هامسەرۆکایەتی کۆنسەو ی ڕاوەبەریی کەجەکەی، ئەرەیاوناش کۆشیای یۆگێرتەو گەلوو کوردی و گەلاو تورکیای، کە خەتەو گەشمەرداو پرسوسینە وەڵێ مگنۆ، فاشیزموو ئاکەپە-مەهەپەیش وستەن وەروو هورشانایوە و داواش جە گردوو هێزە ئازادیوازەکا کەردە کۆشیای قەوەت بکەرا.
هامسەرۆکایەتی کۆنسەو ڕاوەبەریی کەجەکە، ٣٣ گەنجێ سۆسیالیستێش یادێ کەردێوە کە بە هجوومو بۆمبو چەتەکاو داعشی تەمووزو ٢٠١٥ پرسوسوو ڕحاینە کوشیێ.
ئەرەیاونایەکەو کەجەکەی کە بە بۆنەو ٩ەمین ساڵوەگێڵوو کۆکوشیی پرسوسینە وەڵا کریانۆ ئینەنە:
"دژوو گەنجە سۆسیالیستاو تورکیای کە پەی شۆڕشوو وەرنیشتی پەشتیوانێ بێنێ و پەی واوەی ئاوەدانکەردەیۆ کۆبانێ ئامێبێنێ پرسوس، ٢٠ تەمووزوو ساڵەو ٢٠١٥ هجوومشا کریا سەر و ٣٣ گەنجێ تەڤگەروو گەنجە سۆسیالیستا کوشیێ. ٩ەمین ساڵوەگێڵوو هجوومەکەینە جارێوی تەر ئا هجوومە نامەردانەیە بەتندی شەرمەزار مکەرمێ. بە ڕێزداری و پەنەزانایوە ئا ٣٣ گەنجە بەنرخێ کە هجوومەکەنە گەشمەردێ بیێ یاد مکەرمێوە. کەسێتیی ئا گەشمەردانە گردوو گەشمەرداو شۆڕشی و دیموکراسی بە ڕێزداری و پنەزانایوە یاد مکەرمێوە و سەرەما ئاستوو یادیشانە مکۆمنمێرە.
هەڵوێستی درووسوو پێوەسبییەی بە گەشمەرداو پرسوسیوە، پارێزنای شۆڕشوو وەرنیشتیین
کۆشیای و هەڵوێستوو هێزە دیموکراتیک، سۆسیالیست و شۆڕشگێڵنەکا پەی یۆگێرتری چەنی گەلوو کوردی و شۆڕشوو وەرنیشتی دەورێوی گرنگش بێ جە پەرەپەنەدایی کۆشیای یۆگێرتەی دژ بە ڕەنجوەری، دماکەوتەی و فاشیزمینە. ئی کۆشیایە یۆگێرتەیە پرۆژەکاو ڕەگەزپەرسی، دماکەوتەیی و فاشیستی پا مەبەستە کە تورکیا، کوردستانەنە و وەرکەوتوو دلێڕاسەینە سەروەرێ با، دلێنە بەردەن. گەشمەرداو پرسوسی سیمبوڵوو ئی کۆشیایەنێ. کۆشیای گەشمەرداو پرسوسی بەردەوامیی ئا خەتێنێ کە سەروو ڕاو دەنیز گەزمیش، ماهر چایان، ئیبراهیم کایپاک کایە، حیکمەت کڤلجمان کەوت وەڵێ. شۆڕشگێڵنی گەورە دەنیز گەزمیش کە سەروو سەکۆو قەنارەدایوە هەڵوێستو پەشتوانیی وێش پەی کوردا بەروست، ئانەش دیاریی کەرد، کە ئینە چند گرنگەن. ڕابەر ئاپۆ بەهایێوی گەورێش دا پا هەڵوێستەیە و پێسە کۆشیای ئازادییش کوردستانەنە وست وەڵێ. شۆڕشوو وەرنیشتی شۆڕشی هامبەش و یۆگێرتەو گەلان، کە چی خەتێوە وێش ئاشکرا کەردەن، سەروو ئی بنەمێوە، ڕاستتەرین هەڵوێستی شۆڕشگێڵنانە، پارێزنای شۆڕشوو وەرنیشتییا، کە شۆرشی هاومبەشوو گەلان. بێگومان ڕاستتەرین هەڵوێستوو پەیوەستبیەیش بە گەشمەرداو پرسوسیوە حەر ئینەنە.
