چالاکەو مافەکاو ژەنا و ئەندامەو کژاری وریشە مورادییە، ١و ئابوو ٢٠٢٣ێـوە زیندانوو ئەوینینە گیریێنە، حەرچەند نزیکەو ساڵێوەن گیریێنە، بەڵام بێبەشە کریێنە جە چەمداریی پزیشکی و چەمپەنەکەوتەی چەنی بنەیانە و پارێزنەرا.

٦ـوو ئایاروو ئێساڵیوە بە ئەمرەو ئەبوقاسم سەلواتی، وەرپرسوو لەقوو ١٥ـو دادگاو ئینقلابوو تارانی چەمپەنەکەوتەی چەنی بنەیانەی و پارێزنەرا قەدەغە کریان، سەرەڕاو شۆنیرەلوای کەسوکار و پارێزنەرا سەبارەت بە هۆکار و ماوەو ئی قەدەغەکەردەیا، تا ئیساتێ هیچ جوابێوەشا نەدریانۆ.

زانییان، وریشە مورادییە دەسوو چند نەوەشیێوە مناڵنۆ پێسەو نەوەشیی جومگەکان و مازی و بەزەحمەت تواناو لوایش هەنە، چەنیچش چەمداریی پێویسی پزیشکییش ورنەگێرتەن.

هەرپاسە دووێ هەفتێ چێوەڵتەر و وادەو دادگاییکەردەی وریشەینە، پارێزنەرەکێش هاگادارێ کریێوە، کە مافوو دەسیاوایشا پا دۆسیەیە نییەن.

وریشە مورادییە ١ـو ئابوو ٢٠٢٣ دماو دەسبەسەرکەردەیش نزیکوو شاروو سنەینە، دماو ٢ حەفتا کۆڵیایوە وزیا زیندان و فاڕیاوە پەی زیندانوو ئەوینی، مورادییە بە تۆمەتەو "ئەندامبییەی ڕێکوستەینە" دادگاییە مکریۆ.