کەجەکە سڵامش ۋنەو گردوو بەشدارا گلێرۆبییەی ئازادی کەرد و واتش: "مشۆم ئی مدرامانە بەشکۆو گەلەکەیما تا ماڕای سیستەمو گۆشەگیری و ئەشکەنجەی، تا مسۆگەر کەردەی ئازادی جەسەیی ڕابەر ئاپۆی بەبێ مردای بەردەوام بۆ."
هامسەرۆکایەتی کۆنسەو ڕاوەبەری کەجەکەی پێوەس بە 'گلێرۆبییەی ئازادی' ١٣و ئارگای(ئۆکتۆبەر)ی ئامەدەنە ئەرەیاونێوەش وەڵاکەردۆ.
ئەرەیاوناکەو کەجەکەی پی جۆرەنە:
"١٣و ئۆکتۆبەری ئامەدەنە گلێرۆبیێوە گەورەو ئازادی کریا. وەڵێ گرکەسینە جە خەڵکو ئامەدیوە تا سەرحەد، جە دێرسیم تا فرات بە دەیان هەزار کەسۍ جە گەلەکەیما ڕووەشا کەردە ئامەد. جە شارە گەورەکا تورکیاینە بە هەزاران کەسێ کوردەسانیۍ و تورکیایی کۆتێ ڕا پەی ئانەی وێشا بیاونا بە ئامەدی. سەرەڕاو هجومی و، قەڎەغەی و ئاستەنگییەکا دەوڵەتی جە گەلەکەیما، گەل مجیێرە مېڎان و کۆڵانەکا و ناڕەزایی قەوەتو وێشا جە دژو گۆشەگیری و سیاسەتو قەڕکەردەی نیشانەدا. گەلەکەما جارێوە تەر دڵسۆزی وێش پەی ڕابەر ئاپۆی نیشانەدا و گرد هەڵوێسێ وێشا بەروست، هەمیچ پەیامی پەنەوازشا دا. ۋەرو ئا چالاکییە بە شکۆ و ماناڎارەی جە دڵۆ سڵام جە خەڵکو ئامەدی و گردو گەلی وڵاتپارێزی و دۆساما مکەرمێ. هەرپاسە سڵام و حورمەتو وێما پێشکەش بە هێزە دیموکراسییەکا و گەلا تورکیای مکەرمێ کە پاڵپشتیشا جە گەلەکەیما قوەتو گورشا دا بە گلێرۆبییەی ئازادی. هەرپاسە سڵام جە گردوو ئا کەسا مکەرمێ کە بە مەڵامەتو ئاستەنگیەکا فاشیزمیۆ نەتاواشا بیاوا بە ئامەدی، کە بە کەوتەی ڕاشا پەی ئازادی و مدرامانی جە دژو ئاستەنگییەکا فاشیزمی پەیامی پەنەوازشا دا و ئەنجامی پەنەوازشا بەدەست ئارد.
گلێرۆبییەی ئازادینە گەلەکەما جە دژو سیاسەتەکا گۆشەگیری هەڵوێسو وێشا نیشانەداو و پەیامێوە قەوەتشا دا. گەلەکەما جارێوە تەر بە ڕۆشنی نیشانەشادا کە ڕابەر ئاپۆ موخاتەبو چارەسەرو دیموکراتیکیانەو پەرسەکا گەلوو کوردین. گەلەکەما و هێزە دیموکراتیکەکا تورکیای بە دەنگێوە بەرز واتشا، ئاشتییوە بە حورمەت جە تورکیانە تەنیا بە موخاتەب- هۆرگێرتەی ڕابەر ئاپۆی، بە چارەسەری دیموکراتیکیانەو پەرسەکا کوردی مەیا ئاراوە و سەرو ئا بنەمایۍ دەسنیشانشا کەرد کە مشۆم دەموودەس گۆشەگیری سەرو ڕابەر ئاپۆی لابریۆنە و چارەسەری دیموکراتیکیانەو پەرسو گەلوو کوردی پێکبێ. پەنەوازا گرد کەسێ فرە بە خاسی چی پەیامەو گەلوو کوردی بیاوۆنە. ئا سیاسەتەی ئی پەیامەو گەلو کوردی مەوینۆ، شکس چەمەڕاشا. وە گردو ئا گەما کە گەرەکشا گێڵنۆشا تێکۍ مشا. تا وەکو ڕابەر ئاپۆ بە موخاتەب هورنەگیریۆ، نە پەرسو کوردی چارەسەر مکریۆ و نە جە تورکیانە ئیمکانو ئاشتی مەبۆ. سەرو بنەماو چارەسەرو دیموکراتیکیانەو پەرسو کوردی ئا کەسەی فرە پەی ئاشتی و دیموکراتیکبیەی تورکیای ئەرەکۆشۆ ڕابەر ئاپۆن. گۆشەگیری سەرو ڕابەر ئاپۆی سیاسەتێوەن جە دژوو ئا هەوڵدایەو ڕابەر ئاپۆی. پۆکەی تا گۆشەگیری سەرو ڕابەر ئاپۆ ی جە ئیمراڵینە بەردەوام بۆ، کەس نمەتاو باسو ئاشتی و چارەسەری بکەرۆ. ئینە چێوێ نا مومکیناو نمەویەرۆ. گەلەکەما ئی حەقەتینەشا جە ئامەدەنە بە ڕۆشنی نیشانەداوە. بە شێوێوە قەوەت نیشانەشادا کە ڕابەر ئاپۆ مسۆگەری و توخمی بنەڕەتی هامپەیمانی، یۆبیەی دیموکراتیکی و گەلا، ژیوای ئازاد، دیموکراتیک و ئاشتی دلێینەین جە تورکیانە. سەرو ئا بنەمایۍ داوا جە گرد کەسی مکەرمێ خاس چی پەیامەو گەلو کوردی بیاوانە، وەرو چەماش بگێراو و بەپاو ئانەی جماوە.
جە ڕاو ئی چالاکیەیۆ گەلەکەما ئیسپاتش کەرد بە قەرارداری سەرو مدرامانی متاومێ گرد جۆرە ئاستەنگیێ فاشیزمی جە بەین بەرمۍ و سەرکۆتەی بارمێنە ئاراوە. مشۆم ئی مدرامانە بە شکۆو گەلەکەیما تا ماڕای سیستەمو ئەشکەنجەی و گۆشەگیری، تا مسۆگەرکەردەی ئازادی جەسەیی ڕابەر ئاپۆی بە بێ مردای و بە ۋەرفراوانیی بەردەوام بۆ.
