سیاسەتمەدارەی زیندانیکریێ لەیلا گوڤەنە نامەش پەی ١٦ باڵیۆزخانا ئەنقەرەنە کیانا، نامەکەنە واتەنش مشۆم دەمودەس پەی چارەسەریی پەرسەو کوردی بگنانە جموجووڵ، چەنی وەردەنگی سەرەکی ڕابەروو گەلوو کوردی عەبدوڵا ئۆجالانی دیالۆگ بکریۆ. 

هامسەرۆکەی وەڵینەو کۆنگرەو جڤاکی دیموکراتیک (دەتەکە)ی، سیاسەتمەدارە لەیلا گوڤەنە زیندانوو ژەناوە سینجانۆ نامێوەش کیانا. نامەکەش پەی ١٦ نوێنەرایەتییاو ئەنقەرەی کیانا، بانگەوازش جە نوێنەرایەتییە دیپلۆماسییەکا کەرد پەی چارەسەروو پەرسەو کوردی دەور بگێڵنا. گوڤەنە نامەکەنە ماچۆ چارەسەری ئاشتییانە بە ئیمراڵیرە مویەرۆ و پەنەوازا پڕۆسیوی تازەو چارەسەری دەس پەنە بکەرۆ. 

"وەردەنگ ئۆجالانا" 

گوڤەنە ئەرەمیاونۆش مشۆم پەی ئاشتی وەرپەرسی بگێردێ گەردەن و پڕۆسێوی تازەو ئاشتیی دەس پەنە بکەرۆ و ماچۆ: "گردوو زیندانەکانە، بەتایبەت ئیمراڵیینە گۆشەگیریی تند هەن. تا ئی پاشێلکاری و ئەشکەنجە دماییش نێ، قۆناغێوی تازە دەس پەنە نمەکەرۆ. وەختێو وەڵاتوو کوردا سەروو چوار پارچارە بەش کریا، وەرپەرسیی شمە چینەینە هەن، دەمودەس دەور بگێڵنا. نامونیشان ئیمراڵییا. وەردەنگی سەرەکی عەبدوڵا ئۆجالانا".

ئەو باڵیۆزخانێ نامەشا پەی کیانیان:

" باڵیۆزخانەو ئەمریکای ئەنقەرەنە، باڵیۆزخانەو ئەڵمانیای ئەنقەرەنە، باڵیۆزخانەو نەمسای ئەنقەرەنە، باڵیۆزخانەو بەلژیکای ئەنقەرەنە، باڵیۆزخانەو بەریتانیای ئەنقەرەنە، باڵیۆزخانەو دانیمارکی، باڵیۆزخانەو فەڕەنسای، باڵیۆزخانەو فینلاندی، باڵیۆزخانەو هۆڵەندای، باڵیۆزخانەو ئیسپانیای، باڵیۆزخانەو سویدی، باڵیۆزخانەو ئیتاڵیای، باڵیۆزخانەو کەنەدای، باڵیۆزخانەو نەرویژی، باڵیۆزخانەو پورتوگالی، باڵیۆزخانەو یۆنانی".