کەنەکە بە بۆنەو ١٢ەمین ساڵوەگێڵوو شۆڕشوو ١٩و تەمووزو وەرنیشتیوە، ئەرەیاوناێوەش وەڵا کەردۆ داواش جە گرد کەسێوە کەردە کە پارێزگاریی جە ڕاوەبەریی خۆسەریی سەرنیشت و سووریای بکەرۆ.
کۆنسەو ڕاوەبەریی کۆنگرەی نەتەوەیی کوردستان (کەنەکە)ی، بە بۆنەو ١٢ەمین ساڵگێڵوو شۆڕشوو ١٩و تەمووزو وەرنیشتیوە ئەرەیاوناێوی نویسیاش وەڵا کەردۆ و ئاماژە پانەیە مکەرۆ ١٩و تەمووزو ٢٠١٢ینە کۆبانێوە دەنگوو خۆسەری بەرز بییۆ، ڕۆشنایی شۆڕشوو وەرنیشتوو کوردستانی بەرکەوت و ڕۆ بە ڕۆ گەشتەر مبۆوە و ماچۆ: " چا بارودۆخە ئاڵۆزەو دلێ سوریاینە، کورد و کوردستانیێ هێزو وێشا وست یۆ پەی ڕێکوستەی و قەوەتکەردەی وێشا جە کەمترین وەختەنە کۆبانێنە تا دێرک چندین شارێ و دەگێشا وستێ چێروو ئاسایشوو وێشاوە."
حەر ئەرەیاونایەکەنە ئاماژە کریان بە هجوومەکاو دەوڵەتی ئەرەگیرکەروو تورکی سەروو وەرنیشتوو کوردستانینە و ئامان: "دەوڵەتوو تورکی سەروو هەرێمەکاو چێروو دەسەڵات و ئاسایشوو ڕاوەبەریی خۆسەری وەرنیشتوو کوردستانینە بە فڕۆکەی بێفڕۆکەوان و چندین تەکنۆلۆژییێ سەروازیێ و هەواڵگێریێ تەرێ تر کۆکوشییوی تەرسناک مکەرا. ژیوای خەڵکی مەدەنییچ بییەن دۆزەخ. جگە جە بێباکی دەوڵەتوو تورک،مدرامانوو خەڵکوو وەرنیشتوو کوردستانی بە قەوەتێوی فرەوە بەردەواما و گردوو داینامیکی و میکانیزمەکاو ئیدارەو خۆسەری بەشانازییوە پەی سڵامەتیی خەڵکوو مەنتێقەکەی کۆشیاێوی سەرەبەرزانە مبەرانە ڕاوە."
ئاخرۆ کەنەکە ١٢ ساڵەو ئەرەمەرزنای خۆسەرییش جە گردوو کوردی و کورستانییا مەبارەک مکەرۆ و بانگەوازش کەرد و ماچۆ: "پێسەو کەنەکەی داوا جە گردوو کوردی و کوردستانییا مکەرمێ پەی پارێزنای و زیندەئرمانای ڕاوەبەریی خۆسەری دیموکراتیکوو سەرنیشت و وەرکەوتوو سوریای، وەراوەروو گردوو هجووم و جووڵەو ئەرەگیرکارییێونە چنی خەڵکوو وەرنیشتی با."
