ئاتوسا موراڎیە، چالاکەو مافەکا ژەنا سەبارەڎ بە گۆشەگیری سەروو ڕابەروو گەلوو کوردی عەبدوڵا ئۆجالانی هەڵوێسش نیشانەدا و واتش:"مشۊم جە ڕاو سەرهۊردای و چالاکییەکا مافوو مرۆڤیۊ جە ۋەران ۋەروو زینڎانی کەرڎەی ڕابەر ئاپۆینە بێدەنگۍ نەبیمۍ."
سەپنای گۆشەگیری ڕەها سەروو ڕابەروو گەلوو کوردی عەبدوڵا ئۆجالانیرە و بەبارمتەگېرتەیش جە زینڎانوو ئیمرالینە جە ساڵەو ١٩٩٩یۊ بەردەواما و بەتایبەت ماوەو ٣ ساڵان حیچ زانیاریېوە جە ئاژەیشۊ هۊرمەگیریۊ. بەردەوام بیەی ئی ئاژەیە دلۍ گەلوو کوردینە، جە لایەن و ئازاڎیوازا و هێزە دیموکراتیکەکاوە کاروەدایش ۋنەکۊتەنۊ. پەی ئازاڎیی جەستەیی ڕابەروو گەلوو کوردی و چارەسەری پەرسوو کوردی، جە ١٠و تشرینی یوۋەمینە هەڵمەتێوە چېروو نامۍ "ئازاڎیی پۍ عەبدوڵا ئۆجالانی و چارەسەری سیاسی پۍ پەرس و کوردی" زیاڎ جە ١٠٠ شۊنمایا و وڵاتا جیا جیاو جەهانینە بەردەواما. پاڵپەشتی کەرڎەی ئی کەمپینەیە جە لایەن و چینی ڕۊشنۋیری، سیاسەڎمەداری، دیمۆکرات و ئازاڎیوازا جەهانی بەتایبەتی گەلوو کوردی ڕۆ دماو ڕۊی ئینا پەرەئەساینە.
ئاتوسا موراڎیە، چالاکەو مافەکا ژەنا پېسە چالاکێوە ژەنۍ جە وتو وێژێوەنە چنی ئاریەن تیڤی پاڵپەشتی ۋېش پۍ هەڵمەتەکۍ ئەرەیاۋنا و پەی ئازاڎیی جەستەیی ڕابەروو گەلوو کوردی عەبدوڵا ئۆجالانی پەنەوازەن سەرهۊردای و چالاکییەکۍ وەرفراوان کریا.
دەقوو چەمپنەکۊتەکەی پی جۊرەنە؛
بەڕێز ئاتوسا موراڎیە حەرپېسە مزاندۍ کە زیاتەر جە دووۍ ساڵان پارێزنەر و بنەیانەو بەڕێز ئۆجالانی ڕاشا پنەمەڎریۊ سەردای ئیمرالی کەرا و دیڎار ئەنجام بڎا، پۊکەی حیچ زانیاریېوە سەبارەڎ بە تەندروستی بەڕێزیشا وەردەس نییا. هۊرسەنگنای شمە چی بارۊ چېشا؟
دیارا بە زینڎانیکەرڎەی جەستەیی ڕابەر ئاپۆی، نەتاوانشا فەلسەفەو ڕابەر ئاپۆی زینڎانی کەرا. ئیسە ئی فەلسەفە بیەن بە ئالتەرناتیڤ و چارەسەرێوە پۍ گەلوو کوردی و موینمۍ جە سەرهۊردا دلېینەکانە نەک حەر گەلوو کوردی بەلکم گرڎوو گەلا ئێرانی بە کورد، عەرەب، ئازەری، بەلوچ و فارس-ۆ دروشمەو"ژەنۍ، ژیای، ئازاڎیی"یشا بەرز کەرڎەنۊ. ئی دروشمۍ گوزارشت جە فەلسەفەو ڕابەر ئاپۆی کەرۊ. ئێمە پېسە گەلوو کوردی مەبۊ بێدەنگۍ بیمۍ جە ۋەران ۋەروو فشارەکا سەروو ڕابەر ئاپۆینە، بە پەرەپنەدای سەرهۊردای و چالاکییەکا مشۊم ڕا جە فشارەکا سەروو ڕابەر ئاپۆی گېرمۍ.
پۍ ئی مەڵامەتیە چېش گنۊ سەروو شاناما؟
مشۊم حۆڵ دەیمۍ یۊگېرتۍ بیمۍ و بە پەیوەنڎیکەرڎەی چنی ڕێکوزیاکا مافوو مرۆڤی، بتاومۍ فشارەکا سەروو ڕابەر ئاپۆی کەم کەرمېوە. پی چالاکییا وڵاتەکۍ ئیتر مەتاوا جە وەران وەروو ئی پرسەینە بێدەنگی برمانا.
