گەلوو پانیشتوو کورڎەسانی جە گرڎ چین و توێژەکانە ناڕەزایی بەربڕا جە ۋەرا ۋەر و لەشکرکێشییەکا دەوڵەتو تورکی ئەرەگیرینە. ناڕەحەتێنۍ جە بێدەنگی لایەنە سیاسیەکا پانیشتوو کورڎەسانی جە ۋەرا ۋەرو ئەرەگیریەکا دەوڵەتو تورکینە. چی بارۆ سەلام عەلی ئەڼامو کۆنگرەو نەتەوەیی کورڎەسانی (کەنەکە)، پەی ئاژانسوو هەواڵوو فوراتی (ANF)ی قسېش کەردۍ.

 ' تورکیا پانیشتوو کورڎەسانی بە بەشێوە جە ۋێش مزانۆ '

سەلام عەلی باسش چانەیەکەرد مەراموو تورکیای جە ئەرەگیرکەردەو پانیشتوو کورڎەسانینە پەی ئانەینە بکەرۊش بە مەنتیقێوە سەروازی و واتش: " مەراموو تورکیای جە ئەرەگیرکەرڎەو کورڎەسانی تازە نیا جە سەردەمو عوسمانییەکاوە ئینا هەوڵو ئەرەگیرکەردەینە و جە دماو جەنگی جیهانی دووەمی و هۊرشېونایۆ فەرمانڕەوایی عوسمانی و ئامای ئەتاتورکینە، وە بە پەیلواو من دەوڵەتو تورکی باوەڕیشا پا نەخشە سیاسیە نیا کە پەیشا مجیانەرە. گەرەکشانە ئا نەخشە سیاسیەی پەیشا نریانەرە بە شێوێوە تازە مجاشەراوە. ئەرەگیری و لەشکرکێشییەکۍ تورکیای بەمەڵامەتوو پەکەکەیۆ نیەنۍ بڕۍ لایەنۍ و بەتایبەت پەدەکە جە ڕاو میدیاکاوە بانگەشەو ئانەی مکەرا کە مەڵامەتوو ئامای سوپاو تورکیای بەمەڵامەتوو پەکەکەیۆن کە ئینەیچ دوورا جە حەقەتینیۆ، تورکیا مەرامۍ ستراتیجیش هەن جە مەنتیقەکەنە کە بە میراتوو ۋێش مزانۆش و هەوڵو ئەرەگیرکەردەیش مڎۆ بەداخەوە پەدەکەیچ بەشێوەن جە ئەرەگیریەکا. جە حەقەتینەنە مەترسیێوە گەورە هەن، ئانەیچ جە ۋەرا ۋەرو مەترسییەکا دەوڵەتو تورکی ئەرەگیرینە مردانۆ تەنیا گەریلان."

 ' پەدەکە سیاسەتوو ئەرەگیری جابەجێ مکەرۆ '

سەلام عەلی باسش چانەیە کەرد بارزانی سیاسەتوو ئۆردۆغانی جابەجێ مکەرۆ کە قەولو ئانەیش پنەدان بکەرۆش بە والی مەنتیقەکەی و بکەرۆش بە والی موسڵی و کەرکوکی و واتش: " جابەجێکەردەی سیاسەتوو ئەردۆغانی مبۆ بە مەڵامەتوو دلێنەشیەی پارتی و بنەیانەو بارزانی چونکی تورکیا ئی ئەرەگیریەشە پەی نمەلۆ سەر و شکس مارۆ. چی ماوە ۋییەرڎەنە ئەردۆغان ئاما پەی عێراقی چن پەیماننامۍ سەروازی و ئابووریش کەردۍ. حکومەتو عێراقی وعێراقییەکۍ جە وەختو ۋینای تابلۆو تورکیاینە جە بەرواری باڵای سەربە پارێزگاو دهۆکی، کە سەرو تابلۆکەیۆ نویسیان ئامووشەو ڕۆت چی مەنتیقەنە قەڎەغەن و ئێگە خاکو تورکیاین و عێراقییەکۍ هەستشا بە تەرسی کەردە، حەرپۊکەی جە گلېرۆبیەکەو ئەنجوومەنو ئاسایشو نەتەوەیی عێراقینە بە سەرپەرشتی محەمەد شیاع سودانی دژوو ئەرەگیریەکا تورکیای مردێوە. ئانەی گرنگا مشۊم گەلوو پانیشتوو کورڎەسانی و لایەنە سیاسیەکۍ پەشتیوانۍ قەرارەکەو حکومەتو عێراقی با."

