نوېنەرو مراپی، جیانفراسۆ فاتۆرینی جە ئەرەنیشتەی ٥٦ەمینو مافەکا مرۊڤوو نەتەوەیۊگېرتەکانە مافو قسەکەرڎەیش هۊرگېرت و سەرنجش وست سەرو گۊشەگیری ئیمراڵی و نیایرەو قەیومی جە لایەنو دۆڵەتو تورکیوە. هەرپاسە داواش کەرڎە نەتەوەیۊگېرتەکۍ شاندېوە ڕەوانەو ئیمراڵی بکەرۊ
ئەرەنیشتەو ٥٦ەمینو ئەنجوومەنو مافەکا مرۊڤوو نەتەوەیۊگېرتەکا جە ئۆفیسوو جنێفینە بەردەواما. ئی ئەرەنیشتەیە جە ١٨و حوزێرانیوە دەسشپنەکەرڎەن و تا ١٢و تەموزی خواینۆ. جە ئەرەنیشتەکەینە پاشێلکەرڎەی مافەکا مرۊڤی چا وڵاتانە کە چنەش ڕوەمڎۆ، گفتوگۊش سەرکریا. جە ئەرەنیشتەکەینە نوېنەرو دۆسایەتی بەینوو گەلا دژو ڕەگەزپەرسی (مراپ)و نەتەوەیۊگېرتەکا جیانفراسۆ فاتۆرینی سەرەنجش وست سەرو گۊشەگیری سەرو ڕابەرو گەلو کورڎی عەبدوڵا ئۆجالانی و نیایرەو قەیومی کە دۆڵەتو تورکی گەرەکشا جە شارەکاو سەرنیشتوو کورڎەسانینە سەپنۊنەش.
'بە شېوېوی سیستەماتیک مافەکاو مرۊڤی پاشێلۍ کریا'
جە ئەرەنیشتەکەینە کۊمیسیاری باڵاو مافەکا مرۊڤوو نەتەوەیۊگېرتەکا ڤۆلکەر تورک ئاماڎە بۍ.
جیانفراسۆ فاتۆرینی جە ئەرەنیشتەکەینە سەرەنجش وست سەرو فشارەکا دۆڵەتی کە جە شارەکاو کورڎەسان و توکیاینە جە ۋەرا ۋەر بە گەلو کورڎی بریۊ ڕاوە و ئینەش وات: "جە شارەکاو تورکیای و سەرنیشتوو کورڎەسانینە فشارەکۍ دۆڵەتی بەردەوامێنۍ و مافە بنەڕەتییەکا و ئازاڎی کەسەکا بە شېوېوی سیستەماتیک پاشێلۍ کریا، جە ۋەراۋەرو ئینەینە فرە ناڕەحەتێنمۍ."
'سەرۆک شارەوانییەکۍ بەشېوېوی ۋۍ نەویسانە جە مەنسەبەکاشا دوورۍ وزیاوە'
جیانفراسۆ فاتۆرینی کۊمکوژییەکا سەردەمو مڎرامانوو ڕاوەبەری خۆسەری و کارەکۍ نەتەوەیۊگېرتەکاش چا قۆناغېنە باسکەرڎېوە و واتش: "ئەنجوومەنو مافەکاو مرۊڤی جە گوزارشتەو ساڵەو ٢٠١٧ینە ئامەژەش پانەی کەرڎەن فرە نارەحەتێنۍ جە ئاژەو گەلا جە سەرنیشتوو کورڎەسانینە. جە گوزارشتەکېنە ئانە دیاریکریان کە کاربەدەساو کورڎی کە بەشێوۍ دیموکراتیک هۊرچنیێنۍ، جە مەنسەباکاشا دوورۍ وزیاوە و پەی دوور وستەیۊیچشا یاساگەلیوە جە شێوەو یاساو کۊشییای دژو تیرۆری بەکارمۍ، هەرپاسە میدیا کورڎی و سەربەخۆکۍ و گرووپە مەدەنییەکۍ دەسبەسەرۍ کریا.
وەڵۍ و دماو هۊرچنیەکا ئایارو ٢٠٢٣ۍ پەرلەمانوو تورکیای و هۊرچنیەو ئادارو ٢٠٢٤ی شارەوانییەکا چڼین کەس گیریێنۍ. هەمڎیسان سەرۆک شارەوانییەکۍ کە بەشېوېوی دیموکراتیکی هۊرچنیێنۍ گیریانە و جە ئەرکەکاشا دوورۍ وزیاوە.
'شاندێوە ڕەوانەو ئیمراڵی بکریۆ'
جیانفراسۆ فاتۆرینی سەرەنجش وست سەرو ئاژەو گۊشەگیری کە ڕابەرو گەلو کورڎی عەبدوڵا ئۆجالانش ئینا چنە و ئینەش بەربڕی: "ماوەو ٣ ساڵان هیچ زانیاریېوە جە بەڕېز ئۆجالانی هۊرمەگیریۆ کە ٢٥ ساڵېن جە زیڼانو دوورگەو ئیمراڵینە زیڼانی کریان. چی ٣ ساڵەو دماینە بەهیچ جۊرۍ نەتاوانش چەمپنەکۊتەی چنی بنەیانەی و پارێزنەراش بکەرۊ. داوا جە ئەنجوومەنو مافەکا مرۊڤوو نەتەوەیۊگېرتەکا مەکەرمې کە شاندوە ڕەوانەو گېرتەخانەو ئیمراڵی بکەرۊ، بەشېوېوی سەربەخۆ ئەوەکۊڵیای بکەرۊ جە ڕوەدایەکا پانیشتو ۋەرکۆتوو تورکیای و ئا ئاژەی کە عەبدوڵا ئۆجالانش ئینا چنە."
