جەنگ تەنیا جە بەینوو گەریلای و ئەرەگیرانە نییا؛ هێزە نۆکەرەکۍ تەمەنوو دەوڵەتو تورکی درێژ مکەراوە. سەرەڕاو گرڎ چېوۍ گەریلا بە مڎرامانی شکۆدارو ۋێش درێژە بە سەرکەوتەی مڎۆ. زەینەلەکۍ سەردەمی مەحکومێنۍ بە شکسی.
جە سەڎەو ٢١ینەکە دەرفەتەکۍ پەی دیموکراسی و ئازاڎیی و یاۋێنۍ بە بەرزتەرین ئاست، ئایا کێ ئانەش گەرەک نیا؟ کێ ئەویندارو جەلادەکەو ۋێشا، کێ جە ناخۆ کۆیلایەتیش گەرەکا؟ نمونەی هەرە دیارو ئانەی جە کەسایەتی بنەیانەو بارزانینە موینیۆ. مڎرامان، دەسهۊرنەگېرتەی جە خاکی و ئازاڎیچ جە کەسایەتی گەریلاینە بەرجەسەبیەن.
مزانیۆ کە جە تاریخوو سەرهۊرداکاو کورڎەسانینە خیانەتوو دلێینەی بەردەوام بیەن بە مەڵامەتوو شکسوو سەرهۊردایەکا. هێڵەو خیانەتکاری و هامکاری کە دێرسیمەنە جە کەسایەتی زەینەلی و رابەرەکانە سەرشهۊردابۍ، جە کەسایەتی بنەیانەو بارزانینە ۋێش تازە مکەرۊوە. بەڵام بێگومان ئا هێزەی حەجگیز دەسبەردارو سەرکەوتەی نمەبۆ هێزو گەریلاین. دەوڵەتو تورکی ئەرەگیری و هێزە هامکار و داردەسەکاو پەدەکەی ئینۍ دامەو تاریخینە. ۋەروو ئانەی پاسە لێکشمڎاوە کە بە گەمارۆدای مەنتیقەکا، هرووژمی ئاسمانی و کۊتەی دلۍ هەرێمەکاو پارېزنای مەدیای دمایی بە جمیەری ئاپۆیی مارانە. بەڵام ئا پارتەی کە بە کەمتەرین دەرفەت و بە هێزی جەوهەری ٥٠ ساڵێن جەنگ مکەرۆ، ئا هەوڵ و هرووژمۍ ئاڎیشاش پوچۍ کەردێنێوە و پوچېشا مکەرۆوە. حەرپۊکەی ئەرەگیرەکۍ حەجگیز مەرامەکاشا نمەپێکا.
جە مەتیناوە تا سەرگەلێ جەنگ جەنگوو گیانبازییا
٣ۍ تەمووزیۆن تورکی ئەرەگیر بە هامکاری پەدەکەی دەسش بە ئۆپراسیۆنێوە تازەی کەردەن. جە ڕاو ئامایشا پەی کەشو وەهاری و سەرگەلێ گەرەکشانە گوایە قوفڵوو ئۆپراسیۆنو پەنجەی بوزارە. هەرپۊکەی پېسە ئانەی جە وڵاتو ۋێشانە جماوە، دلۍ خاکو پانیشتوو کورڎەسانینە و شارەکانە دەسوو ۋێشا شانارە و رووەشا کەردە مېڎانەکا گەریلای. بەڵام گەریلاکاو ئازاڎیی کورڎەسانی کە گرڎ کاتۍ پېشئامایشا پەی هەنگامەکاو دەوڵەتو تورکی کەردەن، جە ئاماڎەکاریێوە قەوەتەنە چەمەڕاو ئاڎیشا بێنۍ. جە ڕۊو ٣ۍ تەمووزیوە تا ئیساتۍ گەریلا بێ مردای چالاکی کاریگەر ئەنجام مڎا. جە ڕاو گورزە شانای جە سکۆرسکیەکاوە ڕا نمەڎا سەروازەکاشا وەزنارە. سەرو زەمینیچۆ بە دایۋنەی کاریگەر، ئانۍ کە هەنۍ دلېشانە مبەرا. بە چالاکی جە ڕاو ئامرازی ئاسمانیچۆ مۆڵگە و سەروازەکا دلېنە مبەرا. حەرپۊکەی تا ئا کاتەی کە گەریلاکاو ئازاڎیی ئەرەگیرا چا شۊنانە بەرپڕنا جەنگێوە فیدایی بەردەوام مبۆ.
