لە درێژەی گردبوونەوەکەی ئیستنەبوڵ دژی دەستبەسەراگرتنی شارەوانی جولەمێرگ، بە ئامادەبوونی دەیان هەزار کەس، هاوسەرۆکی شارەوانی جولەمێرگ ڤیان تەکچە قسەی کرد.

کاتێک ڤیان تەکچە هاتە سەر سەکۆ، درووشـمی "ژن، ژیان، ئازادی" و "بژی بەرخۆدانی جولەمێرگ" بەرزکرایەوە.

ڤیان تەکچە سڵاوی هاوسەرۆکی شارەوانی جولەمێرگ محەمەد سدیق ئاکیشی گەیاندە ئامادەبووان و ڕایگەیاند تێکۆشانی گەلی کورد هەردەم ڕووبەڕووی هێرش بووەتەوە، ئەوە ٨ ساڵە دەسەڵاتی ئاکەپە-مەهەپە دژی ئیرادەی گەلی کورد قەیوم دادەنێت، سێیەم جارە لە جولەمێرگ سیستەمی قەیوم دادەنرێت، گوتی: "ئەوەی ئەمڕۆ پشتگوێ دەخرێت تەنها ئیرادەی جولەمێرگ نییە، بەڵکو ئیرادەی تورکیاشە".

هەروەها ڕایگەیاند قەیوم کودەتایە دژی خۆبەڕێوەبەری شارەوانییەکان و دژی خزمەتکردنی سرووشت و ژنان و خاوەن پێداویستییەکانە.

ڤیان ئاماژەی بەوە کرد لە هەڵبژاردنەکاندا ئاکەپە هەموو دامەزراوەکانی حکومەت و هەموو سەرچاوەکانی خستە خزمەتی خۆیەوە، بەڵام گەلی جولەمێرگ دەم پارتی هەڵبژارد، قەیوم تەنها پرسی جولەمێرگ نییە بەڵکو پرسێکی هاوبەشە، بۆیە لێرە هەمووان پێکەوە بەرخۆدان دەکەن. هەروەها گوتی: "دانانی قەیوم پیشانی دەدات، دەسەڵاتی ئاکەپە-مەهەپە دەسەڵاتێکە دژی ژنان و گەنجان و کوردان".

هەروەها گوتی: "ئەگەر قەیوم شارەوانی جولەمێرگ بەڕێوەببەن و ئێمە بێدەنگ بین، ئیرادەی گەل لە ئیستەنبوڵیش دەکەوێتە مەترسییەوە". پاشان گوتی: "بۆیە پاراستنی ئیرادەی جولەمێرگ، ئەرکی هەمووانە".

لەکۆتاییدا ڤیان گوتی: "درووشمی تێکۆشانە هاوبەشەکەمان دووبارە دەکەمەوە "ڕزگاری بە تەنها نابێت، یان هەموومان پێکەوە یان کەسمان. درووشمی تێکۆشانی ئازادیمان "بەرخۆدان ژیانە"یە. بەرخۆدانی ئیستەنبوڵ دەگاتە جولەمێرگ و ئێمە سەردەکەوین".

پاش وتەکانی ڤیان تەکچە درووشمی "ژن، ژیان، ئازادی" و "بژی سەرۆک ئاپۆ" بەرزکرایەوە.