ژەنی جە وۆرک شۆپوو پلانسازیی ستراتیژیی ژەنانە سەروو وەڵێنیارەکاو چارەسەری قسێشا کەردێ، سیاسەتمەدارە سەباحەت تونجەلە واتش: "گەر کۆشیای بۆ، سەرکەوتەیچ هەن، ئێمە ڕاو کۆشیایوە ژیواێوی ئازاد بەدەس مارمێ".
وۆرک شۆپوو پلانسازیی ستراتیژیی ژەنا ٢٠٢٥-٢٠٢٩ لاو شارەوانیی گەورەشاروو وانیوە هۆتێلێوەنە کریا، بە بەشداریی نوێنەروو پارتە سیاسییەکا و ڕێکوزیا مەدەنییەکا و ڕێکوزیایەکاو ژەنا لوا ڕاوە.
سەرۆکوو فەرمانگەو سیاسەتەکاو ژەناو شارەوانیی وانی، ڕەفیقە سۆنمەزە قسێش کەردێ، داواش کەردە ژەنی گردوو بوارەو ژیواینە دەوری چالاک بگێڵنا، بۆ ژووژنایوەی شارەکەی و گلێرگەی. واتش: "پێویسا ژەنی چی پلانسازییە ستراتیژییەنە یاگێ بگێرا".
هەرپاسە پەرلەمانتارەو دەم پارتی سومەیە بۆزە، واتش ژەنی بواروو ئیدارەی وێمانەیەنە متاوانە دەوری فرە خاس بگێڵنا و ئەرەیاوناش: "وێرانکارییەکاو قەیومی شارەکەشا بێکاریگەر کەردەن. ئی پلانسازییە ستراتیژییە هێزوو ژەنا قەوەتتەر مکەرۆ".
سیاسەتمەدارە سەباحەت تونجەلە دەربارەو بابەتوو "ئیدارەی وێمانەی و سیاسەتوو ژەنا" دوا، واتش دەورگێڵنای ژەنا سیاسەتەنە ئاسان نییەن، ئەوەخوایش کەردۆ دەوروو ژەنا دزیان و ڕەنجشا فۆتیان، واتش: "زیهنیەتی پیاسالاری ڕەت مکەرمێوە. ئێمە ئیدارێوی بنیات منیەیمێ، کە میاوۆمانە و ڕاو واتەواچیوە ببریۆن ڕاوە. فرە گرنگا ئیدارەو ئا شارەیە نوێنەرایەتییش چی بابەتەینە بۆ. نیمەشا ژەنینێ. ئیداریوی دیموکراتیک بەبێ ژەنێ نامومکینەن. ئێمە سیستەمێوەما بنیات نیان، کە مشۆم ژەنیش چەنەبا. سیستەموو هامسەرۆکایەتی گلێرگەنە قبووڵ کریان. ئێمە ماچمێ تا ژەنی ئازادێ نەبانە جڤاک ئازاد نمەبۆ".
دمایی ژەنی وەڵێنیار و سەرنجەکێشا سەروو پلانە ستراتیژییەکەی بەروستێ.
ئەرەیاونیا کە ئەنجامنامەو وۆرک شۆپەکەی ڕوەکاو ئایندەینە ئاشکرا مکریۆ.