ئانەی بەتەماو هامساین، مشۊم بێ نان سەرە بنیۆوە
بێگومان ئەگەر جەنگ تەنیا بەینوو گەریلای و ئەرەگیری تورکینە بیۍ، دەوڵەتو تورکی دەمۍ بۍ دلېنەشیەبۍ. بەڵام هێزە خیانەتکارەکا گرڎ ڕووۍ تەمەنوو ئاڎیشا درێژمکەراوە و سەودا و مامەڵە بە خاکو پانیشتیوە مکەرا. چنی بۆ مرۆڤ ئەویندارو بکوژاو ۋێش بۆ؟ بەڵام بنەیانەو بارزانی کۊرانە مامەڵە مکەرا و ڕا پەی ئەرەگیرا مکەراوە. ئاڎۍ هەڵەبجە و ئەنفالشا جەیاڎۍ کەردێنۍ. حەرپاسە ئا ئەڵغامۍ جە خاکو پانیشتینە چەقیێنۍ زەمینەنە لایەزال تائیساتێچ خەڵکی زامڎار مکەرا و بانۍ بە مەڵامەتوو مەردەیشا، ئانێچشا جەیاڎ کەردەن. بەڵام مرۆڤ نمەتاوۆ ئا ئاژەیە بە جە یاڎکەردەی وەسف بکەرۆ. ۋەروو ئانەی پەدەکە حەجگیز حیچ چێوێش پەی گەلوو کوردی نەکەردەن. گرڎ کاتۍ پەی مەسڵەحەتوو ۋێش هەرمانەش کەردێنە و پی جۆرە جە دەسەڵاتەنە مەنێنێوە. هێزێوە دەسەڵاتداریچ گرڎ چێوۍ بە موڵکو ۋێش موینۆ. هەرپۊکەی ئارۆ خاکوو پانیشتی ورەشۆنە، بۆردومان مکریۆ و ئێرش ۋەر مڎریۆنە. پاسە خیاڵ مکەراوە کە دەوڵەتو تورکی مبارەکبایشا ۋنە مکەرۆ و کورڎەسانی سەرو سینیێوە ئاڵتونی رادەسوو ئاڎیشا مکەرا. بەڵام پەنەوازا قۆناغەو رێفراندۆمی بارمېوە یاڎ. مشۊم بزانا پەنەوازا کە ئا دەسەی ئارۆ بەرەولاشا درێژ مکریۆ، سەوای مبۆ بە شمشێرۍ و ڕێخەشا بەرمارۆ. ۋەرووئانەی، حەقەتینوو پەدەکەی راسی ئا قسە نەستەقۍ یاڎ مارۊوە کە "ئانەی تەماهارو سواربیەو ئەسپو خەڵکین گرڎ کاتۍ بەپێ مشۊم بلۆ یاخود ئانەی بە تەماو هامسای بۆ بێ نان مشۊم سەرەبنیۆوە".
رۆڵەکۍ ئی خاکیە وەڵینگەشا جە یاڎ نمەکەرا
حەرچڼە پەدەکە حەقەتینەکا جە یاڎ بکەرۆ، بەڵام قارەمانتەرین و ئازاتەرین رۆڵەکێش ئینەی جە یاڎ نمەکەرا. گەریلاکاو ئازاڎیی بە چالاکیەکاشا کە گورزە جە ئەرەگیرا مشانا، نیشانەش مڎا کە ئاڎۍ حەقەو وەڵینگەو دوور و نزیکی و کیمیاوارانەکا مکەراوە. پېسە جە پەلیانەکانە بەرکۊت، تورک خاکو پانیشتی پېسە موڵکو ۋێشا موینا، حەرپۊکەی چنی لوایشا پەی دلۍ مەنتیقەکەی ماچا "خېربەیدۍ پەی تورکیای". گەریلاکاو ئازاڎیچ بە چالاکیەکاشا پنەشا ماچا "خێربەیدۍ پەی کورڎەسانی".
گەریلا بەهێزێوە کە جە مڎرامان و جەنگوو رابەر ئاپۆیۆ جە ئیمراڵینە هورش مگېرا، ئارۆ جە مېڎانەکا مڎرامانینە پێرفۆرمانسێوە بێهامتا نیشانە مڎا. ئاڎۍ بە ئاوردەینەو تاکتیکی، بە ئاستێوە بەرز و گەریلایەتی سەردەمیانەیۆ ئاستو جەنگی و سەرکەوتەیشا یاۋنان بە قولەپۊپە. جە هەمان کاتەنە بە چالاکی تازەی ڕوانەی قەرارداری و پاگیری سەرکەوتەی و کورڎەسانی ئازاڎیی بە جیهانی نیشانە مڎا.
