کۆردیناسیۆنو کەژەکەی ئەرەیاۋناش، کە دماو ئەشکەنجەی قورسی دژوو پەخشان عەزیزیۍ و شەریفە محمدیانۍ سزاو جە قەنارەدای سەرو هەردویشارە سەپیان. کەژەکە ئانەش شەرمەزار کەرد و ئی بانگەوازەشە ئەرەیاۋنا، "مشۆم دژوو ئێرانی کە دوژمنو ژەنان پەرە بە ئەرەکۊشای بڎریۆ".
سزاو جە قەنارەدای سەرو ۋەرگریکارەو مافەکا ژەنارە پەخشان عەزیزیۍ ڕۊو ٢٣ۍ تەمووزی و حەرپاسە هەمان سزا جە ٤و تەمووزینە سەرو شەریفە محمدیانێرە سەپیا. هەردوویشا جە ماوەو گێرتەیشانە کە چڼین حەفتێ بەردەوام بۍ رووبەڕوو ئەشکەنجەی دژواری و نامرۆڤانەی بیێوە.
جە ئەرەیاۋناکەو کەژەکەینە ئامان، کە بە جە قەنارەدای ئەرەکۊشای ژەنا مەمردۆ و داواش جە رێکوزیا مېیاننەتەوەییەکا و جمیەرەکاو ژەنا کەردەن کە جە دژو دەوڵەتو دوژمنوو ژەنا، پەرە بە ئەرەکۊشای هامبەشی بڎا.
ئەرەیاۋناکەو کەژەکەی پی جۆرەنە: " ژەناو ۋەرکۊتوو کورڎەسانی و ئێرانی جە ساڵەو ٢٠٢٢ بە درووشمەو "ژەنی، ژیۋای، ئازاڎیی" ئاەرەکۊشایشا بۍ، ئشناسنامە و ئازاڎییشا دەس پنە کەرد. جە سەڎەو ٢١ینە، پېسە جمیەرو ژەنا کوردی، فرەو وەختی واتەنما، "سەڎەو ژەنا - شۆڕشوو ژەنان". یاوێنمۍ بە قۆناغێوە چامنە کە ئیتر قسەکېما جە بانگەشۆ فاڕیان پەی واقیعێوە ماددی و تا ئیساتێچ ئینایمۍ چی قۊناغێنە. پېسە ژەناو کوردی نیشانەما دا کە ئێمە خاوەنو دیدگێوەنمۍ تا ئی حەقەتینەیە جە بانگەشەی بەربارمۍ و شۆڕشوو ژەنا بەدی بارمۍ. هەر چی خاڵېنە شۆڕشوو ژەنا ۋەرنیشتی بی بە نموونێوە کە ئی بانگەشەو ئێمەش بە ڕۆشنی دلێنە بەرکۊت. ئی حەقەتینە بی بە ئیلهامبەخش پەی ژەنا جیهانی. ئارۆ جە گرڎ لېوە جیهانیوە ژەنی مڎرامان مکەرا دژوو سیاسەتو قڕکەردەی ژەنا و کۆڵۆنیاڵیزمی و نایەکسانی و کۆیلەکەردەی و دەوڵەتو پیا سالاری. چی ڕوانگۆ ژەنی جە ڕاو ڕاسی "ژەنی، ژیۋای، ئازاڎیی"وە دەنگ و هاوارو ۋێشا بەرزمکەراوە.
جە کاتێنە کە ژیۋای پەی ژەنا و گەلا بیەن بە وەرم، مڎرامانوو ژەنا گۊرە و قەوەت بی. ئی مڎرامانەو ژەنا هەڵای زەحمەتی فرە ڕووبەڕوو سیستەموو پیا سالاری مکەرۆوە. ڕاسی ژەنۍ کە بیەن بە تەرسێوە پەی دەسەڵاتی، ئارۆ هومېڎ بە ئەرەکۊشای گەلا بەخشۊنە، هێز و باوەڕ بەخشۆنە. ئازاڎیی جە ڕاو ژەناوە مۍ دی و ئی حەقەتینە مانای قووڵتەرە بەدەس مارۆ و مۍ وەڵۍ. جە ئاستی جیهانی و دلېینەینە، گرڎوو ئا قەیرانۍ کە سیستەمو دەوڵەتو پیا سالاری وەشش کەردەن، هەوڵمڎا گرڎ ساتێوە ژیۋای خنیکنا. چی سەردەمە ۋناوی و ستەمکاریەنە ژیۋایشا کەردەن بە وەرم و مەعناکېشا دلېنەبەردەن. جە سەردەمێوە چامنەنە ئەرەکۊشای ژەنا پېسە سەرچەمېوە ڕۊشنایی کاریگەری سەرو ژیۋای مرۆڤایەتی منیۆرە.