هەوڵدای و کۆشیای گەلوو سەرنیشتوو کوردستانی و تەڤگەروو شۆڕشگێڵنە سۆسیالیستەکا بە نامێ گەلاو تورکیایوە بریا ڕاوە، جە ماڕای هجوومەکاو داعشینە و ئازادکەردەی کۆبانێنە دیاریکەر بێ. ئی کۆشیایە و ئەنجامەکێش شکستێوش تووشوو فاشیست و کئەرەگیرکاری کەرد و پلانەکاو دەسەڵاتداریی ئاکەپە-مەهەپی دلێنە بەرد. ئازادکەردەی کۆبانێ جە دلێنەبەردەی دەسەڵاتداریینە پلێوە تارێخییەش هەنە. وەروو ئانەیە گەرەکشابێ ڕاو داعشیوە کۆبانێ بماڕا و دماتەر ڕژێمێوی دماکەوتە، ڕەگەزپەرس و فاشیست وەرکەوتوو دلیڕاسەینە وەڵا بکەراوە، ئامانج حەر ئینە بێ. ئامانجوو دەسەڵاتداری ئاکەپە- مەهەپەی بەتایبەت جە کۆکوشیی پرسوسینە وەشکەردەی ئی پڕۆژەیە بێ. دماو ئا وەختیوە هجووم و کۆکوشی سەرنیشتو کوردستان و تورکیانە کریا، ئامانج ئانە بێ واوەی ئی پرۆژەیە وەش بکەرا. هجوومەکاو دەسەڵاتداریی ئاکەپە-مەهەپەی کە ئارۆیچەنە بەردەواما، دلێ ئی چوارچوەیەنە.
پێویسا کۆشیای یۆگێرتەی دژوو فاشیزمی قەوەتتەر بکریۆ
کۆشیای یۆگێرتەو گەلوو کوردی و گەلاو تورکیای، کە خەتەو پرسوسینە کەوت وەڵێ، بەدڵنیاییوە فاشیزموو ئاکەپە-مەهەپەیش بەرەو ورشانایوە بەرد. دەسەڵاتداریی فاشیستی ئینا دلێ خەڵەفیاینە و تێکشییەینە و قۆناغوو شیبییەیوە و وەڵابییەیوەینە. بەڵام بە پلانەی تازێ نوێی زیادکەردەی هجوومەکاش گەرەکسەن وێش چی دۆخەیە نەجات بدۆ و پڕۆژەکاو فاشیستی، دماکەوتەیی و ئەرەگیرکاری بیاونۆ یاگێ. هجوومە وەرفراوانەکاش دژوو پانیشتوو کوردستانی ئینێ چی چوارچوەنە. هەرپاسە سیاسەتوو دەسملەرەگێرتەی ئیرادەیچ ئینا دلێ ئی چوارچوەیەینە. لایێوە تەریچۆ پەی سوریای و وەرنیشتی پلانێ تازێ مکەرۆ. پی ئامانجەوە شێفی فاشیست تەیب ئەردۆغان گەرەکشەن پەیوەندی چەنی دەوڵەتوو سوریای بنیۆرە. تا وێش جە هورشانایوە ڕزگار بکەرۆ، پڕۆژەکاو ئەرەگیرکاری، دواکەوتەیی و فاشیستی بە شێوازی تازەوە بیاونۆ یاگێ ئینا هەوڵێنە. دژوو ئی سیاسەتا کە دەسەڵاتداریی ئاکەپە-مەهەپەی موزۆ وەڵێ، قەوەتکەردەی کۆشیای یۆگێرتەی دروستتەرین هەڵوێستا. هێزە شۆڕشگێڵن، دیموکراتیک، سۆسیالیست، ئازادیواز پێویسا پی وەرپەرسییوە تارێخییەوە جماوە و کۆشیای یۆگێرتە دژوو فاشیزمی قەوتتەر بکەرا. سەروو ئی بنەمیوە بانگەواز جە گرد کەسێو مکەرمێ کۆشیای گەورەتەر بکەرا."
