سنوور گەلاوێژە سەبارەت بە گۆشەگیری ئیمراڵی و ئەرەگیری سەرو پانیشتوو کورڎەسانی و خیانەتو پەدەکەی و بنەیانەو بارزانی دواو، واتش: " پەنەوازا گەلوو ۋەرکۊتوو کوردةسانی بۆ بە سەڎاو رابەر ئاپۆی، مشۊم جە حیچ چېوۍ نەتەرسمۍ، دووژمن نمەتاوۆ تەرسنۆما".
ئەڼامەو دەسەی ڕاوەبەری کژاری دەربارەو دماین قسەکا هامسەرۆکۊو دەسەی ڕاوەبەری کەجەکەی بەسێ هۆزاتۍ پەیوەس بە هەوڵو دەوڵەتو تورکی پەی سەوداو مامەڵەی سەرو گۆشەگیری ڕابەرو گەلوو کوردی عەبدوڵا ئۆجالانی، حەرپاسە دەربارەو لەشکرکێشی و ئەرەگیریەکا دەوڵەتو تورکی پەی سەرو پانیشتوو کورڎەسانی، خیانەت و چەمساغی پەدەکەی و بنەیانەو بارزانی، پەی ئاژانسوو هەواڵوو فوراتی (ANF) ی قسێش کەردۍ.
هۊرسەنگنایەکۍ ئەڼامو دەسەی ڕاوەبەری کژاری، سنوور گەلاوێژۍ پی جۆرەنۍ:
"حەرپېسە زانیان ماوەو چن ساڵېن بە هیچ جۊرۍ چەمپنەکۊتەی چنی ڕابەرایەتیما پێک نمۍ، حەرپاسە سەبارەت بە ئاژەو سەرۆکایەتی جە ئیمراڵینە، هامسەرۆکۊو دەسەی ڕاوەبەری کەجەکەی هەڤاڵ بەسێ قسێش کەردێبێنۍ. ڕابەرایەتی پېسە تەنیا کەسێوە نەگیریان، پەی تەماموو دنیۍ ئاشکران کە جە کەسایەتی ڕابەرایەتینە بیەو گەلێوە، بیەو تەماموو ژەنا، بیەو ئازاڎیی، بیەو ئشناسنامەی و بیەو زۋانی گۆشەگیرکریان. ئینە تەنیا پەی دووژمنی وەسۍ نیا و پینەیچۆ مەمردۆ، سەرەڕاو ئانەی پەنا مبەرۆ ۋەرو ئەشکەنجەی و گۆشەگیری، گەرەکسا جە کەسایەتی ڕابەرایەتینە گەلوو کوردی دلېنەبەرۆ و ئازاڎیی ژەنا دلېنەبەرۆ، گەرەکشا جە کەسایەتی ژەنانە تەماموو گلېرگەی بە پاو مەسڵەحەتوو ۋێش ئاماڎەبکەرۆ.
جە ساڵەو ١٩٩٩ ی بەدماوە، دماو پیلانگێڵنیی مېیاننەتەوەیی حەتا ئیساتۍ دوژمن گەرەکشا جە کەسایەتی ڕابەرایەتینە سیاسەتوو نکۆڵی و قڕکەردەی سەرو گەلوو کوردیرە بەرۆڕاوە و گەرەکشا بیاوۆ بە مەرام. بەڵام نەتاواش بە هیچ مەرامۍ بیاوۆ. جە هەر چوار پارچەو کورڎەسانی و جە هەر شۊنێنە کە کورد چنەش مژیۋۆ بە تایبەتی بە سەرمەشقایەتی ژەنا، هەتا ئیساتۍ خاوەنداریێوە یۊگېرتە پەی مسۆگەرکەردەی ئازاڎیی سەرۆکایەتی ئەنجام دریان. نمونەو ئی حەقەتینیە فرە ئینا ڕووەنە جە ۋەرکۊتوو کورڎەسانی، جە سەرنیشتوو کورڎەسانی ، جە پانیشتوو کورڎەسانی ، جە ۋەرنیشتوو کورڎەسانی، جە جبەروو وڵاتینە جە لایەنو کەسا دیموکراتیکی و حیزبە دیموکراتیکەکا و هێزە ئەنتەرناسیۆنالیستەکا، کەمپین و ئازاڎیی جەستەیی ڕابەر ئاپۆی بەشێوێوە جەماوەری ئەنجام دریان.
