەو جەنگی و ئاژەی ئاڵۆزو مەنتیقەکا دهۆکی و هەولێری هۊرچنیەی ئەنجام نەڎریۆ و ڕەنگە دماتەر بە سەرۆک خێڵو مەنتیقەو بارزانی تورکیا دڵشا ڕازی بکەرۆ چونکی ئامای ئیجارەو تورکیای دڵوو بارزانییەکایچ ئەرەگیر مکەرۆ و ئا دەگا و مەنتیقۍ یاگە نفوزشانە ڕاسەوخۆ جە لایەنو سەروازا تورکیایۆ خێرئامای مکریا.

پۊکەی سەرەنجام پنەما ماچۆ گرڎوو ئەگەرەکا پا ئاڕاسەنۍ کە هۊرچنیەی نەکریۆ و هەرێموو کورڎەسانی و قەوارەکەش پېسە چېوۍ ڕەمزی مەنۆوە، هەرچڼە غەڵەتی حوکمڕانی چامنە هاموڵاتیێش بێ هیواکەردێنۍ کە بە ناچاری بواچا ئۆخەی کە ئی دەسەڵاتە نمەمەنۆ، بەڵام ئینە فرە مەترسیڎارا و نمەبۆ ڕا پانەی بڎریۆ بۊنەو مەسڵەحەتوو چن کەسێوە ۋنەو گەشمەرڎا بە زایە بلۆ، ئانەیچ تایبەتا ئانەنە بە ئەگەرێوە فرۆ پەدەکە کە ئیساتۍ جە ڕوو سەروازییوە بەدەسوو ۋێش ۋێش تەوقەدان و پێگەو سەروازی ۋێش لاوازکەردەن بە ئەگەرێوە فرۆ جە باڵو نێچیرڤان بارزانی کە ئیساتۍ یاگەگیری یووەما گولانە مکریۆوە پینەیچ ئاژەو دلېینەو ئا حیزبەیە و دلېینەو هەرێمیچ ڕەنگە شێویای زیاتەریچ بە ۋێشۆ بوینۆ.