ئەنداماو تێکۆژەنی (ژەنە گەنجە کۆشەرا) شاروو کاسێلوو ئەڵمانیاینە یوەمین کۆنفرانسوو وێشا بەست.  کۆنفرانسەکە بە درووشموو "ژەنی، ژیوای، ئازادی"ی دەسش پەنە کەرد. 

 هۆڵوو کۆنفرانسەکەینە ڕسموو ڕابەروو گەلوو کوردی عەبدوڵا ئۆجالانی و ژەنە گەریلا گەشمەردەکا ورواسیا.

ستاندوو کتێبەکاو ڕابەروو گەلوو کوردی عەبدوڵا ئۆجالانی و گۆڤاروو خۆبوونی و چندین کتێبێ. تەرێ نریێرە.

ژەنی بە جلوبەرگی نەتەوەییوە بەشدارێ بیێ.

کۆنفرانسەکە بە دەیەقێوە ڕێزگێرتەی وەنەو گەشمەردا دەسش پەنە کەرد.

"ئی سەدە، سەدەو ژەنێن"

قسێ ئەوەڵی لاو ئەندامەو تێکۆژەنێ بەرژین گونەشێوە پێشکەش کریا، تیشکەش وستە سەروو هجووم و فشارەکاو سەروو ژەنا و واتش: "فەلسەفەو "ژەنی، ژیوای، ئازادی-سەر بوزە ئازادی" بەشێوێوی سەرکەوتە مکریۆ و ئی سەدە، سەدەو ژەنێن. چونکوم دوژمن جە زیرەکی و هێزوو ژەنێ هاگادارا، هەمیشە هجووم مکەرۆ سەروو شناسنامەو ژەنێ و هەوڵێ مدۆ ژەنی جە شناسنامەکاشا دوور بوزۆوە. ڕابەر ئاپۆ ماچۆ؛ "ئەگەر سەرمەشقایەتیی ژەنا نەبۆ، هەرگیز نمەتاومێ ڕای ڕاسە بوێزمێوە.  ژەنی جە گرد کەسی زیاتەر نزیکێنێ جە ئازادییوە". پەوکای ژەنی پێویسا بەدرووسی جە قۆناغەکەی نزیکێ باوە، ئازادیی جەستەیی ڕابەر ئاپۆی مسۆگەر بکەرمێ و شایستەو هامڕایی گەریلاکاو ئازادیی بیمێ".

"پێویسا خاس جە ڕابەر ئاپۆی بیاومێنە"

بەرژینە تیشکەش وستە سەروو گەمەکاو سیستەمی سەروو ژەنا و هجووموو سەروو شناسنامەو ژەنا، واتش: " پێسەو ژەنە گەنجا، کە ئەڵمانیانە ئامینمێ دنیاوە و گەورێ بیێنمێ، ئێمە جە ڕووەو جەستەییوە جە ماواو وێما دوورێنمێ. پەوکای مشۆم بەدروسی بکۆشیەیمێ و خاس جە ڕابەر ئاپۆی بیاومێنە. ئارۆنە هەزاران ژەنێ چی  سیستمەنە ڕووبەڕووێ تندوتیژی و دەسدرێژی مبانێوە. حەر وەروو ئی هۆکارەیچە مشۆم وێما خاس ڕێک بوزمێ و جوابوو ئی هجووما بدەیمێوە".

ئەوەخوایش کەردۆ، کە پێویسا ژەنی شایسێ کۆشیای ٢٥ ساڵەو مدرامانوو ڕابەروو گەلوو کوردی عەبدوڵا ئۆجالانی بانە دژوو سیستموو ئەشکەنجەو ئیمراڵی، واتش: "پێویسا فیکر و فەلسەفەو ڕابەر ئاپۆی وەڵا بکەرمێوە و هەنگام بە هەنگام قەوەتش بکەرمێن".

"بە پارادایموو ڕابەر ئاپۆی وێما ڕێک بوزمێ"

بە نامی یەژەکە-ئەیوە ئەڤین سەرحەدە گەشمەردە زیلانە و گەشمەرداو مانگەو حوزەیرانیش یادێ کەردێوە، واتش ژەنی گەنجێ دژوو هجوومەکاو سەروو گەلوو کوردی مدرامان مکەرا، سیستمیچ گەرەکشەن ژەنی گەنجێ بەپاو مەیلوو وێش بنیات بنیۆ.

بە نامێ یۆبییەی ژەنە گەنجاو وەرنیشتیوە، بێریتان یوسفە تیشکەش وستە سەروو گرنگیی کۆنفرانسەکەی چی قۆناغەنەو واتش: "ئەڵمانیانە کە یۆ جە دەوڵەتە ئەورووپایییەکان، پیلانگێڵنی دژوو ڕابەر ئاپۆی بییەن، کۆنفرانسێو بە فیکر و فەلسەفەو ڕابەر ئاپۆی مکریۆ، ئینە گورزێوی تندا وەنەو دوژمنی.چی قۆناغەنە، گرنگا ژەنی دلێ دڵوو دوژمنینە وێشا بە پاو پارادایموو ڕابەر ئاپۆی ڕێک بوزا و پەروەردێ  با".

دماو چند قسێوی ڕێکوزیاکاو ژەناو کوردی و جیهانی، سینڤزیۆنێو دەربارەو قۆناغی سیاسی نیشانە دریا.

کۆنفرانسەکەنە دەربارەو "کۆمەڵشناسیی ژەنێ" و پرۆسەی سیاسییوە قسەوباس کریا.