سەوداو مامەڵەکەردەی سەرو ڕابەرایەتی قبووڵکریا نییا
جە ئەرەیاۋناکەو هەڤاڵ بەسێنە پەی تەماموو دنیۍ ئاشکرا بی کە گەرەکشانە سەرو سەرۆکایەتی مامەڵېوە سیاسیی گەندەڵ جابەجێ بکەرا. ئانە ئاژێوە نیا کە قبوڵ بکریۆ. قەناعەت مکەرو گەلوو ئێمە بە تایبەتی ژەنی بتاوا چی مژاریە بیاوانە کە کۆمارو فاشیستی تورکی بە مامەڵەی سیاسی و سەوداکەردەی سەرو ۋینای رابەر ئاپۆی گەرەکشا بیاوۆ بە مەسڵەحەت و مەرامەکاش. ۋەروو ئانەی بە ڕاسی چنی جە وەختوو نەورۆزینە، جە چوارو نیسانینە، جە هەشتو ئادارینە، گەلوو ئێمە جە هۊرچنیەکا سەرنیشتینە، گەلوو وانی، تاواشا بە دەنگ و ئیرداەو ۋێشا خاوەنداری جە بیەو ۋێشا بکەرا، ئیساتێچ هەمان کاتا پەی خاوەنداری کەردەی جە ڕابەر ئاپۆی.
ئیساتۍ زیڼانەکۍ تورکیای پەڕۍ بیێنۍ جە گەلوو کوردی و سیاسەتمەدارا کوردی، ۋەرکۊتوو کورڎوسانیچ بەهەمان شکڵا. بەتایبەت جە سەرنیشتوو کورڎەسانی هەر سیاسەتمەدارێوە و پیشەوەرێوە، هونەرمەنڎېوە، میوزیسیانێوە، زاوڵێوە کورد هێماو ئازاڎیی بەرزمکەرۊوە پەی ئانەی خاوەنداریەتی جە ۋێش بکەرۆ و ئازاڎیی سەرۆکایەتی مسۆگەر بکەرۆ پېسە گەندەڵی وەسف مکریۆ، گەرەکشانە جە کەسایەتی رابەر ئاپۆینە تەماموو گەلوو کوردی دلېنەبەرا. ئا ئۆپراسیۆنۍ جە هەرێموو پارېزنای مەدیاینە ملاڕاوەگوزارشت چی حەقەتینیە مکەرۆ بە تایبەتیچ جە پانیشتوو کورڎەسانی، ئۆپراسیۆنێوەن بە سەرمەشقایەتی پەدەکەی ملۊڕاوە ئیتر پەنەوازا ئا نامۍ بواڕیۆ. جە ئیساتێنە ڕژێمی فاشیستی ئاکەپە-مەهەپە جە گرڎ شۊنۍ کورڎەسانینە هرووژم مکەرۆ سەرو ئا خاوەندارێتیەو کوردی و دژوو گرڎ دەنگ هۊربڕیێوە گەلوو کوردین پەی ئازاڎیی، بەڵام هیچ ئەنجامێوەش بە دەس ناردەن. جە ئیساتێچەنە پەدەکەی نۆکەر و خائین جە حەقەتینەنە ئشناسنامەو داعشیش هۊرگېرتەن گەرەکشا جە کەسایەتی گەلوو کوردینە ئیراڎەو کوردا بماڕۆ.
