پەرلەمانتارەو پارتوو یەکسانی و دیموکراسیی گەلا (هەدەپ)ی، واننە گوڵجان کاچماز سەیگیتە سەرنجەش وستە سەروو گۊشەگیرییەکاو سەروو عەبدوڵڵا ئۊجالانی و واتش "کێشەو کوردی بەسیانۊ بە لکەو گۊشەگیرییوە".
گوڵجان کاچماز سایگیتە پەرلەمانتارەو پارتوو یەکسانی و دیموکراسیی گەلا (هەدەپ)ی واننە جە کۊبیەیۊ بودجەی وەزارەتوو وەرگێرینە کە جە کۊمیسیۊنوو پلاننیایرەی و بودجەینە قسێش کەرڎۍ.
سایگیتە واتش: ئاکەپە سەرەتا سەبارەت بە کێشەکاو کوردی و کێشەکاو تورکیای هیچ بەرهەمێوەش نییا و مەتاوۊ چارەسەرش کەرۊ، پێسە درێژەش بە قسەکاش دا و واتش: ئاکەپە جە ئەنجاموو ٢١ ساڵا حوکمڕانیینە چندین ئەرەمەرزیێش دێنی دەسوو ئەقڵێوە سەروازیوە و ئینە کارەساتێوە گەورەن. سەیارە سەروازییەکۍ لا نەبریێنۍ و تەنیا پۊشاکێوە سیاسەتیشا کەرڎەننە. ئینەیچ بییەن بایسوو دلێنەشیەی دیموکراسی و ئازادی و دادپەروەری. چەنی وێش هەژاری، پەشێوی و قەدەغەکەرڎەیش ئارڎەن".
سایگیتە دەسنیشانش کەرد، کە گەلوو کوردستانی هەوڵۍ ئانەیە مدۊ، کە وێش سەلەمنۊ و باجێوە فرەیچش دان پەی دەسوستەی ئی ئامانجەیە. سایگیتە درێژەو قسەکاشنە واتش: " ئاخرۊ ئینکاریی ئۊنتۊلۊژی دماییش ئاما. جیاتیی ئانەیە کێشەکا چارەسەرۍ کەرا، چەنی گەرەکشانە ورسونیشت کەرا. وەنەو پەرلەمانتارا دەسەڵاتی و ئۊپۊزسیۊنی پەرسوو: مادام کورد کێشەش نییا یانۍ چێش زوانی کوردی بڕگەو دەستوورینە نییا؟ چی وانای بە زوانوو ئەدۍ قەدەغەن؟ ئەگەر کورد کێشەش نییا چی زیندانەکۍ پەڕێنۍ کورڎێ؟ چی زارۊڵاو کوردی شارەکاو کوردستانینە چێروو زرەپۊشەکانە مرا؟ ئەگەر کورد کێشەش نییا، چی ڕیفراندۊمەکەو هەرێموو کوردستانی کەوت چێروو هەڕەشەکاتاوە؟ شمە چی سەرنیشت و وەرکەوتوو سوریاینە کوردتا گەرەک نیا؟ ئینکارکەرڎەی گەلوو کوردی بە ماناو چارەسەری نمۍ. بە ئینکارکەرڎەی ئی کێشە هەمیشە بەرڎەواما. خاسا ئی پاگێرتەیرە چێشا؟ سەیەو کێشەو کوردینە ئا کەسۍ ئینۍ دلۍ دەوڵەتینە، گرد نۊعە هەرمانێوە خراپە کەرا دەوروو یۊینە کوۍ بیێنێوە. سەدەو یوەموو کۊماری بە کێشەو کوردی دەسش پەنە کەرد و دماییش ئاما. ئایا ئی سەدەیچە حەر پێسنە بۊ؟
سایگیتە سەرنجەش وستە سەروو "پڕۊسەو چارەسەری" و پێسە دماییش بە قسەکاش ئارد: "کێشەو کوردی ئارۊ بەسیانۊ بە لکەو گۊشەگیرییوە. جە دوورگەو ئیمرالیینە زانیاریی بێهاگایێوە دماییناما هەن، ئی سیاسەتە دەرڎەو کەسی مەوەرۊ. گۊشەگیری یاسایی نییا. چارەسەرنەکەرڎەی کێشەو کوردی و پاگێرتەیرە سەروو سیاسەتوو گۊشەگیری گرد یاگێوەنە دەسەڵاتی لاواز کەرۊ. ئەگەر سیستمێوە بیۍ کێشەو کوردی چارەسەر کەرۊ، ئیساتۍ کاریگەرییەکێش فرەتەرۍ بێنۍ. قەیرانی ئابووری وەش نەبۍ، درێژەدای بە جەنگی دەرڎەو هیچ لایەنێوە مەوەرۊ. فرە حاکمۍ و وەزیرۍ ئامۍ و لوۍ، وەلۍ ڕاسیێوە هەرگیز نەواڕیا: ئەگەر کێشەو کوردی چارەسەر نەکەرا، دۊڕناش.
