گونو ئەرتاش ڕاگەیاندراوەکەی خوێندەوە، ڕایگەیاند تا دەسەڵاتی ئاکەپە-مەهەپە بمێنێت، هێرشەکانی بۆ سەر جڤاک بەردەوام دەبێت، گوتی: "دەستبەسەراگرتنی شارەوانی جولەمێرگ ئامرازی سەرکوتکردنی ماف و تێکۆشانی ئازادی کوردانە".

لە جولەمێرگ دەریان دەکەین

ئەرتاش ڕایگەیاند دەسەڵات لەڕێگەی دەستووری نوێ و "نەرمبوون"ـەوە دەیەوێت جڤاک کۆنتڕۆڵ بکات، لەڕێگەی نەتەوە پەرستییەوە دەیەوێت جڤاک لەیەک داببڕێت، هەوڵدەدات شارەوانییەکانی دەم پارتی لەڕێگەی کودەتاوە زەوت بکەن. گوتی: " هێرشی قەیوم لە وان بە ئیرادەی گەل شکێنرا، ئەمڕۆش لە جولەمێرگ دەیشکێنین. بەم گردبوونەوەی ئەمڕۆ، هەنگاوێکمان لە تێکۆشانی یەکگرتوو دژی داگیرکاری و فشار و کودەتای قەیوم هاویشت. بە بەهێزکردنی ئەم هەنگاوانە، گۆڕەپانی هاوبەشی تێکۆشان مەزن دەکەین و وەڵامی هێرشەکان دەدەینەوە".

تێکۆشان بۆ ئازادی بەردەوام دەبێت

هەروەها ئەرتاش ڕایگەیاند چینی سەرمایە و حکومەتی ئاکەپە-مەهەپە لە زیادبوونی تووڕەیی کرێکار و ڕەنجدەران و گەنجان و گەلانی هەژار و بێ پاشەڕۆژ دەترسێت، بۆیە فشار و هێرشەکان زیاتر دەکات، لە ١ ی ئایار گۆڕەپانی تەقسیمیان داخست و کەسانی ناڕەزایان دەستگیرکرد، گوتی: "ئێمە بۆ ئازادی ١ ی ئایار، بۆ تەقسیم، بۆ زیندانیان، درێژە بە تێکۆشان دەدەین".

ئەرتاش ڕایگەیاند بە دۆزی گەزی و کۆبانێ و گرتنی سیاسەتمەداران ناتوانن تێکۆشانی ڕەوای گەل ئاستەنگ بکەن. ڕایگەیاند ئەوانەی نانی کرێکاران دەبڕن و ئەوانەی دەیانەوێت ئیرادەی سیاسی گەلی کورد بدزن هەمان هێزن، جەختی کردەوە دژی هەوڵی ئیمپرالیستەکان و هاوکارەکانیان بۆ بڵاوکردنەوەی شەڕ لە دژی گەلان لە هەرێمەکەدا، تێکۆشان فراوان دەکەن.   

هەروەها تیشکی خستەسەر دووڕوویی دەسەڵاتی ئاکەپە-مەهەپە پەیوەست بە دۆزی فەڵەستین و پەیوەندی بازرگانی دەوڵەتی تورک لەگەڵ ئیسرائیل، ڕایگەیاند ئەم بازرگانییە واتای هاوبەشییە لە کۆمەڵکوژی گەلی فەڵەستین و گوتی: "بۆ پچڕاندنی هەموو پەیوەندییەکان لەگەڵ ئیسرائیل بەتایبەت پەیوەندی بازرگانی و سەربازی، تێکۆشانمان فراوانتر دەکەین".

بانگەوازی لە کرێکار و ڕەنجدەران و گەلانی بندەست کرد خاوەندارێتی لە ئیرادەیان بکەن، لە هەموو گۆڕەپانێک تێکۆشانی هاوبەش دژی ستەم و قەیوم پێش بخەن، گوتی: "بانگەوازتان لێ دەکەین، بۆ ئافراندنی جیهانێکی یەکسان و ئازاد و خاڵی لە شەڕ و چەوسانەوە، سەفەربەر بن".