خیانەتوو بنەیانەو بارزانی تاریخێوە دوور و درێژش هەن
جە حەقەتینەنە خیانەتوو بنەیانەو بارزانی تاریخێوە دوور و درێژس هەن ئاشکران جە وەختوو کۆمارو مەهابادینە چ دەورۍ خائینانەش گێڵنا جە دماییئاردەی بە سەرهۊردای کۆمارو مهابادی. چا وەختۆ بنەیانەو بارزانی و پەدەکە بیێنۍ بە ئشناسنامەو خیانەتێوە کە تاوەکو ئیساتێچ بەردەوامېنۍ سەرش. جە حەقەتینەنە ئینەیچ شەرمەزاری و شورەیێوە گۊرەن پەی پەدەکەی جە کاتێنە تۆ کوردەنی و خیانەت جە کوردی بکەری. جە ئیساتێنە پەدەکە جە کەسایەتی ۋێشەنە بە شێوێوە کارەساتبار ئا سیاسەتەو نکۆڵیکەردەی کە فاشیستی ئاکەپە-مەهەپەی گەرەکش بیەن ئۍ جابەجێش مکەرۆ. ماوۍ چێوەڵتەر بارزانی جە ئەرەیاۋنێوەنە ئاماژەش پانەیەکەرد تورکیا نامان خاکو کورڎەسانیوە، چی مەگەر هەولێر و شیلادزێ دەوڵەتو فاشیستی تورکیایش ئینا چنە خاکو کورڎەسانی نیا! چنی بۆ خاکێوە کە خاکو کورد و کوردان ڕژێمێوە فاشیستی پېسە دەوڵەتو تورکی کە پسپۆرا جە قڕکەردەی کوردانە بۍ و جە خاکو کورڎەسانینە بنکە و بارەگای سەروازی بنیۆرە. جە ئاژێوە چامنەنە کوردا چنی بتاوا بە ئازاڎیی ژیۋای ۋێشا بکەرا. ئایا بارزانی هیچ وەخت ئینەی جە ۋێش مپەرسۆ؟
تاریخ جە بنەیانەو بارزانی ۋەش نمەبۆ
ڕابەریەتی جە ۋەرگرینامەکاشەنە فرە سەرو مژارو میللیگەرایی (ناسیۆنالیزم)ی مردۆ و ڕەخنەش مکەرۆ، بەڵام وەشڵەی پەدەکە بڕۍ ئاوەزی نەتەوەییش چنە بیۍ، بەڵام دیارا ئا ئاوەزشە نیا پۊکاتی بیەن بە نۆکەر و چەمساغ و سوپاو تورکی، بنەیانەو بارزانی جە فێڵ و خیانەتەنە پسپۆڕێنۍ. فرە ناشرینا کە بنەیانەو بارزانی چانەی نمەیاوانە ئی سیاسەتە سیاسەتێوە براکوژییا. هێزەکاو یەژاستاری و هەپەگەی جە زاپ، مەتینا، خواکوڕک، هەرێموو بادینانینە گرڎ کاتۍ چېرو هرووژم و کۆمارو فاشیستینە بە ئیراڎەو ۋێشا خاوەنداریەتی جە ئشناسنامەو ۋێشا مکەرا، ئینەیچشا بە گرڎوو دنیۍ نیشانە دان. بنەیانەو بارزانیچ ئا کناچا و جوانا عال مشناسۆ، ئا ڕۆحیەتەیە عال فام مکەرۆ کە ئاڎیچ ڕۆحی ئاپۆیین. پەی ئانەی ئێمە خاکو ۋێما پارێزنمۍ پەنەوازا فیداکاری ئەنجام بڎەیمۍ، ئا فیڎاکارییە ئیساتۍ جە زاپ، ئاڤاشین، بادینان، خواکوڕک جە هەر شۊنێنە پەنەواز بکەرۆ کەردەنشا و مکەرایچش، ئینەیچ ئەرک و ۋەرپرسیارییەتیێوە تاریخین. بەڵام گەر ڕۆزگارێوە وەش بۆ، گەلوو کوردی دلۍ ئارامی و ئاشتینە بژیۋۆ ئایا بنەیانەو بارزانی ڕووەو ئانەیش هەنە سەرە هۊربڕۆو بڎیۆ کوردێوەرە و بواچۆ کوردەنا، ئا حەیێشە نمەبۆ چونکی ئیساتۍ گەندەڵی سەرو دەسوو بنەیانەو بارزانیرە وەڵا مبۆوە، تاریخ جە بنەیانەو بارزانی وەش نمەبۆ، گلېرگەو کوردی جە بنەیانەو بارزانی وەش نمەبۆ، ژەنی جە بنەیانەو بارزانی وەشې نمەبا.
