پارتوو یەکسانی و دیموکراسیی گەلا (هەدەپ)ە، بە درووشموو "بە ژەنی، ژیوای، ئازاڎی بەرەو ئیدارەی وێمانەی ئازاڎ"، بارەگاو پارتەکەینە بالگەتنە، کۊنفڕانسوو ژەناو ئیدارەی وێمانەیش بەست، کە بڕۍ فرە جە نوێنەراو ژەناو کوردستانی و تورکیای بەشدارۍ  بێنۍ.

دماو ورچنیەی دیوانی و ڕێزگێرتەی، کۊنفرانسەکە بە تەماشەکەرڎەی سینڤزیۊنێوە دەسش پەنە کەرد، دماتەر درووشموو "ژەنی، ژیوای، ئازاڎی"یچ بەرز کریاوە.

قسەکەرەو مەجلیسوو ژناو هەدەپی، خالیدە تورکئۊغلووە، خێرامای بەشداراو کۊنفرانسەکەیش کەرد و واتش: "سڵام چا ژەنا کە حەرگیز پاشکەشێشا نەکەرڎە جە واتەی 'هامسەرۊکایەتیی خەتەی وەنەوشەییەو ئێمەنە'ی، ئا ژەنۍ بە بنیاتنیای دەگۍ و هەرەوەزیی ژەنا وەرنیشتنە باوڕوو ئێمەشا بە ژەنا بەزینڎەیی ئاستەنۊ، هەرپاسە ئا ژەنۍ سەرمەشقۍ ئیدارەی وێمانەو شەنگالی کەرا، ئا ژەنۍ جادە و یاگۍ ژیوایشا و زینڎانەکێشا فاڕێوە بە مەیدانوو مدرامانی".

پاشان تیشکەش وستە سەروو نیایرەی قەیومەکا، پێسە هجوومێوە پەی سەروو سیستموو هامسەرۊکایەتی و ئیرادەو گەلوو کوردی و کۊشیای یەکسانی داش قەلەم. چندەها تەڤگەرۍ و لایەنۍ جیهاننە هەوڵۍ مدا ئا مۊدێلەیە پراکتیزە کەرا، کە تەڤگەری کوردی خولقنێنێ؛ جە شێوەو ئا مۊدێلەینە کە شەنگالنە ملۊ ڕاوە. پەوکای نیایرەی قەیومەکا ماناو ئەرەمەرزنای ڕژێمێوەن دژوو ژەنۍ و مافی و دیموکراسی.

خالیدە تورکئۊغلو ئەوەخوایش کەرڎۊ، گردوو ئی حەوڵا دژوو گەلی، لکە دریێنۍ بە گۊشەگیرییوە، واتش: "پەی لابەرڎەی ڕژێموو قەیومی، پێویسا پەی دلێنەبەرڎەی گۊشەگیری کۊشیەیمۍ. گۊشەگیریی بناغەو ڕژێموو قەیومین. پێویسا ئازاڎیی جەستەیی بەڕێز ئۊجالانی، بۊ بە مژاروو کۊنفڕانسەکەیما".

هاموەخت هامسەرۊکەو شارەوانیی وەڵینوو شاری گەورەو ئامەدی، گوڵتان کشاناکە، کە زینڎانوو کانیدراینە گیریێنە، پەیامێوەش ئاڕاستەو کۊنفرانسەکەی کەرد. ئاماژەش پانەیە کرد ئی قۊناغە پەی کورڎا و گەلە بندەساو وەرکەوتوو دلێڕاسەی و بەتایبەت ژەنی، فرسەتێوە تارێخین و واتش: "پێسە ژەنا، دژوو گرد زیهنیەت و یاواینێوە مۊدێرنیتەی سەرمایەداری، وەرپەرسێنمۍ پەی ئەرەمەرزنای ڕای یەرەمێ".

ئەخیرۊ واتش: "بە مۊدێلوو نوێنەرایەتیی یەکسان و هامسەرۊکایەتیما، گرد یاواینێوە ڕەگەزپەرسی و نەتەوەپەرسی و ئایین‌پەرسییەکا دلێنە بەرمۍ و ژیواێوە جیاواز بنیات منیەیمۍ. ئێمە بڕواما چانێنە، پا قەرارا چی کۊنفرانسەنە مدەیمێشا، دژوو فاشیزموو پیای، کە کۊیلایەتی سەرمارە سەپنۊ، دەسەڵاتوو قەیومی ورشانمێوە و بە پارادایمەکەیما ژیوای بنیات منیەیمێ".