دەوڵەتوو تورکی قڕکەری و فاشیستی جە هجووم و ئەرەگیرکاریینە پەی سەروو پانیشتوو کوردستانی بەردەواما و دەسەڵاتداراو پانیشتوو کوردستانی وەراوەروو هجوومەکاو دەوڵەتوو تورکی ئەرەگیرکەرینە تا ئیساتێ بێدەنگێ و بێهەڵوێستێنێ. چی بارەوە نویسەر و چالاکو بواروو ئەنفالی سمکۆ سابیر پەی ئاژانسوو هەواڵوو فوراتی (ANF) قسێش کەردێ.

'پانیشتەنە هامکاریی دەوڵەتوو تورکی ئەرەگیرکەری مکریۆ'

نویسەر سمکۆ سابیر باسوو ئانەیش کەرد، ئانە کە ئیساتێ دەوڵەتی تورکی ئەرەگیرکەر مکەرۆش ئامادەکاری فرەش پەی کەردەن، دلێ پانیشتیچەنە پانیشتیچەنە هامکاریی کریان و واتش: " ویەردەنە بۆنەو جینۆسایدی و کۆکوشیی عوسمانی و دەوڵەتوو تورکیایوە، کۆمەڵێو نەتەوێ جینۆسایدێ کریێ و تەنانەت زوانەکەیچشا نەمەن. دۆسێیەو جینۆسایدی سەروو خەلافەتی عوسمانی و دەوڵەتوو تورکیایرە ساق بییۆ. دەوڵەتوو تورکی هەمیشە چەمەڕاو ئانەیشە وەنە مکریۆ کۆکوشی بکەرۆ، سەرەڕاو کۆکوشی و تاوانە گەورەکاو دەوڵەتوو تورکی بەشێوی فرە پێسەو جینۆسایدی نەشناسنیێنێ، ئەگەر دادگاێوە بۆ ئازادانە هەرمانەش سەر بکەرۆ گردوو تاوانەکاو دەوڵەتوو تورکی، کە کەردێنێش پێسەو سڕیەیوەی  شوناسی و چەوسنایوەی گەلا، هجوومکەردەی سەروو  چوارپارچەو کوردستانینە گردوو ئینیشا مبۆ بە بایسو جینۆسایدی و تاوانوو جەنگی."

'پانیشتوو کوردستانی ئینا وەردەموو تەرسێوی گەورێنە'

سمکۆ سابیر ئانەیچش وات بێدەنگبییەی وەراوەروو هجووم و ئەرەگیرکارییەکاو دەوڵەتوو تورکی ئەرەگیرکەرینە تەرسێوی گەورێنە و واتش: "ئەگەر گلێرگەو ئێمە بێدەنگ بۆ بەتایبەتی پانیشت ئانە تەسەوروو ڕەوشێوی خراپی مکەروو. سەرنیشت وێش ڕێک موزۆ و مدرامان دژوو دەوڵەتوو تورکی مکەرۆ بە هەمان شێوە وەرنیشت ئینا خەباتێوی شەرەفمەندانەنە. پانیشتوو کوردستانینە نەک مدرامان نمەکریۆ بەڵکوم هامکاری مکریۆ، ڕاش پەی مکریۆوە. گەر ئی هجووم و ئەرەگیرکاریێ دەوڵەتوو تورکی بەراوردش بکەرمێ بە ئەنفال، ئەگەر جاش و وێورەشێ نەبیێنێ ئانە، ئا گردوو کەش و یاگا گەل وێشا حەشار دابێ دلێشنە جاشێ و وێورەشێ ئاشکراشا نەکەردێ ئانە قوربانییەکێ پێسە نەبێنێ. ئیساتێچەنە هامشێوەو خیانەتکار و وێوەرەشا یاگێ گەریلای و پانیشتی بە ئەرەگیرکەرا نیشانە مدانە. ڕابەر ئاپۆ پنەشا ماچۆ؛ کوردی بێنامووس، بەڕاسی کوردی بێنامووس ئارۆ دەوری تەرسناک و قێزەوەنش هەن جە تەسلیمکەردەی خاکی مەبارەکوو کوردستانینە بە دوژمنەکاما."

