جە کۆنفرانسێوەنە کە جە تەرەفوو پارێزنەراوە جە فەرەنسانە ڕێکوزیا بۍ گفتوگۆ سەروو زیاڎبیەی فشارەکا سەروو کوردا کریا. پارێزنەر ئەنتۆان کومت ئەرەیاۋناش، دادوەری فەرەنسای سەروو ئا زانیاریا کە تورکیا جە بارەو داعشیوە دێبێنێش بە بەلجیکای دەسوەردایش کەرد.
کۆنفرانسەکە کە جە تەرەفوو کوردیناسیۆنوو پەشتیوانی نەتەوەیی کوردسانی( CNSK) ڕێکوزیابۍ، پارێزنەرە نامیەکۍ فەرەنسای کریستیان چاریر بۆرنازێل، دەیڤید ئاندیک، ئەنتوان کۆمت و ژان لویس مالتێرێ، ئاماڎێنۍ یان فێرمۆن پارێزنەری بەلجیکی، ئەنداموو ئەنجومەنوو پاریسی جینێڤیڤ گاریگۆس و ئاکادیمیست پاسکال تۆرێ بەشداریشا جە ئەرەنیشتەکەینە کەرد.
جە وتارەو سەرەتاو ئەرەنیشتەکەینە، پارێزنەر کریستیان چاریر بۆرنازێل ئاماژەش پانەی کەرد کە پێویسا گێرتەی و دیپۆرتکەردەیۆ کوردا جە فەرەنساوە شەرمەزار بکریۆ.
پارێزنەر ئەندیچ: گوڵتەکین پېسە پاکەتێوە ڕادەسوو دەزگاو هەواڵگیری تورکیای کریان
پارێزنەر دەیڤید ئەندیچ مافوو قسەکەردەیش هۊرگێرت و سەروو ئاژەو چالاکوان و کوردی سەرحەد گوڵتەکین کە جە مانگەو نیسانینە ڕادەسوو تورکیای کریاوە سەرەنجەکێش وستۍ ڕووە و کارەکەش شەرمەزار کەرد.
ئەندیچ ئاماژەش پانەیچ کەرد کە شێوازوو دیپۆرتکەردەیۆ گوڵتەکینی "بڕفاناین" و ڕۊشنشکەردۆ، چالاکوان گوڵتەکین تووشوو نەوەشیێوە قورسی بیەن بەنامۍ مارفان سیندرۆمی و واتش: "دەسێشا بەستەن و دانشا ۋنە پەی ئانەی وەرگیری جە ۋێش نەکەرۆ. ئینۍ گرڎ بە پەنهانی ئەنجام دریێنۍ، ئینەیچ ئانەی بەروزۆ کە جە بەروو یاسایۆ کریان. سەرحەد پېسە پاکەتێوە فڕۆکەخانەو ئەستەنبوڵینە ڕادەسوو هەواڵگری تورکیای کریا. ئینەیچ پاشێلکاریێوە ڕۆشنا بەپاو یاساو وڵاتی."
جێنیڤیڤ گاریگۆس ئەنداموو ئەنجومەنوو پاریسی و سەرۆکی وەڵینوو ڕێکوزیاو چنەویەردەی میان دەوڵەتی ئەرەیاۋناش کە جە ساڵەو ٢٠٠١یوە یاسا میان دەوڵەتییەکۍ بە ئاشکرا پاشێلۍ کریێنۍ.
تۆرە: ستاتۆو ٥٠ چالاکا کوردی چنەشا هۊرگیریانۆ
پاسکال تۆرەی ئاکادیمیست باسش جە گێرتەی چالاکا کوردی جە فەرەنسانە کەرد و واتش: "جە ماوەو دە ساڵانە گێرتەی چالاکا کوردی جە ٦ مانگاوە پەی ٢ ساڵا زیاڎش کەردەن. ئێمە موینمۍ ئا کەسۍ کە بەشداری ۋێنیشاندایشا کەردەن یان بەشدارۍ گلېرۆبیەکا بیێنۍ دەسبەسەرۍ مکریا. مەزەنڎە کریۆ کە ستاتۆو ٥٠ چالاکا کوردی هۊرگیریابۆوە.
