پارتوو هەرێمە دیموکراتیکەکا (دەبەپە)، جمیەروو ژەنە ئازادا (تەژەئا)، مەد توهاد-فەد، مەبیا-دەر و ئەدایاو ئاشتی بارەو هجوومەکاو تورکیایوە پەی سەروو پانیشتوو کوردستانی کۆنفڕانسێوی ڕۆنامەوانییشا ساز کەرد.

کۆنفڕانسە ڕۆژنامەوانییەکەنە چیدەم کلیچگون ئوچارە ئاماژەش بە ڕێککەوتەی یەرەقۆڵیی ئەنقەرە-هەولێر و بەغدای کەرد و واتش، ڕاو ئا ڕێککەوتەیوە دەسکەوتەکاو گەلوو کوردی مکریانە ئامانج. جەنگوو ئیساتێ بۆنەو بەکارئاردەی چەکی قەدەغەی و چەکی کیمیاویوە کەوتەبێ پەرسەو ڕۆو تورکیای و جیهانیوە. جە ئۆپراسیۆنەکەنە کە وەرەچەموو گردوو جیهانیوە چەکی کیماوی بە کارئامێ، بەڵام وەزیروو وەرگێریی ئارۆی نکۆڵی چا ڕاسییە مکەرۆ".

درێژەو قسەکاشەنە واتش، "ئارۆ عاسمان و زەمینۆ هجوومێ گەورێ مکریانە و ژمارێوی فرەو خەڵکیچ مەردێنێ، چا جەنگەنە شانە بە شانەو سەروازاو سوپاو تورکیای پێشمەرگەکاو پەدەکەیچ بەشدارێنێ. هەرپاسە چەنیشا هێزە میلیشیاییەکاو پێسەو داعشیچ بەشدارێنێ. بە چەمداریی پەدەکەیوە سەدان خاڵێ و بنکێ سوپاو تورکیای وەشێ کریێنێ، باسوو ئانەیش کەرد، ئامانجوو ئەردۆغانی و دەوڵەت باخچەلی چا هجووم و جەنگانە گێڵایوەین پەی سنوورەکاو میساقی میللیی، ئینەیچ پەی کوردی بە ماناو مەردەی و دلێنەشییەین و جگە چانەیە هیچ چیوێ تەر بە کوردی نمەبەخشانێ.

ڕۆشنیچش کەردۆ، کە ڕاو ئا جەنگ و پەلاماراوە گەرەکشا کە کوردستانی جە ئەرەنیشتەکاش بەتاڵ بکەرانێوە و واتش، " گەرەکشانە ئا جوگرافیایە جە ئینسانەکا چۆڵ بکەرا هەرپاسە گەرەکشانە ئا کەسا چا خاکەنە بەر بکەرانە کە مپارێزنانێش و پیسە بێ وەرگێرییش بکەرا. جە سیاسەتی نۆ ساڵەو جەنگی و داگیرکەریینە ٧٥٠ هەزار ئینسانێ بێ یانە و حاڵێ بیێ، کە سەدەنە ٨٠شا کوردێنێ. تا مانگەو حوزەیرانی ١٠٠ دەگێ هەرێمەکەی چۆڵێ کریێنێ. چۆڵکەردەی دەگایەکانە پەدەکە، سوپاو تورکی و داعشی دەورشا گێڵنان و چا مەنتێقانە بنێشا وستێنە. جگە چانەیە گەرەکشانە ٦٠٢ دەگێ تەرێ چۆڵێ بکەرا.

ئوچارە بەشێوی تەروو قسەکانشنە ئاماژەش پانەیە کەرد، کە ئاکەپە-مەهەپە ڕاو ئا هجووم و پەلاماراوە گەرەکشانە ژیوگە و ئیکۆلۆژیی پانیشتوو کوردستانی بەرا دلێنە و ویرش ئاردۆ، کە جە حەفتەکاو وەڵێنە نزیکەو ٢٠ هەزار دۆنما جە دارستان و لەوەڕگەکێ و زەمینە کشتوکاڵییەکێ سۆتێنێ، ئینەیچ ئینا وەختیوەنە کە کشتوکاڵ و باخداری سەرچەمەی سەرەکیی بژێویی ئەرەنیشتاو ئا یاگانێ.  

پێسە واتیچش ئامانجێوی تەرشا ئانەنە کە گەرەکشانە سەروو دەسوو چەتەکاوە ئا یاگە تارێخییا، کە پێسەو یادگەی جانێنێ دلێشانە بەرا. چەتەکا چاگە ئەرەنیشتێ بکەرا، سەروو دەسوو چەتەکاوە دیموگرافیاو مەنتێقەکەی بفاڕانە. ئا داعشە کە دەسدرێژییش کەرد سەروو ژەناو شەنگالی و خەڵکش بەزیندەیی سۆچنا و سەرەو پێشمەرگەیش بڕی، ئارۆ بە ڕاپەنەدای پەدەکەی و بە دەسوو تورکیای چا مەنتێقانە ئەرەنیشتێ مکریا. ئا خاکە کە جە داعشی پاک کریابێوە، جارێوی تەر گەرەکشانە داعشی چنە ئەرەنیشتە بکەرا و بکەرانێش بە گۆمەو ونێ".