'دەوڵەتوو تورکی ژیوگە و شۆنەوارەکا مشێونۆ'

سمکۆ سابیر درێژەو قسەکاشنە باسوو ئانەیشە کەرد کە سەدام حوسێن پانیشتوو کوردستانینە نزیکەو ٤٠٠ هەزار جاشا بێنێ، بە سەرپەرشتیی نزیکەو ٣٠٠ مستەشارا کەوتێ وەڵێ دەوڵەتوو عێراقی پەی سەروو گەلوو کوردی، بە هەشت قۆناغێ جیاوازێ ئەنفال هەر چوار پارێزگاکەنە کریا و واتش: " بەداخۆ ئی حکومەتەو ئیساتێ هەڵوێستش نییەن و بێدەنگەن، هیچ جیاوازیێوەش نییەن چانەیە، کە ئەنفالێوی تەر سەروو گەلەکەو وێتەرە زیندە بکەریوە. دەوڵەتوو تورکی بە گرد نۆعێوە کاولکاری مکەرۆ و مێوەدەیمێ و باخەکا، کە داری سەدان ساڵەشا چەنەن بڕۆشا و سۆچنۆشا. عومروو دەگایەکاو پانیشتوو کوردستانی جە تارێخوو دەوڵەتوو تورکی کۆنتەرا، موڕنۆش، شۆنەوارە تارێخییەکا موڕنۆ. ئەگەر دادگاێوە بۆ ئینە بە تاوان و جینۆساید مشناسنۆ. جارێوی تەر هەست پانەیە مکەرمێ کە ئینایمێ وەردەموو جینۆسایدینە و کۆکوشیینە، ئینایمێ وەردەموو دلێنەشییەی ژیوگەو هەرێمو کوردستانینە. دماو شاڵاوو ئەنفالی ژیوگە و دەگایەکاو پانیشتوو کوردستانی ئاوەدانێ کریێوە. بەڵام جارێوی تەر ژیوگە و دەگایەکاو کوردستانی دلێنە مشۆ، چونکوم مبۆ  بە مەنتێقەو جەنگی و کاولکارییش دلێنە مکریۆ جەیۆشیەێوی فرە هەن بەینوو ئەنفالینە و ئەرەگیرکارییەکاو دەوڵەتوو تورکینە، بەداخۆ هامشێوەو ئەنفالی کە جاش و وێورەشێ هامکاریی عێراقییشا کەرد، ئیساتێچ هامکاریی دەوڵەتوو تورکی مکریۆ."

'حکومەتوو هەرێمی کێشە پەی ژیوای و ئازادیی وەش مکەرۆ'

سمکۆ سابیر ئاماژەش پانەیچە کەرد، لایەنە سیاسییەکێ وێشا هاگادارێنێ، کە دۆخەکە چندە تەرسدارا و بێدەنگێنێ، بەڵام ئاستوو گلێرگەینە و تاکینە، کە هاگادارێنێ بییەی دەوڵەتوو تورکی ئەرەگیرکەری تەرسدارەن، پێویسا دژش بمدردێوە و هەڵوێستشا بۆ و واتش: " پانیشتوو کوردستانی ئینا وەردەموو دۆخێوی تەرسدارینە بە کۆمەڵێو کێشێ و گرفتێ قورسێرە مویەرۆ، ئی حکومەتە تا مێ کێشە پەی ژیوای و هاموەڵاتبییەی، پەی ئازادیی وەش مکەرۆ. مشۆم هۆشیارێ بیمێ ئانێ کە دەسشا پەی ئی بارودۆخەیە بەردەن گەرەکشانە تەسلیمێشا بیمێ، ژیوای ئێمەنە خەڵکێوی هۆشیارێ هەنێ مشۆم هەڵوێستشا بۆ، دژش بمدراوە و  کاردایوەیشا بۆ. پانیشتوو کوردستانینە خەڵکانێوە هەنێ دژوو ئەرەگیرکارییینێ، چونکوم مزانا دەوڵەتوو تورکی لوابۆ حەر یاگێوی بەرنەشییەن چەنەش، تارێخ ئینەیە ماچۆ."

ئاخروو قسەکاشنە سمکۆ سابیر واتش: " هیچ دڵوەش نییەنا پی هەڵوێستوو گرووپە نیشتیمانی و سیاسییەکا  ئانێ کە وێشا بە نەتەوەیی مزانانە، ئیساتێنە هامکاریی ئەرەگیرکارییەکاو دەوڵەتوو تورکی مکەرا و بێدەنگێنێ. ئێمە مشۆم بگێڵمێوە دلێ گلێرگەی ئا تاکێ باوڕشا بە ژیواێوی ئازادی و شکۆمەندانەی هەن، پەنەوازا  هۆشیارتەرێشا بکەرمێوە کە ژیوای ئێمە ئینا تەرسەنە، تا هەڵویستشا بۆ."