جە ۋەرکەوتوو دلێڕاسەینە قارەمانێنۍ چۍ تیرۆریستێنۍ
پاسکال تۆرە جە درێژەو قسەکاشەنە واتش: "گەلوو کوردی جە ۋەرکەوتوو دلێڕاسەینە پېسە قارەمانی موینا و چێیچ پېسە تیرۆریستی تەماشە کریا. کۊشیای دژوو تیرۆری بەبێ دادپەروەری محاڵا. نیشاندای پەکەکەی پېسە ڕێکوزیێوە تیرۆریستی بۆ بە مەڵامەتوو تاوانبارکەردەی چالاکا کوردی. ئینەیچ ڕا گیری مکەرۆ جە گفتوگۆکا ئایندەی پا جۊرەی پەکەکە گەورەتەرین هێزوو مەنتیقەکەیا کە دەورش جە سەقامگیرینە هەن. ئینەیچ پا مەعنێنە کە ئەوروپا ڕا پەی تورکیای وەش مکەرۆ سیاسەتەکاو ۋێش سەروو ئەوروپایرە سەپنۆنە. جە دمادمایی قسەکاشەنە واتش، داوا مکەرمۍ واڕیایەکۍ بە سیاسەتێوە هەمیشەیی بکریا و کورد فەرەنسانە پارێزیۆ.
فێرمۆن: فەرەنسا فشار وزۆ سەروو بەلجیکای
یان فێرمۆن پارێزنەری بەلجیکی سەرنجش وست سەروو هجوومەکا دژوو ڕێکوزیا میدیاییەکا کوردی جە بەلجیکانە و واتش: "فەرەنسا فشار وزۆ سەروو بەلجیکای".
پارێزنەر فێرمۆنی سەبارەت بە هجوومەکا سەروو ڕێکوزیا میدیاییەکا کوردا جە بەلجیکانە واتش: "ئی هجوومۍ تازۍ نیەنۍ. بەڵکم جە ساڵەو ١٩٩٦یوە بەردەوامێنۍ.
پارێزنەر فێرمۆنی ئەرەیاۋناش کە چاپەمەنی کوردا جە ساڵەو ١٩٩٦یوە جە بەلجیکا بە مەڵامەتوو هامپەیمانی چنی تورکیای ڕووبەڕوو هجوومی نایاسایی باوە وئاماژەش پانەیچ کەرد کە دادگاو باڵاو بەلجیکای ساڵەو ٢٠٢٠ جە قەرارێوەنە پەکەکەش پېسە ڕێکوزیێوە تیرۆریستی ئشناسا، جە ٢٣ۍ نیسانوو ٢٠٢٤، دماو داواو هامکاری دادوەری فەرەنسای، دەسشا بە وشکنای جە تەلەفزیۆنەکا کوردی جە بەلجیکانە کەرد. بە ئەنجامدای ئی کاریە دادگاو باڵاو بەلجیکایچ ئاژەکەش نەوست ۋەروو چەما. بەلجیکا جە کردەوێوەنە ئەوەکۊڵیای دەسپنەکەرۆ کە تاوانە نییەنە.
کۆمت: سەروو داعشی دەسوەردای جە بەلجیکانە مکەرا
ئەنتۆنی کۆمت، سیستموو دادپەروەری ئەوروپایش شەرمەزار کەرد و واتش: "دادوەری فەرەنسای جە پێوەندی چنی ئا زانیارییا سەبارەت بە داعشی کە جە تورکیاوە پنەش میاوا دەسوەردای جە بەلجیکانە مکەرۆ. مافە بنەڕەتییەکۍ چێروو نامۍ دیپلۆماسینە پاشێل مکریا.
