زیاتەر جە ٧٠ کەسا جە بەریتانیا کە دلێشانە پەرلەمانتار، ئەنداموو سەندیکای، ئەکادیمی، پارێزنەر، لۆرد و ڕۆشنۋیراش ئینۍ چنە، نامێوە هامبەششا پەی سەرۆکوو سی پی تی میشیلی نویست و داواشا کەردە پەیوەس بە عەبدوڵا ئۆجالانی بە ئەرکوو ۋێش هۊربێزۆ و شاندێوە بکیانۆ پەی ئیمراڵی. جە نامەکەنە داواکریا "بەزووتەرین وەخت بە ۋەرپرسیاریی ۋێش هۊربێزۆ" نزیکەو ٣ ساڵان هیچ زانیاریێوە جە ڕابەروو گەلوو کوردی عەبدوڵا ئۆجالانیۆ هۊرمەگیریۆ.

بە سەرمەشقایەتی ئاشتی جە کوردسان ( Peace in Kurdistan) جە ئینگلتەرا پەی دمایی ئاردەی بە گۆشەگیری سەروو ڕابەروو گەلو کوردی عەبدوڵا ئۆجالانی و سی پی تی شاندێوە بکیانۆ ئیمراڵی نامێوە هامبەششا نویست. جە خانەو ئەنداما دەسوەڵێوستەکەی، زۋانناسی نامدار نوام چۆمسکی، سەرۆکی وەڵین و پارتوو کرێکارا جەرەمی جۆربین، جە ڕێکوستەی گەورەتەرین سەندیکاو ئینگلتەرای ( Unite the Union) سیمۆن دوببینس، پرۆفیسۆر میشیل گونتەر، پرۆفیسۆر بیل بۆورین و چنڎین ڕۆنامەوانۍ و ئەندام سەندیکایۍ تەرۍ ئیمزاشا ئینا دلۍ نامەکەینە و پەشگیرییشا جە نامەکەی کەردەن.

جە نامەکەنە ئاماژە پانەی کریان بەڕێز عەبدوڵا ئۆجالانی تەمەن ٧٥ ساڵ، ماوەو ٢٥ ساڵان جە ڕاو گۆشەگیرییوە ئینا چێروو ئەشکەنجێوە نامرۆڤانەینە، ئانە ماوەو یەرۍ ساڵان سەبارەڎ بە ئاژەو تەندروستی هیچ زانیاریێوە مەدریۆ و ئینەیچ بۆ بە مەڵامەتوو وەشبیەو خەم و نیگەرانیێوە جدی.

ئاژەو ئۆجالانی مژارێوە هەستیارا

جە بەردەوامی نامەکەینە کە پەی سەرۆکوو سی پی تی میشیلی کیانیان ئامان: "چی خاڵێنە ئاژەو جەستەیی ئۆجالانی،کە جە ئیساتێنە چنینا و ئینا چکۆ دیاری نەکریان. ئی ئاژەیچە پەی فرەو کوردا مژارێوە هەستیارا کە پېسە دەنگی نەتەوەیی ۋێشا مۋینا. ۋەروو ئی مەڵامەتا، داواتا ۋنە مکەرمۍ پېسە سی پی تی دەمودەس هەنگامە بنیەیدۍ، پەی ئانەی چی تەرس و نیگەرانییا ڕزگارما بۆ. پېسە سی پی تی مافوو ئانەیتا هەن سەردای گرڎوو زینڎانیا گرڎ دەوڵەتێوە بکەردۍ، کە ئینۍ دلۍ پەیمانینە، تورکیایچ ئینا دلۍ پەیمانەو دەوڵەتانە. ئینەیچ تەنیا ڕانە کە شاندێوە پسۆرتا ڕوانەو ئیمراڵی بکەردۍ. دەوڵەتوو تورکی ئینا چا ۋەرپرسیاریەتەنە کە ڕا بڎۆ سەردای بەڕێز عەبدوڵا ئۆجالانی بکریۆ و بە شێوێوە تایبەت چەمپنەکەوتەیش چنی بکەردۍ.

ۋەرپرسیاریی ۋێتا جابەجا بکەردۍ

جە نامەکەنە دەسنیشانکریان پێویسا سی پی تی بە پاو مادەو ٣یەمینوو میساق و ئەنجوومەنوو ئەوروپای مامەڵە بکەرۆ و وچیان: " بەڕێز ئۆجالان هاموڵاتیی دەوڵەتێوەن ئەنداما جە ئەنجوومەنوو ئەوروپاینە کە ماوەو ٢٥ ساڵان جە مافە مرۆییەکا و ٣ ساڵێن جە مافوو چەمپنەکەوتەی چنی بنەیانەی و پارێزنەراش بێبەشکریان. تەنیا چێوۍ کە داواتا ۋنە مکەرمۍ ئانەنە کە دەموودەس شاندێوە بکیاندۍ ئیمراڵی پەی چەمپنەکۊتەی و کۆنترۆڵکەردەو تەندروسی بەڕێز ئۆجالانی و ۋەرپرسیاریی ۋێتا جابەجا بکەردۍ و ڕا بڎەیدۍ بنەیانە و پارێزنەرەکېش سەردایش بکەرا، ئێمە پینەی فرە دڵوەشۍ بیمۍ. ئینە پەیوەسا بە ملوێنان کورداوە. ئینەیچ هاندەرۍ بۆ پەی ئانەی تورکیا پەی مەسەلۍ کوردی ڕاو چارەسەری ئاشتیانەی بارۊنە ئاراوە. سوپاسوو وەختەکەیتا مکەرمۍ و هیوڎارێنمۍ ئینەی پېسە داواکاریی ئێمە قبوڵ بکەردۍ."