 ' ئا مەنتیقۍ ئینۍ چێرو دەسەڵاتوو پەدەکەینە ڕادەسۍ تورکیای کریێنۍ '

جە درێژەو قسەکاشەنە سەلام علی ئاماژەش پانەیە کەرد کە مشۆم گەل دژوو ئەرەگیریەکا هەڵوێسش بۆ و واتش: " جە حەقەتینەنە دەمێوەن ئانە زانیان کە پەدەکە و بنەیانەو بارزانی مەنتیقەکۍ چێرو دەسەلاتوو ۋێشا پێشکەش بە تورکیای کەردێنۍ. ئانەی گرنگا ئانەنە کە پەنەوازا گەل چێش بکەرۆ؟ مشۊم ۋێما بە ڕێکوستەی بکەرمۍ و دژوو ئەرەگیریەکا مردمېوە، بەتایبەتی گەلوو بادینانی گەلێوە شۆڕشگێڵنێنۍ ئا ناڕەزایۍ ڕوانی ۋییەرڎەی جە دژوو ئەرەگیریەکا تورکیای ئانەما پنە ماچۆ؛ گەلوو بادینانی عال یاوێنێنە جە خیانەتوو بنەیانەو بارزانی و مەرامی قڕکەرو دەوڵەتو تورکی. ئا دەگایۍ کە ئیساتۍ ئینۍ چێرو دەسەڵاتوو دەوڵەتو تورکینە مکەرۆشا بە مەنتیقەی سەروازی. بەداخەوە لایەنە سیاسیەکۍ پانیشتوو کورڎەسانی و ڕێکوزیاکۍ هەڵوێسۍ جدیشا نیا. پەنەوازا گرڎوو گەلوو پانیشتی دژوو ئەرەگیریەکا دەوڵەتو تورکی مردمېوە پەشتیوانی گەریلای بکەرمۍ و پەشتیوانی گەلوو بادینانی بکەرمۍ، دەنگوو ۋێما بە گرڎوو دنیۍ بیاونمۍ."

 ' دەزگاو جەنگی تایبەتی ملۆڕاوە '

سەلام عەلی سەرنجش وست سەرو ئانەی کە جە ئیساتێنە جەنگی تایبەت ملۆڕاوە و میدیایەکا بە کار بەرانە و واتش: " دەزگاو پارېزنای و پەدەکە و میتوو تورکی جە ڕاو پەلیانە و تەلەڤزیۆنەکاشاوە جەنگی تایبەت مکەرا پەی ماڕای ئیراڎەو گەلی، پەدەکە جە ڕاو میدیاکاشۆ پڕوپاگەڼەو ئانەی مکەرۆ کە بافل تاڵەبانی کورڎەسانش جیائاستەن پنەش وچیان کە مەیانە سلێمانی و ئەرەگیرش مکەرا. هەرچی قسۍ پەدەکەی هەنۍ گرڎ پڕوپاگەڼینۍ و دروێنۍ. ئانە پەی دووۍ حەفتا ملۆ دەوڵەتوو تورکی ئینا جەنگەنە چنی گەریلاکاو کورڎەسانی و نەتاوانش حیچ مەنتیقێوە پانیشتوو کورڎەسانی کۊنتڕۆڵ بکەرۆ، باس چا مەنتیقا نمەکەرمۍ کە ئینۍ چێرو دەسەڵاتوو پەدەکەینە کە ۋێش ڕاش پەی کەردەنۆ."

جە دمادمایی قسەکاشەنە سەلام عەلی داواش ۋنەو گەلی کەرد کە هەڵوێس برماناو داوش جە مامۆسایا ئاینی کەرد کە هەڵوێسوو ۋێشا نیشانە بڎا وە هەرکەسێ هەڵوێسش نەبۆ ملۊنە هێڵۊو خیانەتیوە مشۊم تەماشەو گەلوو شیلادزێ بکەرمۍ کە چنی جە ۋەرا ۋەرو سەروازەکا تورکی و بنەیانەو بارزانینە مردێنێوە و واتش: " پېسە چنی سەدام حسێن کۆمکوژی و دەگایەکا وێران کەرۍ ئەردۆغانیش هەمان کار مکەرۆ کاتێ داعش ئاما موسڵ کە داعش وەشکریاو ئۆردۆغانی بۍ هرووژمش کەرد سەرو عێراقی و سوریای و پەشتیوانی تەمامش ۋنەکەرد. جە ئیساتێنە دەوڵەتو تورکی هەمان چەتۍ و داعشێش ئاردێنۍ پەی پانیشتوو کورڎەسانی، چونکی مزانۆ سەروازەکۍ ۋێش نمەتاوا جە ۋەرا ۋەرو گەریلا ئازاڎەکانە گژیا و بەدڵنیاییوە جە ۋەرا ۋەرو گەریلاینە شکس مارۆ. وە دڵنیانا ئینە دما ئەرەگیری دەوڵەتو تورکی مبۆ و دەسەلاتوو ئاکەپەی و ئەردۆغان دمایشا پنە مۍ چنی ئا دەسەڵاتەو پانیشتوو کورڎەسانی کە هامکاریش کەردێنۍ جە ئەرەگیرکەردەو پانیشتوو کورڎەسانی."