ئەڼامو نوسینگەو یاسایی سەڎەی پارێزنەر ئیبراهیم بیلمەز، باسش چانەیەکەرد، کە کاربەدەسا وەزارەتو دادی دروۍ مکەرا و واتش، "هەوڵ مڎا قسۍ ناڕاسۍ ودوور جە لۆژیکی تاشارە و جە ڕاو سزێوە نکۆڵی جە گۆشەگیری مکەرا".
ئەرەنیشتەو ٨٠ەمینو کۆمیتەو دژە ئەشکەنجەو نەتەوەیۆگێرتەکا جنێڤەنە بەردەواما. جە چوارچێوەو ئەرەنیشتەکەینە ریپۆرتەرەو تایبەتەو کۆمیتەو دژە ئەشکەنجەی جە نەتەوەیۆگېرتەکانە مائیدە نائۆکۆ جەبارەو گۆشەگیری دژوو رابەرو گەلوو کوردی عەبدوڵا ئۆجالانی قسێش کەردۍ. دماو ئاڎی یاردیدەرو ڕاوەبەرو گرڎیی زیڼانەکا فاتیح گونگۆر بەنامۍ تورکیایۆ مافو قسەکەردەیش هۊرگېرت و جوابوو پرسیارەکاش جەبارەو گۆشەگیری ئیمراڵیوە دێوە و بانگەشەو ئانەیش کەرد کە ئاژەو گۆشەگیری بیەیش نییا و بە مەڵامەتو 'رێککارەکا دیسپلین'ی جە ۋەرا ۋەرو زیڼانیەکانە، دیڎارەکۍ قەڎەغەکریێنۍ.
یۆ جە پارێزنەرا نوسینگەو یاسایی سەڎەی ئیبراهیم بیلمەز دەسنیشانش کەرد کە سزا بەشێوێوە نایاسایی سەپیۆنە و واتش، "جە بارەو ئا سزایاوە کە سەپیانە زانیاری بە پاڕێزنەرا نمەڎریۆ. ئێمە بەهانۍ سەپنای سزاکا جە گوزارشتەکا سی پی تییوە مزانمۍ. زیڼانی ٤٥ دەیەقەی وەرزش مکەرا و ١٥ دەیەقۍ دەموو ڕاکەردەیۆ گفتوگۆ مکەرا، ئانەیچشا کەردەن بە بەهانۍ سەپنای سزێوە. هەوڵ مڎریۆ راسی دوور جە ئەقڵی و لۆژیکی بتاشیۆرە و پانەیچ نکۆڵی جە گۆشەگیری مکەرا".
'وەختۍ مژارەکە سەرو ئیمراڵی مبۆ یاسا هەرمانەش پنەمەکریۆ '
پارێزنەر بیلمەز ئانەش وست ڕووە کە جەلایەنو دادگاو جابەجێکەردەی سزاکاوە هەر شش مانگ جارێوە بەشێوێوە سیستماتیک قەڎەغەو دیڎاری چنی پارێزنەرا مسەپنۆ و واتش کە ئامانجو ئا سزایا دیسپلینی ڕاگېرتەین جە دیڎارو رابەرو گەلوو کوردی عەبدوڵا ئۆجالانی و زیڼانیەکا تەری چنی بنەیانەکاشا. پارێزنەر بیلمەز جە بارەو بانگەشەو ئانەی کە دژوو سزاو دیسپلینی تەعنشا پێشکەش نەکەردەن و واتش، "یەرۍ مانگۍ جارێ بە شێوێوە سیستماتیک سزاو دیسپلینی هەم سەرو بەڕێز ئۆجالانی و هەمیچ سەرو زیڼانیا تەرو ئیمراڵیرە سەپیانە و سزاکۍ تازەمکریۆوە. ئانەی مکەراش دژوو یاساو سزاداین. سزاکاو دیسپلینی پی جۆرە بێ مردای نمەتاویۆ بسەپیا. موەکیلەکېما فرەو وەختی دژوو ئا سزایا ناڕەزایشا بەربڕیەن. ۋەروئانەی مزانمۍ کاتێ مژارەکە مبۆ بە ئیمراڵی، بەهیچ جۆرێ هەرمانە بە یاسای نمەکریۆ. جە بارەو ئا تەعناوە پێشکەشکریێنۍ تەنیا یۊیچشا بە ئەرێنی جواب نەدریێنێوە. پېسە پارێزنەرا، ٢٥ ساڵېن ئێمە داواکاری بەرزمکەرمېوە، بەڵام تا ئیساتۍ یەک ئەنجامی ئەرێنیما جە دادوەری تورکیایۆ هۊرنەگېرتەن. ۋەرو ئا مەڵامەتا رەنگە موەکیلەکېچما بەمەڵامەتوو ئانەی متمانەشا پا میکانیزماو دادگەری کە بەدیاریکریایی پەی ئاڎیشا بەرکارۍ نیەنۍ، شەکوا ئاراسەو دەسەکا چەمڎاری و دادوەری نمەکەرا. داخەم مەشۆ چی قۆناغێنە نمەتاومۍ ئانەی پەشڕاس بکەرمېوە".
پارێزنەر بیلمەز ئەرەیاۋناش، قسۍ کاربەدەسەکەو وەزارەتو دادی هیچ حەقەتینێوەش جە ۋێش نەگرتەن و واتش، مامەڵە و هەڵسوکەوتەکە بە تەمامی نایاساییا و هەوڵ مڎا بەهانێش پەی تاشارە.