چی سەردەمەنە دلۍ سیستەمو دەوڵەت-نەتەوەی و پیاسالارینە خراپەی ڕێکوزیا سەرو ژیۋای ژەنارە مسەپیۆ. پی ڕۍ گەرەکشانە گرڎوو ئازاڎی و مافە کۆمەڵایەتییەکا بسەڕاوە. جە قۆناغێوە چامنەنە، ڕژێموو ئێرانی قەرارو جە قەنارەدایش سەرو چالاکەو ژەنارە پەخشان عەزیزیێرە سەپنا. جە بناغەو ئی قەیرانانە کە جیهان و ۋەرکۊتوو مېیامینیشا تەوقە دێنۍ، گەرەکشانە گرفتەکا جەڕاو فشاریوە چارەسەرۍ بکریا. پۊکەی هەر ڕەڎکەردەیۊیۍ ژەنا پەی سیستەمی، چارەسەرو قەیرانەکا و دیموکراسییا. بەڵام دوژمناو گەلی و ژەنۍ، پاگیرێنۍ جە سیاسەتەکا فشار و کۆمکوژی و دلېنەبەردەی. قەرارو جە قەنارەدای دەرهەق بە چالاکا مافەکاو ژەنا ۋەرکەوتوو کورڎەسانی، ماناو قووڵبیەیۆ پشێوییا. ئا مەڵامەتۍ پاڵە پۆ ژەناوە منیا ئەرەپڕا، ئڼەو ئاو و هەوای داوای گرنگېنۍ پەی ژیۋای مرۆڤەکا. ئارۆ جە فرەو شۊنا جیهانیوە ئەرەکۊشای ژەنا بە ئیراڎە و غیرەتی بەرەو وەڵۍ ملۆ. ڕێژیموو ئێرانی کە دوژمنایەتی ژەنا مکەرۆ، سزای قورسە سەرو ژەنە ئەرەکۊشەکارە مسەپنۆ و کۆیلایەتی ڕەها پەی ژەنا بە ڕەوا مزانۆ. ئی دەسەڵاتە بە قەراری پی جۆرە سەبارەت بە ژەنا، گەرەکشا حەقە جە ژەنا بکەرۆوە. ژەنی چا هەرێمانەی فشار چنەشانە فرەن، مجیێرە مېڎانەکا. نزیکەو ٤٠ ساڵان ژەنی کوردۍ دژوو فاشیزمو تورکی مڎرامان مکەرا. مڎرامانوو ژەنا جە دژوو ڕژێمەکاو تاڵیبانی و ئێرانی، گوزارشت چی ڕاسییە مکەرا. دەوڵەتا سەرانسەرو جیهانی پەی دلېنەبەردەی ئەرەکۊشای ئازاڎیی ژەنا، هەوڵمڎا جە ڕاو وەڵێوستەی ڕاوجای نەرم-تنیوە بیەو ۋێشا پارێزنا. گرڎوو ئەرەمەرزیاکا دەوڵەتا دلۍ هامسەنگیێوەنە، ئا نایەکسانییا پارێزنا کە جە کەسایەتی ژەنانە سەرو ژیۋایرە سەپیان، پەی درێژەکێشای ئینەیچ هامکاری یۊترینی مکەرا. ئانەی پاسە مکەرۆ پیا پەیوەس بە گرڎوو نایەکسانییەکا ۋێش ڕێکوزیا بکەرۆ، سەرچەمەکەش دەوڵەتا. پۊکەی جمیەرەکۍ ژەنا و ئەرەکۊشای ژەنا پەی ئازاڎیی کە دژوو دەوڵەتی مڎرامان مکەرا و ۋنەپەرسای جە دەوڵەتی مکەرا، سەرچەمەو سەرەکی تەرسەکا دەوڵەتینۍ. کارەکۍ سیستەمو ستەمکاری پیاسالاری قەڎەغەکاری و فشارکەری و ئەرەگیری و ڕەگەزپەرسی، نمەتاوا ڕا جە ئەرەکۊشای ژەنا بگېرا. چونکی ژەنی ۋەرا ۋەر پی سیستەمەیە سەرەشا بەرزکەردەنۆ، ئا ئەرەکۊشایەی ئیساتۍ مکریۆ، دیارتەرین نیشانۍ ئی حەقەتینەینە. ژەنی ئیتر سەبرشا نەمەن ۋەرا ۋەر بە ئەوەمەڼەو پیایا و ئا فۆرماو ژیۋای کە بەدەسوو سیستەموو پیاسالاری وەشێکریێنۍ.