گەلوو کوردی ئا هێزشە هەن بتاوۆ زەنگۆڵۍ پەدەکەی و تەماموو ئەرەگیرا بماڕۆ
ئا ژەنۍ کە جە ۋەرکۊتوو کورڎەسانینە بە سەرمەشقایەتی ۋێشا تاواشا بە خوڵقنای شۆرشوو "ژەنی ژیۋای ئازاڎیی" خاوەنداری جە بیەو ۋێشا بکەرا، ئیساتێچ جە کەسایەتی ئا ژەنانە کە بیێنۍ بە پارێزنەرۍ شکۆ و بیەی و ئشناسنامەو گەلوو کوردی سەرو کەشە ئازاڎەکانە پارێزناش. پەنەوازشا بە بنەیانەو بارزانی نیا و کەسیچ پەنەوازش بە بنەیانەو بارزانی نیا. خائینێوە چنی متاوۆ پەی وڵاتو ۋێش بۆ بە مرۆڤێوە بەشەرەف. گەلوو کوردی هوشیارا، ژەنەو کوردی ژەنێوە فرە هۆشیارەنە، ئەگەر هۆشیارۍ نەبیێنۍ ئیساتۍ جە سەرنیشتوو کورڎەسانینە چنی سەرەڕاو ئا گرڎوو ئەشکەنجەیە جە ۋەرا ۋەرو کۆماری فاشیستی ئاکەپەینە خاوەنداریەتی جە ۋێشا و جە کەسایەتی ۋێشانە خاوەنداریەتی جە ئازاڎیی جەستەیی ڕابەر ئاپۆی مکەرا.
جە وانەنە وەختۍ کۆماری فاشیست گەرەکش بۍ ئیراڎەو گەلی بماڕا، گەل بە یۊگېرتەیی بەرۍ کۊتۍ و واتشا دەسەڵاتو تۆ قبوڵ نمەکەرمۍ زەنگۆڵۍ کۆمارو فاشیستی ئاکەپەیشا ماڕۍ. جوان و کوردی و ژەنەو کوردی و گەلوو کوردی ئا هێزشە هەن بتاوۆ زەنگۆڵۍ پەدەکەی و کۆماری فاشیستی و تەماموو ئەرەگیرا کوردی بماڕۆ. جوانۍ کوردی جە کەشە ئازاڎەکا کورڎەسانینە جە ۋەرا ۋەرو چەکە قەڎەغەکریاکانە، جەنگوو ئیراڎەی مکەرا جەنگوو بیەی مکەرا، جەنگوو ئازاڎیی جەستەیی ڕابەر ئاپۆی مکەرا بە ڕۆحیەتوو عەگیدەکا و بە ڕۆحییەتو زیلانەکا، بە ڕۆحییەتو بێریتانەکا، بە ڕۆحییەتو کەمال پیرەکا، بە ڕۆحییەتو حەقی قەرارەکا ئیساتۍ خاوەندارییەتی جە ئازاڎیی جەستەیی ڕابەر ئاپۆی مکەرا، خاوەندارییەتی جە ئیراڎە و ئشناسنامەو گەلوو کوردی مکەرا، گرڎ کەسۍ ئینەی عال مزانۆ. ئیساتێچ قۆناغێوەنە، پەنەوازا گەلوو ۋەرکۊتوو کورڎەسانی پېسە گەلوو سەرنیشتوو کورڎەسانی چنی هەتا ئیساتۍ فیداکاریش کەردەن، خاوەنداریش کەردەن، بیێنۍ بە سەڎاو ڕابەر ئاپۆی، چێگە بە دمایچۆ پەنەوازا بیمۍ بە سەڎاو رابەر ئاپۆی جە هیچ چېوۍ نەتەرسمۍ، دووژمن نمەتاوۆ تەرسنۊما.
گەلوو پانیشتوو کورڎەسانی گەلێوە نیا سەرە بنامنۆرە
پانیشتوو کورڎەسانی ناوەڼێوەن هەڤاڵ هەڵمەت و هەڤاڵ ڤیانە چنەشەنە بەرکۊتۍ، گەر گێڵمۍ پەی تاریخی لەیلا قاسمە بەرکۊتێنە، گەلوو پانیشتی گەلێوە قارەمانېنۍ. جە ٢٠٠٨ ەنە وەختۍ کۆماری فاشیست هرووژمش کەرد سەرو زاپی، جە بامەڕنێ گەلوو پانیشتوو کورڎەسانی بە قارەمانیەتی ۋێشا و ڕۆحییەتو ئاپۆچێتی ۋێشا خاوەنداریشا کەرد، حەرپاسە متاومۍ واچمۍ جە جەنگوو قەندیلینە ئەڎاکۍ و جوانەکۍ کورڎەسانی هەر پېسە لەیلا قاسمۍ چەکشا هۊرگېرت و ۋەرگرییشا جە شکۆو ۋێشا کەرد. ئیساتێچ قەناعەتما چامنەن هێزێوە پېسە پەدەکەی و هێزی کۆماری فاشیستی ئاکەپە-مەهەپەی نمەتاوا تاریخوو قارەمانیەتی پانیشتوو کورڎەسانی بسەڕاوە. پەیلوایما پاسەن کە جارێوەتەر گەلوو پانیشتوو کورڎەسانی بەیا سەرو جاڎەی و کۆڵانەکا جە شار و دەگایەکانە بە یۆگێرتەیی ۋێشا ۋێشا دەنگوو ۋێشا بەرز بکەراوە. خاوەنداریەتی جە شکۆو ۋێشا بکەرا، گەلوو پانیشتوو کورڎەسانی ئا ئەزموونشە هەن و متاوۆ خاوەنداریەتی جە ۋێش بکەرۆ، جارێوەتەر پەنەوازا ئانەی نیشانەو پەدەکەی بڎۆ کە گەلوو پانیشتوو کورڎەسانی گەلێوە نیا سەرە بنامنۊرە.
