جە ٢٨ەمین ساڵیادوو گەشمەردەبییەی زیلانێنە، کە ساڵەو ١٩٩٦ دژوو دەوڵەتوو تورکی چالاکیی فیداییش کەرد، ڕژاک ئەرەیاوناێوە نویسیاش وەڵا کەردۆ و ئەرەمیاونۆش چالاکییەکەو زیلانێ بییەن بایسوو بنیاتنیای ڕاو ئازادیی ژەنا.

ئەرەیاونایەکەو ڕژاکینە ئامان: "ساڵیادوو هامڕا زیلانێنە گردوو گەشمەرداو ڕاو ئازادیی یاد مکەرمێوە. مانگەو حوزەیرانینە پۆلێ ژەنی شۆڕشگێڵنێ پێسەو گەشمەردە زیلانێ، سەما یوجەی، لەیلا ئاگری، بێریڤان، ڕاپەڕین ئامەد، گوڵان، لەیلا یڵدزێ و فرەو ژەنای تەرێ کۆشەرێ وێگەرەکنەبیەیانە هەنگامەشا نیا و پەی شکۆو خاکی و گەلەکەیما گیانوو وێشا فیدایی کەرد، یادوو گردیشا بەرز مرمانمێ. زیلانە دەنگێوی پەڕ جە وەشەسیاینە پەی ڕابەرەکەیش، گەلەکەیش و ئینسانی و ژیوای، دەنگێوە بێ، کە هاوارش کەرد پەی ئازادی و بێدەنگییش ماڕا و واتش: "ئانە کە دەسیش درێژ مکەرۆ پەی خاکیم نمەیاوۆ بە ئامانج".

درێژەو ئەرەیاونایەکەینە ماچۆ: "پەی ئەوەگێڵنای جەوهەروو ژەنێ، زیلانە بانگش دا گۆشێ تاریکەشەوەو ئانیشارە نکۆڵیی جە ژەنبییەی مکەرا، نیشانەش دایمێ کە ژەنبییەی  ڕاگێر نییەن جە قەرار و هەنگامەنە پەی کۆشیای ئازادیی. ژیوای ئازاد بە عومردرێژی نییەن و واتش "من فیداکەردەی گیانیم، ژیوای نەمریم مخولقنوو، کە شایسەو گەلەکەیم بۆ".

ڕژاک ئاخروو ئەرەیاونایەکەیەنە ماچۆ: " ساڵیادوو گەشمەردە زیلانێنە داوا جە گردوو ژەنا مکەرمێ، پەی گێڵایۆ شکۆو ژەنێ و کۆشیای نەتەوەیی و خاکێما یەکڕیزێ بیمێ، چونکوم بە ئازادیی ژەنێ جڤاک و تەماموو ئینسانی و ژیوگەی ئازادێ بانە، بەپێچەوانەوە و بەبێ ئازادیی ژەنێ، ژیوای و شکۆو ئینسانی پێسەو سهۆڵوو وەروو وەری و پووشێوی سۆتەی دلێنە مشۆ".