دەوڵەتوو تورکی کە هجوومە ئەرەگیرکارییەکاش و پەشتیوانیکەردەی سەروازییش پانیشتوو کوردستانینە زیاتەرێ کەردێنێ، چی دمایوە هجوومەکێش زیاتەرێ کەردێنێ و دهۆکەنە خاڵەو وشکنایش نیێنەرە، دیمەنوو خاڵەکاو وشکنای وەڵێ کریێنوە.
ئاژانسوو ڕۆژنیوزی بە هەواڵێوە ئەرەیاوناش سوپاو ئەرەگیرکەرەو تورکی دهۆکەنە خاڵەو وشکنایش نیێنەرە، ئا سەرچەمە واتەنش بە پاو هەواڵێوی بەشوو کوردیی پەلیانەو دەنگوو ئەمریکای (VOA) ئەرەیاوناێوی فەرماندەیی هێزە چەکدارەکاو دەوڵەتی ئەرەگیرکەروو تورکی بە درۆ موزۆو، کە واتەبێش سوپاو عێراقی بازگەش نیانرە نەک تورکیا.
هەواڵێوە، بەشوو کوردیی پەلیانەو دەنگوو ئەمریکاینە، دەوڵەتی ئەرەگیرکەروو تورکی بە درۆ موزۆوە بارەو نیایرەی بازگەی و وەنەپەرسایوە جە هاموەڵاتاو پانیشتوو کوردستانی.
دماو ئانەیە کە شەوەو ٢٢ێ ئی مانگێوە پەی ماوەو یەرێ ڕوا، بەردەوام نزیکەو یەرێ هەزار سەروازێ سوپای ئەرەگیرکەرەو تورکی بە زرەپۆش و چەکی قورسۆ سنووروو مەنتێقەو بەرواریی باڵاینە چەسپیێنێ، ئا سوپێ بەینوو دەگایەکاو ئا سنوورەینە بازگێش نیێنێرە دانا و جە ئەرەنیشتاو سنوورەکەی پەراوە، ئینجا تا ئیساتێ ١٠ هاموەڵاتێ مەدەنیێشا گێرتێنێ.
دماتەر فەرماندەیی هێزە چەکدارەکاو دەوڵەتی ئەرەگیرکەروو تورکی ئەرەیاوناێوەش وەڵا کەردۆ ئاماژەش پانەیە دا، سوپاو عێراقی بازگێش نیێنێرە نەک سوپاو تورکیای.
هەرپاسە پەیامکیانوو پەلیانەو دەنگوو ئەمریکای مەنتێقەو بەرواریی باڵاینە، دیمەنێوەنە چند بازگێوی سوپاو ئەرەگیرکەرەو تورکی تۆمار مکەرۆ و دمایی وەڵاش مکەرۆوە، پێسە تەماموو ئەرەیاونایەکەو فەرماندەیی هێزە چەکدارەکاو دەوڵەتوو تورکی جارێوی تەر بە درۆ وزیاوە.
یاگێ باسینە، دەوڵەتی ئەرەگیرکەروو تورکی بەردەواما جە لەشکرکێشییەکاش پەی سەروو پانیشتوو کوردستانی، بە ئاردەی سوپاێوە تازێ پەڕچەکێوە ئامانجشا هجوومێوی ئەرەگیرکاریی تازە پەی سەروو کەشوو گارەی دەس پەنە بکەرۆ و بەتەمامی مەنتێقێوی سەروازیی بە قووڵایی ٤٠ کیلۆمەترا دلێ خاکوو پانیشتینە وەش بکەرۆ.
