محەمەڎ ئۆجالان براو رابەروو گەلوو کورد عەبدوڵا ئۆجالانی جوابوو وەزارەتوو دادوو تورکیش داوە، کە نکۆڵیش جە بیەو گۆشەگیری کەردەبۍ، چا بارۆ ئەرەیاۋناش: "ئەگەر گۆشەگیری نییا، پەی چێشی ڕا مەڎا سەردای ئیمراڵی بکەرمۍ".
ماوەو زیاتەر جە ٣٧ مانگان هیچ هەواڵ و زانیاریێوە جە بارەو رابەروو گەلوو کوردی عەبدوڵا ئۆجالانی و هەریۆ جە حامیلی یەڵدرمی، عومەر خەیری کۆناری و وەیسی ئاکتاشی مەزانیۆ کە جە زینڎانوو ئاسایشی بەرزوو جۆری ئێفی ئیمرآڵینە ئینۍ گۆشەگیری رەهانە.
جە ڕووانی ۋییەردەنە ڕاوەبەرایەتی کاروباروو زینڎانەکا سەر بە وەزارەتوو دادو تورکیای جە جوواب و سەرۋنەدای ٧و کانوونوو یووەم و ٢٠٢٣ۍ فراکسیۆنوو دەم پارتی پەی لوجنەو ئەوەکۊڵیای مافەکا مرۆڤوو پەرلەمانی، جە بارەو بیەی گۆشەگیری ئیمراڵیوە بانگەشەو ئانەیش کەردەبۍ"کە ئیمراڵینە گۆشەگیری بیەیش نییا، عەبدوڵا ئۆجالان و زینڎانیا تەری ئیسفاڎە جە مافەکاشا هۊرگێرا".
ئا بانگەشە کاروەدای پارێزنەرا و بنەیانەو زینڎانیا ئیمراڵیش ۋنەکۊتۆ. ڕۊو شەممەی نوسینگەو یاسایی سەڎەی ئا بانگەشەشە بە تەمامی رەڎکەردۆ و جەختش جە بیەی گۆشەگیری رەهای جە ئیمراڵینە کەردۆ.
هاموەخت محەمەڎ ئۆجالان براو رابەروو گەلوو کوردی عەبدوڵا ئۆجالانی جە دیڎارێنە چنی ئاژانسوو مێزۆپۆتامیای ئەرەیاۋناش: "وەزارەت نوێنەرایەتی دەوڵەتی مکەرۆ، زیاتەر جە ٣٧ مانگان ئاگاما جە سەرۆکی نییا، مشۊم دەوڵەت و وەزارەتوو دادی حەقەتینەکا واچا، گەر ئینە گۆشەگیریی نییا ئەی چێشا؟ گەر ماچا گۆشەگیریی نییا، با نامێوەش پەی بێزاوە، سەرۆک وەڵتەر زینڎانوو ئیمرالینە بۍ، بەڵام ئیساتۍ ئینا چکۆ مەزانمۍ! چا چێش گوزەر مکەرۆ مەزانمۍ! با وەزارەت جووابێوە بڎۆوە، گرڎوو زینڎانیا مافشا هەن، ئێمەیچ گەرەکمانە ئیسفاڎە چا مافا هۊرگێرمۍ، ئینە یاگۍ هەرمانۍ نییەنە، مافێوەش هەن، ساڵانێوەن زانیاریی جە بارەشۆ هۊرمەگێرمۍ، گەر ئینە گۆشەگیریی نییا، ئەی چێشا؟".
واتیچش: "تا دیڎارش چنی ئەنجام نەڎریۆ کەس باوەڕ بە مافی و داد و دادپەروەریی مەکەرۆ، سەرۆک کەسێوە ئاسایی نییا، کوردەکۍ پېسە ڕابەروو ۋێشا بە بنەماش گێرا، دەسەڵاتداراو تورکیای ئینەی قبوڵ کەرا یان نا کێشەو ۋێشانە، کوردەکۍ ساڵانێوە پېسە ڕابەروو ۋێشا نیانشارە".
محەمەڎ ئۆجالان، سەرنجش وست سەروو چالاکییەکاو هەڵمەتەو ” ئازاڎیی پەی عەبدوڵا ئۆجالانی، چارەسەریی پەی دۆزوو کوردی” و پەشتگیرییەکا چا هەڵمەتۍ و واتش: "گەر نەتاومۍ ڕابەری ئازاڎ بکەرمۍ ئانە دێر گنمۍ، ئا کەسۍ ماچا ئێمە دیموکرات و ڕۆشنۋیرێنمۍ، مشۊم کاروەدایشا دژوو ئا گۆشەگیرییە بۆ."
براو رابەروو گەلوو کوردی ناڕەزایەتیچش ۋەرا ۋەر بە ئازاد نەکەردەو وەیسی ئاکتاشی نیشانەدا کە سەرەڕاو ئانەی ماوەو سزاکێش کە ٣٠ ساڵێن و وەختەکەش تەمام نان، بەڵام ئازاڎ مەکریۆ و بە قەراروو دەسەو چەمڎاری و کارگێڕی زینڎانی ماوەو ساڵێوە تەری مشۊم زینڎانەنە مەنۊوە.