ئا سیاسەتوو فشار و کوشتەی و گېرتەی و جە قەنارەدای سەرو ئەرەکۊشای ژەنارە سەپیۆ، سیاسەتوو دوژمنایەتی ژەنان. عال ئینەی مزانمۍ و ئی سیاسەتا ڕەڎۍ مکەرمېوە. ڕژێموو ئێرانی دوژمنوو ژەنان، ئانەی نمەوینۆ، یان گەرەکش نیا بوینۊش کە ژەنی هێزو مڎرامانیشا بەدەسئاوردەن. شمە نمەتاودۍ بە کارەکا پېسە جە قەنارەدای و قەڎەغەکەردەی و فشاری و ئەشکەنجەی هێزو ئەرەکۊشای ژەنا دلېنەبەرا.
ئەرەکۊشای گەلا و ژەنا ۋەرا ۋەر پی کارا مبۆ بە مایۍ دلێنەشیەیتا. ژەنی حەجگیز جە ئەرەکۊشای ۋێشا پەشیمانۍ نەبیێنێوە و دەس جە ئەرەکۊشای هۊرنمەگێرا. بەپێچەوانۆ ۋەرا ۋەر بە ستەم و فشارو ژەنا، ئەرەکۊشایسا گۊرەتەر مکەرا. جە کورڎەسانەنە ژەنی بە ئەرەکۊشای و جۆش و ئازایی ۋێشا نیشانەشا دان کە دەس جە مافوو ۋێشا هۊرنمەگېرا. پۊکەی داوا جە ڕژێموو ئێرانی دوژمنوو ژەنا مکەرمۍ، با دەس جە هەرمانە قیزەونەکاش دژوو ژەنا هۊربگېرۆ.
تەئکیدش مکەرمېوە، هۊرشێونایۆ قەرارەکا جە قەنارەدای و گۊشگێرتەی پەی داوا ڕەواکاو ژەنا و پەی بیەو خودو ڕژێمەکەی فرە گرنگا. سیاسەتوو ئەوەمەڼەو جە قەنارەدای نمەبۆ بە ئاستەنگ ۋەردەم و ئەرەکۊشای ژەنانە. نمەتاوا بە سزاو جە قەنارەدای، گلېرگە و ژەنا مردندۍ. دەسەڵاتەکۍ هەر چۆنێ با، ژەنی دەس جە ئەرەکۊشایشا پەی ئازاڎیی و دیموکراسی هۊرنمەگېرا. سەرەڕاو گۊرەتەرین کارە خراپەکا، ئەرەکۊشای ژەنا نمەمدرۆ و ۋەر وەڵاتەر بیەنۆ. چێگەیچۆ، داوا جە گرڎوو ڕێکوزیا مېیاننەتەوەییەکا و لایەنە دیموکراتیکەکا و جمیەرەکاو ژەنا و کەسەکا مکەرمۍ، ۋەرا ۋەر بە کارەکاو ڕژێموو ئێرانی کە جە زیڼان و گرڎوو بوارەکا ژیۋاینە دژوو ژەنا مسەپنۆش، هەڵوێسوو ۋێشا نیشانە بڎا و ئەرەکۊشای هامبەش گۊرەتەر بکەرا".
