ماوەو کەمتەر جە ١٠ ڕووانە چوار کۆڵبەرۍ و کاسبکارۍ کوردی جە مەنتیقە سنوورییەکاو بانەی و سەقزینە کوشیێنۍ، بە پاو ئامارەکایچ جە سەرەتاو ئێساڵیوە کوشتەی و زامڎارکەردەی زیاتەر جە ٢٣٠ کۆڵبەرا و کاسبکارا تۆمار کریان.
بەپاو زانیارییەکا ڕۊو یەرە شەممەی کاسبکارێوە کورد بە نامۍ محەمەد قادری خەڵکوو دەگاو شوێی بانەی، جە مەنتیقەو سنووری گڵەسوورە و ئا شارەینە جە مەودێوە نزیکەنە بە تەقەو هێزە سەروازییەکا ئێرانی کوشیان.
ئا کاسبکارە خێزاندارا و تاتەو یەرۍ زاوڵا بیەن و جە نوقتێوە وشکناینە بە بێ ئاگاداری وەڵێوەختەی دریان ۋەروو دەسڕێژوو گوللاوە.
ڕۊو یەکشەممەی ٥و ئایاری کۆڵبەرێوە بە نامۍ عەتا رۆستەمپوری خەڵکوو سەقزی جە سنووروو هەنگەژاڵەو بانەینە کوشیا، ڕۊو ٢ۍ ئایاری کۆڵبەرێوە بە نامۍ جەللا سۆهرابی خەڵکوو دەگاو تاژانی سەر بە بانەی جە مەنتیقەو سنووری سورکێوینە چا شارەنە و ڕۊو ١و ئایاریچ کۆڵبەرێوە بەنامۍ هێمن ئەحمەدی جە مەنتیقە سنووری بەستامی سەقزینە بە تەقەو هێزەکاو دەوڵەتی گیانشا جە دەسدابۍ.
هەر چی ماوەنە دووۍ کۆڵبەرێچ زامڎارۍ بیۍ، کە یۊشا کۆڵبەرێوە تەمەن ١٧ ساڵا بە نامۍ ئاریا مەمەندی خەڵکوو سەردەشتی کە بە مەڵامەتوو ۋەرکەوتەی ساچماوە کە وەروو میا چەمایش کەوتێبێنۍ، چەمێوەش جە دەسدا.
مانگەو نیسانی لاوکەمیۆ چوار کۆڵبەرۍ بە تەقەو هێزەکاو دەوڵەتوو ئێرانی کوشیێبێنۍ و زیاتەر جە ٣٠ کۆڵبەرایچ زامڎارۍ بیێبێنۍ.
جە مانگەو ئاداریچەنە بە پاو ئامارەکاو جەمەو مافوو مرۆڤوو کوردسانی ١٣ کۆڵبەرۍ کوشیێنۍ و ٦٤ کۆڵبەرێچ زامڎارۍ بیێنۍ، حەرپاسە جە مانگەو شوباتیچەنە ٤ کۆڵبەرۍ کوشیێبێنۍ و ٥٦ کۆڵبەرۍ و کاسبکارۍ کوردیچ زامڎارۍ بیێبێنۍ.
هاموەخت بە پاو ئامارێوە کۆڵبەر نیوزی جە مانگەو کانونوو دووەموو ئێساڵینە شش کۆڵبەرۍ کوشیێنۍ و ٥٨ کۆڵبەرێچ زامڎارۍ بیێنۍ.
پی مەڵامەتۆ جە سەرەتاو ئێساڵیوە تا ئیساتۍ ٣١ کۆڵبەرۍ و کاسبکارۍ کوردی کوشیێنۍ و زیاتەر جە ٢٠٠ کۆڵبەرایچ زمڎارۍ بیێنۍ.
