وێرەگاو ئارۆی یەک-شەممە، وەرڎەمو باخی گردینینە بە ئامادەبییەی وونی جەمێوی وەرەچەموو  ڕۆنامەوان و چالاکە مەدەنی و سیاسییا و بە ئامادەبییەی هامسەرۆکی گردینو تەڤگەرو ئازاڎیی گلێرگەو کوردستانی، مەراسیمو چوارڎەمین ساڵیاڎوو گەشمەرڎەکەرڎەی گەشمەرڎەو قەڵەمی ڕۆنامەنویس سەرڎەشت عوسمانی کریا.

مەراسیمەکەنە ئامادەبیێ ڕسمو گەشمەرڎەو قەڵەمی سەرڎەشت عوسمانی و ڕسماو ڕۆنامەنویسە زیندانیکریایا ( شێروان شێروانی، سلێمان ئەحمەد و قارەمان شوکری)ییشا بەرزێ کەردێبێنیوە و دروشمەکاو (حەرگیز نمەتاودێ ئازاڎیما بکوشدێ، ڕۆنامەکا مکەردێ بە ونی سوورە و بە ولێ سوورێچ خێرامای ونەو ئەرەگیرا مکەردێ) بەرزێ کریێبێنێوە.
سەرەتاو مەراسیمەکەی بە ئازاڎکەرڎەی 14 باڵدارا لاو ئامادەبییاوە پێسەو هێماێو پەی ئازاڎیی ڕۆنامەنویسا دەسش پەنە کەرد.
دمایی هێمن مامەند ڕۆنامەنویس و چالاک، بەیاننامێوەش پەی ڕای گردینی و دەزگاکاو ئەرەیاونای واناوە دلێشنە ئامابێ: "چوارڎە ساڵێ ویەرد، بەڵام هەڵای ونەو سەرڎەشتی زەمینەنە وشکە نەبیێنۆ، لاو ئێمە و خەڵکی ئازاڎیوازیوە هەڵای پێسەو ئەوەڵ ڕۆو ئڕفانای سەرڎەشتی وەرڎەمو کۆلێجو ئادابو زانکۆو سەڵاحەدینینە. چوارڎە ساڵێ چێوەڵتەر دەسێوی سیاو و ئاشکرا بە نماو نیمەڕۆی و وەرەچەماو زانستی و زانکۆیوە سەرڎەشتشا ئڕفانا و دماییچ لاشەی مەبارەکشا شارو موسڵینە فڕە دا، شەمشەکۆرەکێ ئجێشا ئەگەر جەنازەو سەرڎەشتی بەرانێ بەروو کوردستانیوە، ئیتر سەرڎەشت دماییش پنە مێ، بەڵام سەرڎەشت بی بە تۆمو ئازاڎی و دماو وێش زیاتەر چەکەرەش کەرد و وەرڎەمو یانەو گرد ئازاڎیوازێوەنە بی بە نەماموو ئازاڎیی و گرد جادێوی هەولێرینە بی بە چراوی و گرد باخێونە بی بە ولەو ئازاڎی".
هەرپاسە هێمن مامەند واتیچش: "ئانێ سەرڎەشتشا گەشمەرڎە کەرد هەڵای وەنەو سێبەرەو سەرڎەشتی متەرسانێ، فۆبیاشا بە ئازاڎیی هەن، پەوکای ئامێ شێروان و هامڕێکێشا زینداننە تندێ کەردێ، هامڕایەکاو  سەرڎەشتیشا خاک و زێدو وێشنە بەرێ کەردێ، ئا ئەقڵیەتە سەرڎەشتش تیرۆر کەرد، هەمان ئی ئەقڵیەت و کارەکتەرێنێ، کە ئارۆ شێروان شێروانی و سلێمان ئەحمەد و قەهرەمان شوکریشا زینداننە تندێ کەردێنێ".
ڕۆنامەنویسەکە واتیچش: "ئا ئەقڵیەتە خێڵەکی و بنەیانەییە سەرڎەشتش گەشمەرڎە کەرد، هەمان ئا ئەقڵیەتەنە بۆنەو ملهوڕی و نەزانییوە ٥١٪ خاکو کوردستانیش دۆڕنا، پانەیچوە نمەمدرانێ دماو ئاشکرابییەی و سڕیەیوەی چوار سەد هەزار دەنگدەرە ساختا و ئاشکرابییەی قەبارەو ئەقڵی گولانەیشا گەرەکشانە دژو دیموکراسی و ئازاڎیی بمدراوە و ڕا جە کەرڎەی  ورچنییەی بگێران، تا ئی ٤٩٪یچە کە مەنەن دەسمانە بەرپشۆ، پەوکای هەرمانەو گردیمانە کە ئی دەسا بڕمێ و سنوورێوشا پەی بنیەیمێرە تا ئیتر ئازاڎیما نەکوشانێ".
ئاخرو بەیاننامەکەینە هێمن مامەند ڕۆنامەنویس و چالاک واتش:"بەرز و مەبارەکا یاڎو سەرڎەشتی و ئارۆ لاو ئێمەوە یاڎو ١٤ساڵەو پەیدابییەی سەرڎەشتین، ئارۆ عومرش ١٤ ساڵێن تازە بەرەو گەنجی و جوانی و گەورەیی ملۆنێ و ڕۆ بەڕۆ گەورەتەر مبۆنێ و بکوشێچش گولانێ باوە و تەنیا هەژمارو وێشا مەنەن".