ناگیهان ئاکارسەلە کە جە ٤و تشرینی یووەموو ٢٠٢٢ ێنە جە سلێمانی گەشمەرڎۍ کریا، حەلەبەنە بە کەردەیۆ بنکێوە ۋەنایۆی بە نامۍ یانەو ۋەنایۆی گەشمەرڎۍ ناگیهان ئاکارسەلۍ یاڎە مکریۆوە. یانەو ۋەنایۊی ناگیهانۍ بیەن بە یاگێوە پەی پەرەپنەدای بە ۋەنای و ۋەنایۊی.
یانەو ۋەنایۊی گەشمەرڎۍ ناگیهان ئاکارسەلۍ کە جە ساڵەو ٢٠٢٣ێنە جە گەڕەکەو شێخ مەقسودوو حەلەبینە ئەرەمەرزیا، چاندوو ۋەنایۆی چنەشەنە گەشە مکەرۆ و بیەن بە شۊنێوە پەی پەشتیوانی گلېرگەی.
ئەندامەو ناوەندی ژنۆلۆژی حەلەبی فەریدە موسا باسش جە گەشەکەردەی و بەقوەتبیەی کلتوروو ۋەنایۊی جە یانەو ۋەنایۆو گەشمەرڎۍ ناگیهان ئاکارسەلێنە کەرد و واتش: " یانەو ۋەنایۆی گەشمەرڎۍ ناگیهان ئاکارسەلۍ بەرەو ۋەنایۆی پەی گرڎوو تەمەنەکا کریاوە. جە گرڎوو بەشەکاو گلېرگەینە کتێبێما هەنۍ. سەرەڕاو کتێبۍ کوردیۍ، حەرپاسە بە زۋانەکا عەرەبی و ئینگلیزیچ کتێبێما هەنۍ. پۊکاتی هەم پېسە یاگێوە پەی ۋەنایۆی و هەمیچ پەی ئانەی خۊنکارا بتاوا هەرمانوو کاروو ۋەنایشا بکەرا، مەیانە ئی یاگۍ."
فەریدە موسا باسش چانەیچ کەرد بەمەڵامەتوو بیەی یانەو ۋەنایۆو گەشمەرڎۍ ناگیهان ئاکارسەلێوە نەریتوو ۋەنایۆو گەنجا گەشەش کەردەن و جە گرڎوو بوارەکانە کتێبۍ هەنۍ و واتش: " ئانۍ کە سەردای یانەو ۋەنایۊی گەشمەرڎۍ ناگیهان ئاکارسەلۍ مکەرا بەشێوەو گرووپیچ سەروو ۋەنایۆو کتێتبی گفتوگۆ مکەرا، پۊکەی چێگە خۊنکارۍ جگە جە ۋەنایۆو کتێبی و ۋەنەکا ۋەننگەی، کتێب جە بواری تەریچەنە مواناوە و بیەن بە مەڵامەتێوە پەی ئانەی خۊنکارۍ ویرۆکەردەیشا گەشە بکەرۆ. جە سەردەموو ئارۊیمانە خۊندکارۍ وەختێوە فرە جە دیجیتاڵ میدیانە بەکاربەرا، پۊکاتی زەحمەتا بتاوا جە ڕوو فکرییوە گەشەبکەرا، بەڵام وەشحاڵانە جە ڕاو یانەو ۋەنایۊیۆ متمانەو ئانەیما وەشکەردەن بیمۍ هاندەرۍ پەی ئانەی خۊنکارا و ۋەنەرا ئاشنایەیی چنی ۋەنایۊی وەش بکەرا."
