پەدەکە برادۆسەنە بارەگېوە تازەش پۍ دۊڵەتوو تورکی وەشکەرڎ
دماو ئانەی هێزەکۍ پەدەکەی جە کوێسانەکا برادۆسینە بنەشا وستە، دەوڵەتوو تورکی ئەرەگیری دەسش بە وەشکەرڎەی بارەگېوە سەروازی تازەی کەرڎ.
بە پاو ئەرەیاۋناکا نزیک جە یەنەکەی، دەوڵەتوو تورکی ئەرەگیری جە هەڕێموو برادۆسی بارەگېوە سەروازی تازە وەش کەرۊ.
جە ڕاو ئا بارەگا تازەیۊ دەوڵەتوو تورکی ١٠ کیلۆمەترۍ تەر ئامان دلۍ خاکوو هەرێموو کوردسانی.
بەپاو قسۍ سەرچەمە دلېینەکا جە ڕاو هەلیکۆپتەریوە نزیکەو ١٠٠ سەروازا جە بارەگاکەو برادۆسینە وەزیېنیرە.
بارەگا سەروازیە تازەکە کۊتەن مەحاڵەو دوریەی و جە ڕاو ئا بارەگایۊ دوریەی جە خواکورکی بڕۊرە و مېڎانەکۍ تارستان، کەم کۆرا، سنین، لۆلانی بەتەمامەتی گنا دلۍ بازنەو ئەرەگیری دەوڵەتوو تورکیوە.
وەشکەرڎەو ئی بارەگا سەروازییەو دەوڵەتوو تورکی دماو ئانەی مۍ کە پەدەکە جە مەنتیقەکەنە بنەش وستە. جە ١٣و ئەیلولوو ٢٠٢٣ېنە بە سەڎان ترۊمبېلۍ زرێپۆشۍ پەدەکەی بە چەکی قورسۊ بەرەو هەرێموو برادۆسی پڕېوە.
پەدەکە وەڵۍ ئانەی بلۊ دلۍ هەرێمەکەیۊ ماوەو ٢٤ سەعاتاش بە کۆچەرییەکا هەرێمەکەی دابۍ، کە ئا مەنتیقەیە جیابازا و چېروو هەڕەشۍ و فشارینە مەنتیقەکەنە بەرشکەرڎېبێنۍ.
بەپاو سەرچەمە دلېینەکا نزیکەو ٢٨٦ خێزانا ناچارۍ بیۍ بە مەڵامەتوو فشارەکا پەدەکەیۊ ڕزە مېوۍ و باخەکاشا جیابازا.
ڕووانە فڕۆکەی جەنگی و فڕۆکەی بێفڕۆکەوانۍ دەوڵەتوو تورکی بۆردومانوو مەنتیقەو برادۆسی کەرا و بە تۆپە و هاوەنەیچ ئا مەنتیقا کەرانە ئامانج.
