نویسەر، میدیاکار، شانۆکار و پەیجۆری نامی هەورامانی ”ئەیوب ڕۆستەم“ جە پەلیانەو وێشەنە جە دیجیتاڵ میدیاو فەیسبوکیەنە سەبارەت بە نۊتەرین بەرهەمو وێش پۆستێوش کەردەن و جە میانشەنە ئاشکراش کەردەن: نوتەرین کارم جە بوارو نویستەیەنە بە نامونیشانو (هونەری ژیان لە هەوراماندا) دریابە دیزاینەری و شۆنیشەرە ڕەوانەو چاپخاەی مەکریۆنە و جە ئایندەی نزیکەنە مەگنۆنە دەستو وانیارا.

ئەیوب ڕۆستەم نویستەنش: کتێبەنۊکەش بە وردی سەرنج مەوزۆنە سەرو ژیری و سەلیقەو خەڵکو هەورامانی و کە وێش مەسپاران بە عەقڵی ئەوەکریای و بە ئیرادەی هێقم نەخشو وێشان جە بوارە جیاجیاکانە دیاریکەردەن.

ئەیوب قێخا ڕۆستەم.کەریم، ساڵەو ١٩٥٤ی جە گەڕەکەو ماڵێدەرو شارو تەوێڵۍ جەئەڎێ بییەن و قۆناغەکێ وانایش جە تەوێڵۍ و سلێمانییە سەرکەوتووانە تەمانێێ و هامتەریب چەنی وانای نویستە و پەیجۆری و شانۆ و نماییشنامە نویستەیش کەردەن بە پیشە و تا بە ئارۆچ درێژەش بە ئا پیشەیە دان و جە چوارچوەشەنە چەنڎین کتێبێش نویستێنێ کە ئینێ گرنگترینەێشانێ:
هەبگە و هەوارگە
هەورامان/ دوێ بەرگۍ
یارسان
سروتە دینی و کۆمەڵایەتیەکانی خەڵکی هەورامان
کاریگەری ئاوێستا بەر پیرانی و پەیڕەوانی یارسانە
ئازگار/ دوێ بەرگۍ
مەولەوی و هونەری شیعر
گۆڕان وەکزمانێکی ئەدەبی
گەوهەری ژمارەک لە تێکست و دەستنوسەکان/ یەرێ ژمارێ
گوڵبژێرێک لە گۆرانییە فۆلکلۆریەکانی شارەزوور
ئینە سەرەڕاو نویسەی دەیان وتارا و پەیجۆرا جە گۆڤارەکانە و هامکات بەشداریکەردەی جە سەدانبۆناو سیمینارێ و کۆنگرانەو هامکات ڕاوەبەردەی مەڵبەندو ڕۆشنویری هەورامانی.

ئەیوب ڕۆستەم سەبارەت زادگاو جە ئەڎێبییەش تەوێڵۍ بە ئی جۆرەش نویستەن:

ئینە زێدە ئازیزەکەمانە (تەوێڵێ)، چاگە پێدابیەناو دلێ بێشکەو لەلوێنە گوشم پێ لایەلایەو ئەدێم بە دەنگە فرە وەشەکەش گرتەن، چاگە کٶتەنا گاڵگٶکێ و دارە دارە و ئیتر هٶرستەناوە سەرو پەیا، چاگە گٶشیم بە ئاوازو گٶرانییە رەسەنەکا هٶرامی کە پەڕاوپەرشا هونەرو زەریفیا ئامانارە، چاگە فێرو وەرمی وەش و چیرو شٶڵەو مانگەشەوی و دڵی باوەشین و سٶزەی فینکو سەرو بانەبەرزەکاش بیەنا، چاگە ئاشناو رازو سەرگوزشتە وەشەکا بیەنا کە پاڕاوپەڕبێنی جە ئەرزشی ئینسانی، چاگە نریانا مەکتەب و ئا مامٶسایا فێرکەردنا کە فرە زەحمەتا نموونێشا هٶرگناوە، چاگە مووشانی و هەلووکانی و خواجەرٶ و تەڕەشٶپانی و قولەقانی و سێبازو کێڵە زاروڵانەکێم کەردێنی، هەرچی زێدەنە فێرو ئاماو لوای دەرەو دٶڵی و گزی باڕەکڵێ و نٶباوی و تفشای و شارٶی بیەنا، جە کویسانە وەشەکاشەنە بٶ چنوری و شەوبٶی وەرکەمەرێ و بەرزەڵنگی و سوورەهاراڵیم کەردێنە، چآگە نان و کەرە وەشەکەو ژەنە قابیلیەتدارو وەشپٶشەکا هەواریم واردەن،هەر دلێ هەوارەکایچەنە گٶشم پێ بەزمە وەشەکا لوولێ و باسو خواس و لوای کەشی و گزرەو لٶ بڕیەی و گیواو کەنەی و هێزم ئاوردەی گێرتەن، چاگە فێربیەنا گەلکاری و دەسەوام و بە تەنگٶ ئامای یەکتری جە زەروورەتو ژیوایا، چاگە ئانەمە بە چەما وێم دیەن جەژنو بٶنەکانە چن خەڵک دڵوەشی بێنێ و چنی گەردەن و یەکتریشا ئازاد کەردەن، چاگە مڵکدارو بێ موڵک ئینٶ یەکرتری مێوەشا واردەن و جە بەرهەمو موڵکەکا سوودمەندێ بینێ، چاگە دیەنم چنی کٶمەک بە هەژاری و نەداری هێوەرژەناو هەتیما کریان و هٶڵدریان وەش بژیوا، جآگە خەڵک بێ گێرمەو کێشە چنی یٶتری ژیوێنی و پێسە خێزانێوی رەفتارشا کەردەن، چاگە فێر کریانا مشۆ گولانە حورمەت جە گٶرەی گێرٶ و گٶرەیچ رەحمش پێ گولانەی بۆ، چاگە دیەنم کناچی نەورشێێنی بە زەڕو تفەنگ و بنەماو پێوەنیای خێزانی رێزو وەشەویسی بیەن، چاگە شیخ و بەگ و دەسەڵاتدار یانٶ وێشا کەردەن مەکتەب م زاروڵی وێشا کیاستینی بوانا تا خەڵکی تەریج چامشا بڕٶ ونە، چاگە گرد کەس بەرەنجو شانیش ژیوان و کەس مشەوەر نەبیەن، چاگە هیچ غەریبی بێ نەواو بێ خزمەت نەبیەن و خەڵک تیکٶ دەمو وێش کەردەن دەمشاوە، چاگە سێران و هٶرپڕای وەش و سێرانگاکام دلێ دڵپاکی و رەوشت بەرزییەنە دیێنی، چاگە فێربیەنا مشۆ بنیادم تا دماهەناسەش دەسی مانیاش بنیٶ سەرو لەمێ سێرێ، جآگە دیەنم چنی کەشکەک و گوشت و قوربانی بە بێ جیاوێزی بەشکریانۆ، کە کەسێ مەردەن گرد کەس وێش بە ساحیب پەرسە زانان، چاگە تەمام و رەویەکی ژیوای بە پاک و بێگەردی لوێنی راوە، چاگە ئە‌قڵگەرایی و ئیرادە تەمام و سووچەکا ژیوایش گێرتەن، تا دما هەناسە گردێما قەرزارێ ئێ ماوایەنمی، هەر ئاوەدان و خەڵکەکيش سەربەرزێ با..