جە ۋەرکۊتوو کورڎەسانینە ئا ئەشکەنجەی سەرو کوردی و بەتایبەت ژەنۍ هەن، جە ڕاو ژەنېوە گەرەکشانە گرڎوو سیاسەتوو ۋێشا بسەپنا سەرو گلېرگەیرە، چێگە بە دمایچۆ پەنەوازا بەیەک دەنگی و بە دەنگوو ئازاڎیی ڕابەر ئاپۆی خاوەنداریەتی جە ۋێما بکەرمۍ، ئینە ئا چێوەنە کە متاوۆ پەشتەو پەدەکەی بماڕۆ، ئا هێز و ئیراڎە پەشتەو ئاکەپەیچ ماڕۆنە. پېسە چنی تا ئیساتۍ گەلوو کوردی سەرو بنەماو ئی حەقەتینیە، بە یۆگێرتەی و بە هەستوو کوردبیەیۆ خاوەنداری جە بیەو ۋێش و ئازاڎیی جەستەیی ڕابەر ئاپۆی کەردەن، چێگە بەدمایچۆ پەنەوازا بە سەرمەشقایەتی ژەنا هەڵوێس هۊربگێرا و سیاسەتو قڕکەردەی کۆمارو ئەرەگیری مردنا و فیداکاریێوە گۆرە بکەرا.
دەوڵەتو فاشیستی تورکی گرڎ چېوێش ئەزموون کەرد، خیانەتوو بنەیانەو بارزانی گرڎ چێوێش ئەزموون کەرد، چېشیتەر مەنەن بکەراش و چ سیاسەتێوە مەنەن ئەنجامش بڎا، چ قڕکەردەیۍ مەنەن ڕاوەبەرش بکەرا ، گلېرگەو کوردی و ژەنا کوردی بە ئیرادەو ۋێشا هەتا ئیساتێچ جە ۋەرا ۋەرو گرڎ گەندەڵیێوەنە مردێنۍ. قەنەعاتم پاسەن کە پەی چیولایچ جە جاڎە و دەگایەکا ۋەرکۊتوو کورڎەسانینە ژەنا و گەلوو کوردی شۊنەو ئازاڎیی ۋێشارە مگېڵا، ئی گەلە شۊنەو گلېرگێوە دیموکراسی و ئازاڎیرە مگېڵۆ، ئی گەلە متاوۆ بۆ بە دەنگوو ئازاڎیی جەستەیی ڕابەر ئاپۆی، ئیتر پەنەوازا دەنگما بەرز بکەرمۍ پێوەرە بە یەک دەنگ بیمۍ بە هێزێوە ئا سیاسەتا دلېنە بەرۆ. گەلوو ۋەرکۊتوو کورڎەسانی، بە هۆشیاری ۋێشا و بە ئەزموونوو ۋێشا گەلێوەنۍ مزانا غەڵەت و ڕاسی ۋێشا جیا بکەراوە و بە دووژمنیشا نیشانە دان کێنۍ و چێشا مەتڵەبا و چنی بژیوا. گەلوو کوردی سەرو بنەماو فەلسەفەو ڕابەر ئاپۆی ۋێش بە دنیۍ ئشناسان. گەلوو کوردی ئیتر ئا گەلە نیا کە هەرکەس ئاما و ئیتر یەمەرەکاس جابەجێ بکەرۆ."
